السبت، نوفمبر 27، 2010

حاسه إني عايشه في طبق بيض كبير


أعجبني مره إستيتيوس على الفيس بوك للصديق المدون إسامه عبد العال بيقول فيه(حاسس إني عايش في طبق بيض كبير) والحقيقه إني أشعر بنفس إحساس إسامه خاصة بعد إنهمار مسيجات الإعجاب وطلبات الإضافه والحب من اول ليك والعشق من أول كمونت،،،،بصراحه

فيه حوارات كده بتخنقني على الفيس بوك ، وبجد بأعمل بلوك علطول للي بيستظرف ويقولها ،،،(((ممكن تديني إيميلك علشان نعمل تشات ونتعرف على بعض اكتر؟،،، ممكن نمرة موبيلك لأني عايز نكون أصدقاء بجد؟ صداقة حقيقيه موش على النت ولا الفيس بوك صداقه تدوم،،،،كلميني عنك شويه؟؟؟، عرفيني بيكي أحكي لي عن نفسك ؟ بجد أنا عمري ماشفت إمرأه زيك ولا في جمالك كأنثى ؟؟؟

===============================================================

كمان احب اعرفكم إني موش فاتحه مكتب توظيف ولا اعرف حد مهم علشان اتوسط لحد يشتغل ،،ونسيت اقول لكم حاجه دايما موش واخدين بالكم منها مع إني كتباها في أول السي في وهي إني سبت الإمارات من 29/9/2009 و عايشه في مصر

================================================================

انا بالمختصر المفيد المعلومات اللي عايزه الناس تعرفها موجوده على الصفحه نفسها،،،بصراحه مبحبش اعمل تشات ولا عندي طولة بال لحد،،،انا لو أديت رقم موبيلي لكل الأصدقاء على الفيس بوك لكان زوجي طلقني منذ زمن بعيد بسبب كثرة المكالمات اللي حاتجيني وكمان انا اصلا موش حا ارد عليها،،،،شوية العيال اللي في العشرينات أو في التلايتينات(((( (طبعا مستثنى منهم الرجاله في تصرفاتهم)))))موش معني إني شرفتهم بقبولي إضافتهم إنهم يحاولوا ينصبوا عليه بالكلام الأهبل اللي بيقولوه والله عيب ،،دا انا اضحك على بلد،،،،شوية برضه الكبار سنا والعيال في تصرفاتهم اللي موش اصدقاء عندي ويبعتوا لي رسايل فاكرين إني حا ارد عليهم علشان يعرفوا يدخلوا صفحتي من غير إضافه أقول لهم قديمه العبوا غيرها

وبرضه شويه التافهين اللي يروحوا يعملوا فيس بوك مخصوص ليه ويضيفوني ومالقيش عندهم اصحاب غيري، وده برضه علشان يدخلوا صفحتى وفاهمين إني حا ابلع الطعم،،برضه بأقول لهم قديمه العبوا غيرها لإني بأقبل إضافتهم علشان أشوف آخرتها وبعدين بأعمل لهم البلووووووووك برضه

وشوية البنات السيس اللي كل شويه يبعتوا لي مشاكلهم الجنسيه فاكريني الدكتوره هبه قطب،،برضه اقول لهم العبوا غيرها أنتم رجاله بشنبات وعاملين للأسف نفسكم نسوان


وبعدين الرحمه حلوه ياجماعه اللي فيه مكفيني وربنا أعلم بحالي وغني عني وعن سؤالي،موش حاتكفروني كمان من الفيس بوك اللي بيسليني

وفي النهايه

انا عندي اصدقائي المقربين جدا واللي يعرفوني واللي عندهم ايميلاتي وتليفوناتي وكل حاجه،،،

فاللي شايف نفسه من بتاع الحورات اللي بتخنقني يمسح نفسه من القايمه عندي بدل ما اعمل له انا بلوووووووووووووك

=================

================

تحديث

بعد البوست ده واللي كتبته برضه في الإنفورمشين على الفيس بوك جالي عده رسائل

اولها نموذج لطبق البيض بلس


موش فاهمه مين هو اصلا علشان ينصحني؟ ،وانا بدوري باقول له روح انصح نفسك بدل مابتلف تدور على الأنفورميشن بتاع الستات على الفيس بوك وتبعت لهم رسال علشان اكيد حسيت نفسك واحد من بتوع طبق البيض


سلام

Between You and Mahmoud Bedawy
Mahmoud Bedawy November 28 at 5:33pm Report
الأنا عندك عالية قوي ي ي ي ي ي
وطيها شوية الله يرفع مقدارك
بصراحة انا عمري ماضحكت قد ماقريت اللي حضرتك كاتباه في الانفووو بتاعك طبعا زي ماحضرتك كاتبة انا مش متوقع ومش محتاج رد لكلامي ده بس لقيت من واجبي أنصحك لله تعالى مع انك مش هاتقبلي النصيحة
السلام عليكم


=========================================

اما الرساله دي فكان صاحبها إنسان يبدو عليه أنه طيب وفاهم قصدي

مجدي شندي November 28 at 12:54pm Report
طيب يا ايمان واللي مش هيقول اي حاجه من دي خالص ؟؟

=====================
وصاحب الرساله دي موش من ضمن الأصدقاء ايضا وهو يستفسر عن كم الأصدقاء عندي ولماذا اقبلهم ، ونسي معلومه مهمه وهي إني كاتبة صحفيه وصاحبة مدونه أكتب فيها ويهمني كثرة عدد القراء ، كما أن معظم الأصدقاء من الصحفيين والكتاب والإعلاميين والمدونين وغيرهم ،ولإنه إنسان محترم انا بأرد عليه

Between You and Amr Al Shref
Amr Al Shref November 28 at 12:14pm Report
انا طبعا بحترم وجهة نظرك جدا
لكن معذرة
لماذا تقبلى كل هذا الكم الهائل من الاصدقاء
مجرد سؤال

==============
تحديث 2
وده برضه نموذج لطبق البيض ابوصفارين

تخيلوا ده اسمه ابوعمار عساسي بجد
شوفوا بأي كاتب لي أيه؟

ابو عمار عساسى بجدDecember 10 at 2:30am Report
بجد كلامك عن نفسك يثير الاشمئزاز انتى اغرب صفحه على الفيس بوك وايه كلمه هتكفرونى هنا كمان دى
===============
=وده موش فاهمه أيه اللي تاعبه هو ماله اصلا

Tarek Attia Satar Attia December 9 at 4:29pm Report
اية اللى كاتباه دا كلة هو فية ايه اللى عاوزاه ضفيه واللى مش عاوزاه زحيه
=================









هناك 40 تعليقًا:

صيدلانيه طالعه نازله يقول...

هههههههههههههههه

لوسمحتى يا ايمى حاخد البوست واعمله نوت فى الفيس

بوك ويبقى رساله تحذيريه لكل من تسول له نفسه

ان يتعدى حدود اللياقه

واللى بياخد اقراص البجاحه والوقاحه يبطل ياخدها

ويخليه فى اقراص الادب والاخلاق

بوست تحذيرى يجنن

مساء الفل يا قمرايا

MAKSOFA يقول...

صيدلانيه طالعه نازله

ياحبيبتي انت تاخدي من غير إستأذان ياقمر

Sherif Fouad يقول...

انا بقى حاسس انى عايش فى حلة ملوخية بالتقلية ههههههههههههههههههههههه .. بجد ربنا يعينك يا ايمان من طبق البيض ده .. وتيجى الفرخة اللى تنقذك وترقد عليه عشان يفقس وتستريحى من الهم ده

MAKSOFA يقول...

Sherif Fouad

عسل والله عسل

Mohamed Barghash يقول...

الشاعر ....قال ....... يازمان العجايب وإيش بعدماصار .........كل ما قلت هانت ترجع تعل من جديد .........إن حكينا ندمنا و إن سكتناقهر ..........وكتر التوجع والبكى مايفيد ........ونفس الشاعر قال .........ماللرجى فى بعض الأحوال قيمه ............وماللعمى صبح ولو بات سهران ..........فمن يعيش حالة عمى وهو يتعامل مع الناس أكيد وطالما حالة العمى ليس لها صبح فمن الطبيعي سيكون حاله الجليطه وعدم التمييز

Nader El Kady يقول...

ya salam salam ta3zem salam

Montana Master Of Love يقول...

جميل توضيحك المهذب
و اجمل حاجه لما كلنا نكون في طبق واحد دايره واحده جمعتنا مافيش حاجه اظن محتاجه ان واحد يقول لحد كلمني عن نفسك
الفيس بقي زي المرايه مش محتاجه حد يوضح اكتر من كدا عن نفسه بيعكس شخصياتنا وانفعالتنا و يومنا
هو طبق كبير بس مش لازم يكون طبق بيض ممكن طبق شوكلاته:] اصل بحبها اوي
تحياتي
Mohamed Metwali

MAKSOFA يقول...

Mohamed Barghash
يسلم لي ذوقك في إختيار الأبيات الشعريه

MAKSOFA يقول...

Nader El Kady
انت من اطيب أصدقائي على الفيس بوك وتكفي جدعنتك وشهامتك ايام مرضي

تحياتي

MAKSOFA يقول...

Montana Master Of Love



ماهو لو طبق سيكولاته كنت اكون حباه،،لكن هو طبق بيض كبير


شرفت مدونتي

momken يقول...
أزال المؤلف هذا التعليق.
nouna يقول...

اقول ايه البيض المايل يدحرج علي بعضه
للاسف الناس مبقتش تميز ولا مش عايزين يميزوا!!
رسالة واضحة,صريحة وقد اعذر من انذر
مساء الفل على ست الكل

ماما أمولة يقول...

ههههههههههههه
والله شر البلية مايضحك
تسلمي يارب يا ايمان

MAKSOFA يقول...

momken

تصدق شكلي انا اللي حا ابلغ عنك فشخ

MAKSOFA يقول...

nouna

حلوه قوي المثل ده يانونا أيه رايك في البوست رجعت زي ايام زمان زي ما انت عايزه والا لسه؟

MAKSOFA يقول...

ماما أمولة

حبيبه قلبي دايما مشجعاني كده

nouna يقول...

الحمد لله بس انا طماعة مستنية اكتر
الطاسة لما تسخن بتشعشعة واحلى من شعشعة المكسوفة مفيش
شدى حيلك

MAKSOFA يقول...

momken
قول مقتبس


بعد ما العيال ارتبتط بيكى تتخلى عنهم كده عينى عينك
وتقطعى الجواب وتقفلى الشات..وتخلعى ياسلام
هما ود الناس لعبه فايدك و لا ايه
============
معلش ياممكن مكنتش اقصد

===================

قول مقتبس


ويطمنا عليك ويتم شفاء الجميع ان شاء الله
==========
بصراحه موش عارفه شفاء الجميع مين بالظبط ياممكن

موش فاهمه او بصراحه كده انا فاهمه ومبحبش افوت

MAKSOFA يقول...

نونا


ان شاء الله ارجع زي زمان واعجبك ياحبيبة قلبي

فوزى الدبيكى يقول...

انا قرات موضوع ..وكان موضوع جيد جدا فى سردة ..وهو عبارة عن حالة يعيشها بعض الناس من خلال الفيس بوك او النت عموما ..وتختلف من شخص لاخر .. توجد ناس مثلك ليس عن...دها طول بال وبتزهق بسرعة من رخامة بعض الناس ..و وفية ناس بتكبر دماغها ولا اكن فية شىء حدث وبتعتبر هذة الاشياء تافهة من اشخاص تافهين ..وفية ناس بتتجاوب مع هذة التفاهات وتستغلها اسؤ استغلال ..يعنى مثلا فية واحدة وضعة صورة مستعارة جميلة جدا وفى داخل الاكونت بتاعها وضعة لنفسها صور جميلة جدا لنفس الشخصية المستعارة اى انها تنتحل شخصية واحدة تانية .. وطبعا انهال عليها التافهين من جميع الاعمار للاضافة واعطاء الايميل والاعجاب وطلب رقم التلفون ..وترد علي كل واحد فى رسالة بان هذا رقم موبيلها واشحن لى ب 50 علشان نعرف ندردش كويس ..وبعد ما الضحية يحول لها رصيد تعمل بلوك علية ..وتحول الرصيد من الرقم الذى لاتستعملة ..الى الرقم الاخر وهكذا كل يوم والتانى ضحية .. وممكن تطلع ولد وعامل بنت وبيستعل الناس ..

وانا شخصيا حدث لى من فترة ان وصلتنى رسالة من واحدة تقول لى انا معحبة باسلوبك وطريقة تفكيرك وارجو اضافتى عندك لكى نتواصل واعطيك رقم موبيلى ..ولم ارد عليها وكبرت دماغى لانى هارش هذة الحركات المكشوفة ؟

سهيل ولى الدين علام يقول...

ايمان
انتى لكى كل الحق فيما قلتيه..ولكن
من الفتره القصيره التى عملت اكوانت
على الفيسبوك وهى لاتزيد عن عشرين يوما لاحظت انهناك ما نستطيع ان نطلق عليه ثقافة الفيس بوك فقد دخلت ان وصديق لى فى نفس الوقت وبعد اسبوعين
وجدته يسألنى عن عدد اصدقائى فقلت انهم حوالى عشرين فأخبرنى انه صار لديه حوالى 800 صديق فكيف صار له هذا العدد.. ولما شرح ذلك وجدته يتطفل على اى المشتركين ..باستجداء
صداقاتهم..وهذه احدى مظاهر ثقافة الفيسبوك..ولكن اصدقائى لايزال عددهم
عند العشرين وهو كسر الالف صديق..
اما موضوع الشات فحتى الآن لا استسيغه
لاننى لااستطيع ان اجد موضوعا اتحدث فيه مع شخص لااعرفه..
ولكن ما اعجبنى فى الفيس هو التعليقات على المواضيع المتنوعه التى تفتح للنقاش ..
ارجو عفوك للأطاله ومبروك لعودتك لدوامةالحياه ومللها............

غير معرف يقول...

هاهاهاها ..

والله حضرتك معاكى حق ..

بس اسمحى لى - عفوا - وفضلا من حضرتك ، أن أضيف نفس الكلام وتوجيهه إلى بعض الفتيات والبنات والسيدات ، من نفس الفئة العمرية وليسوا جميعا بالطبع ، ممن يقومون بنفس الأعمال التى ذكرتيها حضرتك فى النوت الجميلة دى ، يقومون بها مع أى صحفى أو كاتب أو أى مشهور لنفس الأسباب التى ذكرتيها حضرتك تخص الشباب ..

وربنا يرحمنا بجد من التفاهات دى ..

شكرا جزيلا لحضرتك ، وتحياتى

د. عمرو - طبيب وصحفى

مثليه يقول...

ياااااااااااه بقالي كتير ماجيتش هنا اتمنى انك تكوني في احسن حال و وحشتني كلامك

يا مراكبي يقول...

:-)))

ما أشبه اليوم بالبارحة .. نفس الحكاية - لو تفتكري - اتكررت برضُه في بداية التدوين .. بس طبق البيض ساعتها كان لونُه مُختلف

:-)

ده العادي يا عزيزتي .. التدوين زي الفيس بوك زي كُل حاجة في الدنيا بتبقى انعكاس للمُجتمع الطبيعي بكُل سلبياتُه وأمراضُه النفسية .. ولسه ياما هنشوف

MAKSOFA يقول...

فوزى الدبيكى
ماهو ده التسول الإفتراضي


سهيل ولى الدين علام

اشكرك ياسهيل

د. عمرو - طبيب وصحفى
أكيد الموضوع لاإستثناء فيه وليس قاصرا على الرجال فقط


مثليه
إنتي كمان وحشتيني

MAKSOFA يقول...

يا مراكبي

فعلا عندك حق هو إنعكاس لما يحدث في المجتمع

Desert cat يقول...

هع هع هع لسه النهاردة يا ايمو حاذفة شوية كائنات لزجة زى اللى بتتحدف عليكى دى شكلها كدا فرة وجت للمهابيل يقرفو الناس فى كل حاجه حتى النت

هشام نصار يقول...

كلامك عجبني أوي، صح 100% الإجراء ده
لأن على ما يبدو إن الوضع حسب ما قرأت كده، إنه الموقف تجاوز مرحلة طبق البيض وأصبح مستودع بيض !
على رأي سواق مكروباص معرفوش، قالها كلمة.. الإحساس نعمة

برضو من باب الاحتياط لو هتضيفي شخص متعرفيهوش شخصياً وعنده أصدقاء مشتركين معاكي، غيري الـ Privacy بتاعت بياناتك وصورك اللي بتظهر له لحد ما تتأكدي من حقيقة شخصيته.
أنا بعمل كده مع اللي معرفهمش

وربنا يبارك لك ويديكي الصحة وراحة البال
تحية واحترام وإعجاب ..

nouna يقول...

ياربى عالتناحة والبرود ايه دة الناس دى معندهاش احساس؟

Tears يقول...

هدى اعصابك لان ياما ح تقابلى بلاوى لان الناس لما بتكلم من ورا الكمبيوتر ممكن تكون غير خالص الواقع و جرأتهم بتزيد


تحياتي

Dr Ibrahim يقول...

ربنا يثبتنا جميعاً على الحق.

مؤمنه يقول...

ههههههههه ضحكتينى فعلا لسه فى ناس تافهه كده الله المستعان بس المهم انهم فعلا طلعوكى من الى انتى فيه وده بصراحه تحسب لهم ربنا يعافيكى حبيبتى ويبعدهم عنك لان فعلا الواحد مش ناقص فيه الى مكفيه تحياتى ليكى ووحشتنى اضفاتك جدا ومستنيه جديدك وربنا يطمنا عليكى وعلى فكره وحشنى صوتك الحلو يلا انا كمان بعاكسك اهو
ههههههه سلام يا قمر

فكرة من الزمن ده يقول...

وحشتيني جدااااا
وضحكت مرتين
مرة من فرحتي انك كتبتي بوست جديد
ومرة من كلمة طبق بيض
وصدقيني اللي بيحصل معاكي بيحصل فينا كلناباختلاف الظروف سواء على الفايس بوك او حتى في الشارع لان طول ما احنا في الدنيا لازم بنتعامل مع الناس بكل اختلافهم وده اللي بيدينا فرصة نتعلم ازاي نتعامل مع كل الناس من غير ما نيجي على نفسنا ولا نسمح لهم يئذونا
هدي نفسك وماتسمحيش لحدما يستاهلش انه يعكر دمك
تحياتي

MAKSOFA يقول...

Desert cat

تعرفي المشكله ان فيهم ناس من المفروض انهم بلغوا مستوى محترم من العلم والثقافه والوعي

MAKSOFA يقول...

هشام نصار

حلوه حكاية مستودع دي يا هشام

MAKSOFA يقول...

nouna


ساعات يانونا اروح لطبيبي واقول له انا عايزه اكون تنحه عديمة الإحساس وبمعني اصح تيس

فالدكتور يضحك ويقول لي موش ممكن تكوني كده بالأدويه لأن دي طبيعه في اإنسان نفسه

MAKSOFA يقول...

Tears


انا بالعكس مبسوطه لإن الإستفزاز اعادني لنفسي

MAKSOFA يقول...

Dr Ibrahim


امين

MAKSOFA يقول...

مؤمنه


ربنا يشفيكي ويشفيني ويشفي كل مريض يارب

MAKSOFA يقول...

فكرة من الزمن ده


انت كمان وحشتيني قووووووووووووووي


ربنا يسعدك ويفرحك دايما ويخليكي تضحكي