الأحد، أبريل 12، 2009

موشومة أنا ...بالرجل المصري


أثار على البوستين الماضيين حفيظة أصدقائي المدونين الرجال،وقد أعلن البعض تذمره عبر تعليقات لاذعة غاضبة،بينما أكتفى الآخرون بإرسال شجبهم عبر إيميلي الخاص،واليكم بعض ماقي
ل
،الصديق العزيز
harmless قال.
..((معقول كل دى شتيمه على الرجاله؟معقول يكون الرجل نذل بطبعه والنذاله تساوى الرجل كما تقول آسر؟انا والله رأيت وعاصرت وحضرت قصصا كثيره من تلك كلها نذاله نسوية فى اعلى مستويات النذاله التى تهون معها نذاله سالومى مع النبى يحيى او نذاله دليلة مع شمشون او نذاله ناديه الجندى مع عماد حمدىوطبعا لا اشك لحظه انك (و آسر) تعرفون من هذه القصص الكثير ايضاوبقلب مفتوح وفى لحظات صدق أسألكمااليس الرجل هو من يحميكم فى الشدائذ ويذود عنكم فى المصائب ويشذ ازركم فى الخلافات ويحمى ظهوركم فى الملمات؟اليس الرجل من يسهر على راحتكم ويهتم بشئونكم ويلبى طلباتكم ويحميكم من تقلبات الدهر وخبايا الزمن))
، أما الصديق الفنان
((وبعدين انتي منفسكيش تكتبى ربع كلمه حلوه على الرجاله بأه ولا ايه؟ كلهم منيلين اوى كده ؟؟ والله احنا فينا الغلابه والحنينين والطيبين والجدعان وفينا برضه ولاد.....؟؟))
،أما صديقي القديم
فقال لي( حرام عليكي وصف الندالة دة مش صح خالص !!!!!)


أما الصديق المشاغب
،allfollowsome قال لي
(انا مستنى منك بوست عن رايك فى الراجل المثالى وايه المتطلبات اللى المفروض تكون موجودة فى رجالة اليومين دول وانتى شايفاها مش موجودة نورينا وقوليلنا احنا الصنف الغريب ده ناقصنا ايه

ولأنه يعز علي زعل الرجال مني، فأنا اؤكد لهم إنني عندما أتناول بعض الحوادث التي ربما تدلل على بعض التصرفات غير اللائقة من الرجل، فذلك لإنني أحبه وأقدره وله في قلبي مكانة اراه فيها متوجا على عرش حياتي، لذلك أرفض بشدة أن أراه مخلوعا من تلك المكانة المقدسة لدي، ،وإذا كان الرجل لايدرك ما يفعل فإنني أحاول أن أستعرض أمامه المواقف التي تشعره بالخجل لإنها لاتليق به، فإذا كان قد فعلها أو ينوي على القيام بها سواء متعمدا أو بغير قصد، فهذا دور المرأة التي تحبه في أجمل صوره،وأخص هنا تحديدا الرجل المصري، ذلك الرجل الكبير جدا في نظري ، هذا الرجل الذي احبه بعنف
ورقة، الرجل الذي أعتبره الوطن الذي أعشقه وبدونه لا أساوي شيئا

ومن خلال غربتي خارج مصر والتي أستمرت حوالي 25 سنة ومازالت حتى يومنا هذا،تعايشت بشكل يومي مع زملاء لي من كافة الجنسيات العربية،وهذا جعلني أخرج بنتيجة هامة وهي أنني لايمكن أبدا في يوم من الأيام أتخيل نفسي حبيبة أو زوجة لرجل غير الرجل المصري،وقد يعتبر البعض كلامي هذا نوعا من العنصرية، ورغم إنني أبغض العنصرية في كافة أشكالها إلا أنني وفي حب مصر وحبي للرجل المصري أرحب بوصفي بالعنصرية،هل تعلمون الى أي مدى وصلت عنصريتي أنني أحزن من زواج المصري بغير المصرية،وأموت قهرا عندما أرى المصري يعشق أمرأة غير مصرية

ولكن الرجل المصري
لماذا؟؟؟؟؟؟؟؟


فإن أبسط ما اقوله عن الرجل المصري

بيني وبينه تاريخ طويل وموروث ثقافي مشترك يجعلني أحس إننا روح واحدة،و إنني موشومة به ولا أستطيع الفكاك من آسره،هذا الآسر الذي أعتقلت فيه نفسي برغبة مني و بكامل إرادتي،والرجل المصري هو نصفي الحلو الذي اسعد به فهو أبي وأخي وزوجي وابني




احببته طفلا ثائرا متمردا يرغب في أمتلاك كل الأشياء، و حين يمتلكها يهجرها الى عوالم أسطورية لم يكتشفها بعد


أحببته مجنونا لعوبا شقيا وعشقته رجلا عاقلا متزنا و منطقيا،وهويته كائنا هلاميا اضيع فيه عندما أطارده،وعشقته رجلا مستحيلا اسعي أن يكون في عالمي واقعيا


أحببته كاذبا ساذجا كي احتويه بين ضلوعي كطفل أهوج،وعشقته صادقا في حبه لي ،مخلصا في عمله متفانيا في تحقيق ذاته

أحببته أنانيا يرى نفسه محور الكون،وعشقته معطاء متفانيا ينشر دفئه في كل مكان


أحببته سيراليا رمزيا تكعيبيا
وعشقته ساطعا كالشمس،ثائرا كالبركان



وأحببته بدائيا،بدويا،إنفعاليا، هجوميا

وعشقته مهذبا حضاريا


أحببته شاطئا أرسو عليه

وعشقته وطنا لايسمح بالإغتراب لمواطنيه




أحببته وهو يحتويني بشموخ وقوة

وعشقته مقتحما لأعماقي الصامتة

ليحررني من ظنوني وأوهامي


عشقته في كل حالاته وأجواءة وطقوسه وعواصفه وأنواءه


احببته استاذا في دروس الحب،عبقريا في ممارسة فنونه

وعشقته وهو يرسب في أحضاني


أحببت نفسي لإنني ذاك الضلع الأعوج له، وأتمنى دائما أن أكون قريبة الى قلبة ، لتشتعل به روحي و لأذوب عشقا في دفء أحضانه وحنان أنفاسة




أحببته وأنا أدفن رأسي داخل صدره، وأنا اتمنى ان اكون دائما امراته والاياتي أبدا هذا اليوم الذي يقلع فيه عني


أحببته وهو يبعثر شعري مجتاحا كل كياني
واحببته ديمقراطيا،وعشقته ديكتاتورا يختم فمي بالشمع الآحمر


احببت كلمات حبه المصريه وهي عندي أجمل لغات الحب الشاعرية
وأحببته يدندن معي بأغنية مصرية،ويمطرني بقفشات مصريه،ويوجعني بآلام مصرية



فانا لااؤمن الا بالرجل المصري والحب المصري ولا اسمح لنفسي بالبقاء داخل غرفة العمليات لأنني أخترت رجلا وحبا وعشقا خارج إطري المصرية


==============
تحديث

طبعا سي طاهر أفندي صاحب مدونة allfollowsome

ادانا بوأين حلوين في مدونته

هناك 58 تعليقًا:

أسوور يقول...

تصدقى يا غرام

كل كلمة كتبتيها انا حاساها جدا

انا ايضا مثلك لا اتخيل نفسى فى احضان رجل غير مصرى وغير زوجى الحبيب

هو دة شعور كل زوجة محبة عاشقة تجاه زوجها

تصفيق حاد لوصفك لمشاعر الحب بدقة

عاشقة لزوجى انا مثلك يا سيدتى

وكل ما ننقده من طبائع الرجال ما هو الا رغبة منا للفت نظره ان .. دة بيضايقنا .. عشان يغير القليل الوحش ويبقى على الجميل الحلو من اخلاقه

تحياتى

blue-wave يقول...

بالفعل
تصفيق حااااااااااااااد
ابدعتى فى وصف الرجل الشرقى المصرى
الذى تعشقه كل مصريه مخلصه
تحياتى

Tarkieb يقول...

يعني لما ربنا يكرمك وتيجي تفرحي الراجل المصري تعقديهم تاني ..طب هو اللي فرحان بالرجل المصري يجيب رشدي أباظة؟ هو رشدي اباظة فيه جين مصري اصلا؟ دة نصه ايطالي وعيلة ابوه اصلها كلها من ابخزيا...ولا يعني دا النموذج الكلاسيكي بتاع مهند بس صناعة محلية ومسترجل حبة وكان بيتجوز على روحه:::.
ولا احنا نفضل نغني للسمار وانه دمه خفيف وابن بلد واول ما نيجي في الجد نجيب واحد ابيض وجان سينما

إيمان قنديل يقول...

أسوور

يا آسور من غربتي الطويلة وأمعرفتي بكل الجنسيات العربيه وجدت أن الرجل المصري أجمل رجل بمعنى الكلمة،رغم كل عيوبه إلا أنه طيب وحنون ومحب لبيته وأولاده

ودمه خفيف زي العسل

إيمان قنديل يقول...

blue-wave



انا متعصبه للرجل المصري جدا

إيمان قنديل يقول...

Tarkieb


أولا أنت مصري صميم

مابيعجبوش العجب والا الصيام في رجب


ثانيا رشدي اباظم ايوه امه طليانيه


ومين فينا موش مخلط ولو دورت في الجدود حتلاقي واحد من هنا والا من هنا أصله موش مصري بس عاش على أرض وأصبح مصريا



ثالثا الأباظيه مصريين وعرب ولكن كانت العائلة مطعمة بزوجات تركيات ومصر كانت كلها زمان كده بحكم الدوله العثمانية


وبرضه أقول حتى لو كانوا موش مصريين فهم في مصر من مئات السنين ولهم حق المواطنه




أما موش عاجبك رشدي اباظه



ماتزعلش المره الجايه حا احط لك صورة أستفان روستي

غير معرف يقول...

لم أرى أمرأة جميلة مصرية حتى النخاع لاتحب الا ابن بلدها كما يحب المصرى الاصيل بنت بلده .. وتكتب كلاما أحلى من هذا

سيدتى احييك لاننى لم احس حرفا مما كتبتيه فيه رائحة مجاملة

تقبلى بالغ اعجابى واحترامى

kochia يقول...

بوست جميل
ومعبر ان ان الرغبة في الحياة الحقيقة هي الاكبر
وان كل النقد هو محاول للسعادة مش محاولة للتملص والخلاص ...

تحياتي

دنـيـا محيراني(ايناس لطفي يقول...

البوست جميل يا غرام ووصفك رائع كالعاده بس ياتري هل الرجل المصري بيعشق المراه المصريه كماهي تعشقه وكما انتي وصفته مش عارفه ولكني اشك
وبتفق معكي في البوست السابق واللي انتهجمتي عليه ان فعلا اغلب الرجال اندل وجدتي زمان قالت يا مأمنه للرجال يا مأمنه المياه في الغربال
بس نقدر نقول هو بوستك بيصالح القليل منهم هههههههههههههه
تحياتي

سمكه واحده يقول...

الله عليك ياباشا
طب وربنا باشا
بشاااا؟ باشااا؟


ايه ياعم الحلاوه دي
كلام تحفه
بس هما فين دول! ايوه دول جايين هنااااك اهم انا شيفاهم اهو عي مرمي البصر
(وش مطلع لسانه)
اصل احلي حاجه لما تلاقي واحد فيه الصفه وعكسها يخلي الواحد يتهبل ويتجنن
خلتني احب علي نفسي ياشيخه
حببتيني فيهم بسببك اه وربنا
والبلدي يوكل(وش بيغمز)

مصطفى يقول...
أزال أحد مشرفي المدونة هذا التعليق.
محمد عتلم يقول...

اشهد ان لا اله الا الله وان محمد رسول الله
ظهر الحق .. طهر الحق
الله اكبر الله اكبر
يعيش الرجل المصرى
ويعيش رشدى اباظه
ويعيش احمد عرابى
ويسقط الاستعمااااااااار
ولولولولولولولولولولوليـيـيـيـيـي
ياما انتا كريم يارب
ــــــــــــــــــــــــ
طبعا دى زغاريت الفرحه
ــــــــــــــــــــــــ
اخيرا ... والله وجه اليوم اللى بستناه من سنين طويله
وبعدين ايه الصياح ده يا غرام؟؟
بتصيحيلى على الملأ كده ؟؟
انتى عارفه انى عمرى ما ازعل منك بس ممكن اختلف معاكى فى بعض القضايا بس بترجعى فى الاخر تسعدينى بتفكيرك
بس عقابا ليكى على الصياح ده انا لازم اطلعلك فى الضلمه واخضك .. وعشان كده لازم تروحى على مدونتى وتتبعى التعليمات اللى فى البوست الجديد عشان تتخضى
وشكرا على الكلام الجميل اللى قلتيه فى حق الرجاله المره دى

nouna يقول...

كدة ترفعى معنويات الغلابة منهم
كلامك ووصفك رائعين وانا عن نفسى كان لايمكن اتجوز غير مصرى وراجل غير جوزى بالذات
بس فيه حاجة برضة مننسهاش ليه المصرى بيحب يتجوز غير مصرية وساعات كتير يقارن بين المصرية وغيرها مع ان المقارنة فى احيان كتير بتكون لصالحنا
شهادتى فيكى ممكن تكون مجروحة بس حاقولها انتى اكثر من رائئئئئئئئئئئئئئئعة

Heba Shehab يقول...

مين ده؟؟ إزاي وفين؟؟ الرجل.. والمصري
طب إزاي؟؟ بصراحة الكلمتين مش راكبين على بعض خالص بالنسبة ليا

محمد عتلم يقول...

انتى مش فى مصر ... انتى فين ؟

عين فى الجنة يقول...

جميل وجديد تعبير موشومة ، كأن الراجل وشم على جسد حبيبته لا يمحى وقد قيل لاتنسى المرأة اول رجل علمها الحب ويبدو انه قول فيه قدر كبير من الحقيقة

Hesham يقول...

بجد ياغرام انا قولتلك قبل كده فى تعليق سابق انك كاتبه تثرى الحياه الثقافية المصرية باسلوب جديد فى الكتابه كتابه جميله هادية ساخرة ماهرة فى نفس الوقت
ثانيا احمد الله سبحانه وتعالى انى مصرى وان النساء المصريات او فلنقل معظمهم ينظرون الى الرجل المصرى بنفس نظرتك والتى تدعو لهذا الرجل بالفخر والاعتزاز وانا اعتبر ماكتبتيه فى ظل هوجة الصراع بين الرجل والمراة على القنوات الفضائية بمثابه اعتراف نفس لنفسها باهمية الرجل وبما يحققة للمرأة هذا ان كان رجلا حقا كما وصفتيه
وعلى صعيد اخر فلتعلمى ان الرجل المصرى ذاته وهذا عن تجربه فعليه مهما سافر واغترب وتزامل وتصادق حتى ان عشق فانه فى النهاية لايحب الا المراة المصرية حتى وان تزوج بغيرها فيكون هذا الزواج لظروف خاصة ولكن حب لاأعتقد وهذا مايكرس لقول رسول الله (ص) ان اهل مصر فى رباط الى يوم الدين نعم حقا صدقت يارسول الله

غير معرف يقول...

بجد بووووووست جامد جدااااااا

ربنا يسعد ايامك

انا حره يقول...

تصفيق حاد انا كمان

كلام زى الفل والله

إيمان قنديل يقول...

Sherif

شهاده أعتز بها من كاتب رائع مثلك



احم أحم أخجلتم تواضعنا



kochia

الله على الفلسفه

كل النقد هو محاول للسعادة مش محاولة للتملص والخلاص


فعلا كتبت سطرين كلهم فلسفه

إيمان قنديل يقول...

دنـيـا محيراني(ايناس لطفي

كلامك حايخليني أعمل بوست مخصوص لنماذج عايشتها بالفعل من رجال مصريين تزوجوا بغير مصريات،وكانوا في منتهي السعاده ولكن بعد مرور السنوات أتغير كلامهم



ويكفي ان اقول لك أن أحدهم قال لي أنا زي اللي لابس ثوب مرقع




سمكه واحده


اه من شقاوتك يا أسكندراينه،شقاوه بريحه بحر أسكندريه وحلاوة البنات الأسكندرانيه



ايووووووووووووووووه

إيمان قنديل يقول...

محمد عتلم



يافنان أنا مقدرش أزعلك ابدا، وطبعا حا ازورك علشان أتخض شويه ما أشوف مين اللي حايخوف التاني


Heba Shehab

كده ياهبه


حتخليهم يقلبوا علينا تاني


والنبي المصري طيب وأبن حلال، بس الظروف هي اللي قرفاه،موش حانكون أحنا والزمن عليه، بلاش أحنا كمان نكسره

إيمان قنديل يقول...

nouna

ياحبيبة قلبي أنت



المصري بيتجوز غير مصريه لأنها موش بتكلفه زي بنت بلده

أو بيكون طمعان في جنسيتها، وبرضه بيلف ويرجع تاني للمصريه


بيحب نكدها


صدقيني ده كيف عنده


ههههههههههههههه

إيمان قنديل يقول...

راجى


الحكايه موش بس لأنه أول رجل علمها الحب لأ


صدقني في ترابط بين المصري وبنت بلده

عاملين كده زي نسيج الدانتيلا


قد أيه ناعم ورقيق ومتشابك قوي بحيث لو حاولت تشد فتله منه يبوظ كله



Hesham

دايما كده رافع معنوياتي ياهش ربنا يخليك

إيمان قنديل يقول...

ঔღঔ نـــوارة ঔღঔ

أشكرك يانوارة بلدنا ، بحب الأسم ده لأنه مصري قوي قوي



انا حره

أحني رأسي أمام التصفيق

د.مصطفى يقول...

عزيزتي غرام

لقد كتبت تعليق سابق وقمتي بحذفه رغم أنني لم أجد فيه مايسيء لك،وهذا يتنافي مع حرية الرأي والتعبير التي من المفروض تنادي بها مدونة جريئة مثلك وسأعيده ثانية لعلك تقومين بنشره

احببت فيك روحك المصرية الخالصة،وخفة دمك التي ألمسها بين سطور كتاباتك،وبما إنني رجلا مصريا فقد أنتشيت من هذا البوست الذي وصفتيه فيه حبك للرجل المصري في كل حالاته،فلم أجدك تجاملينه بل كتبت إنك أيضا تحبين صفاته السلبيه ولكنك تعشقين صفاته الجميلة التي من المفروض أن يكون عليها
لقد أشبعت غروري ياغرام
سؤال آخير وارجو ألا يضايقك
هل أنت متزوجة؟
فإذا كانت الإجابة بنعم فأنا احسد زوجك علي أمرأة مثلك تحمل كل هذا الكم من المشاعر الجميلة تجاه الرجل المصري،وأدعو لك بحياة سعيدة هنية
وإذا لم تكوني متزوجة فلتسمحي لي بأن أتقدم لك على سنة الله ورسولة، فإمرأة جميلة مثلك يسعدني أن أحظي بالقرب منها



ولك كل الحب والأحترام والتقدير



دكتور مصطفى

إيمان قنديل يقول...

دكتور مصطفي


لا أدري ماذا أقول لك فأنت محق فيما قلته عن أن التعليق كان مهذبا، وأعترف إنني قمت بحذفه، بصراحه لأنك بتطلب فيه أيدي،ربما أربكني التعليق لأنه طلب غريب وعلى الهوا مباشرة، وعموما أنا زوجه وام،وأشكرك على العرض

سمكه واحده يقول...

ياعم ياعم
الله يسهله
(وش بيغمز)
مش بقلك ياقمر بس خالي بالك بقي
(المصري اللي تبعك) يشوف الكلام ده(وش مطلع لسانه)
ليه حق والله انه يعجب
ده من الكلام امال لما يشوف الاصل بقي
ياحلاوه ياحلاوه
اللهم لا حسد
ربنا يسعدك ويجعل حياتك سعيده ويبارك فيكي وفي زوجك وولادك, يبختهم بيكي
ياللله اشمعني انا بقي مهي هاصت بقي جت عليا انا(وش مطلع لسانه)
مهو اصل كلامك يخبل العقل
ايووووووووه

إيمان قنديل يقول...

سمكه واحده

ياسمكتي الحلوه اللي بطعم السكر

المصري اللي بالي بالك بيعتبر أعجاب أي رجل بي هو عقاب لهذا الرجل
وش مقطع نفسه من الضحك

nouna يقول...

غرام
دلوقت زوزو جتعمل اية مع مصطفى هههههههههههههه طبعا بهرج
اسمحيلى انا مش شايفة تعليق مصطفى غير لائق باين انك اتخضيتى من العرض وغلبك حيائك واحترامك لزوجك بس كدة احسن ان الناس تعرف ان وراء غرام يقف رجلا استحق منها كل حبها وغرامها وحده
يارب يديم عليك الحب ويرزقك نعمة محبة الناس

إيمان قنديل يقول...

nouna

ياسلام عليكي يا أفنان، تصدقي أنا لما مررت تعليق الدكتور مصطفي،وبعدين لغيته، وبعدين أتكسفت من نفسي لما بعت لي تاني التعليق فنشرته،دار في رأسي إنني أصبحت زوزو 2 علشان كده فعلا أرتبكت
لإن بصراحه أول مره تيجي لي حاجه كده،وفعلا يانونا زوجي رجل جميل أخترته بكامل إرادتي وتزوجنا وكنا مازلنا ندرس في الجامعه وعلى فكره أنا كنت أشطر منه وأخدت البكالوريوس بتاعي قبله،وزوجي هو عشرة العمر وأبو أولادي أجمل ماوهبني الله في الحياة، والآن نسعى لتزويج أولادنا


علشان أفضى له ونبقى ناقر ونقير مع بعض،تعرفي ساعات لما أكون هاديه ومستسلمه وما بعملش شغب معاه
يرفض بشده سلوكي الجديد،ويقول لي لأ ماتعودتش عليكي كانه وساكته وغلبانه كده،بحبك مشاغبه وشرسه ومتذمره علشان بتعملي لي صخب في حياتي


والله الراجل المصري ده يجنن بلد بتناقضاته
بس هو في النهايه راجل جميل وطيب وحنون ومليان مشاعر حلوه
وبيحب بيته واولاده

soaad fakoory يقول...

غرام
بوست جيل جدااوزى الراجل المصرى ما
بيلف الدنيا ما بيرتحش الا مع مصريه
وان كانت اقل جمالا من بنات الخارج..لان
المصريات لهن عذوبه خاصه..
وانا عارفه ان رشدى اباظه.. كان فتى احلام المصريات..لكن كده بتكبرى نفسك..
وانتى لسه بيتقدملك خطاب..
مره تانيه كلامك جميل جداا..!!!!!!!!!!

Heba Shehab يقول...

طيب خلي رجل مصري كدة يكتب عن المراة المصرية وشوفي هايقول فيها ايه..
معلش اصل انا يمكن متعقدة شوية من تجربتي لمعاشرة ذلك الرجل المصري ومن نماذج كثيرة مرت أمامي لرجال مصريين ومواقفهم الغير نبيلة تماما مع نسائهم..
وعموما ربنا يباركلك في زوجك العزيز ونسأل الله ان يمنح باقي الرجال المصريين بعض من بركاته إن كان حقا كما وصفتيه..

إيمان قنديل يقول...

soaad fakoory


شوفي ياجميله أنا حا اكتب بوست عن نماذج عايشتها تزوجوا بغير مصريات او خطبوا غير مصريات وحا انقل أراءهم في البدايه وأراءهم لما اتغيرت


أما رشدي اباظه فكان قد ابويا وانا بأشوف افلامه بس بصراحه بحبه اعمل ايه؟
كان له كاريزما خاصه في كل أدوارهوأكتر واحد كنت بأحس انه فيه كل التناقضات المصريه

allfollowsome يقول...

يعنى والله مش عارف اقولك ايه

انا مش عاوز اقول ان الكلام ده هو الطبيعى بتاع اى راجل وقلة قلية شبة نادرة هى اللى ينطبق عليهم الكلام فى البوستات القديمة


هههههههههههههههههههههههههههههه

وبصراحة ومش غرور رجالة ولا حاجة دى اقل حاجة عندنا

p:

(:

حروف يقول...

ana 2reet el post but not make comment coz ilike it &nt found word 2 say i wont make comment say good so i not make acomment
i follow u since maksofa blog

إيمان قنديل يقول...

Heba Shehab

أنا عايزه اقول لك حاجه جوزي موش مثالي ولا حاجه ولا أنا مثاليه، وكل واحد فيه عيوب وأخطاء

ولما كتبت عن الرجل المصري قصدته كحاله موش زوجي انا بشكل خاص، ولكن جمعت كل حاجه سلبيه شفتها في ابويا وابني وأخوياوجوزي، وجمعت برضه الحاجات الإيجابيه وحطهم كلهم في نموذج حبيته وعشقته كنموذج كامل متكامل


مافيش حد مثالي على طول الخط

أنا كتبت عن النوذج المفروض يكون عليه الرجل المصري

الشكل اللي كان عليه وأتخلى عنه ربما بإرادته أو غصب عنه بسبب الظروف التي نعيشهاالآن

علشان كده بأقول أني نفسي الراجل المصري يكون كده يرجع لشهامة وجدعنه ورجوله جده ويتخلى عن السلبيات اللي ربما أكتسبها بسبب طبيعة العصر


وبعدين انا باكتب عن نموذج

لكن هذا لايعني التعميم

فيه مصري ندل

ومصري بخيل
ومصري مافيهوش شهامه ولا مروءه

ومصري سافل ومنحط

فيه نماذج سلبيه وغير جديره بالإحترام

وأراهم في كل مكان خاصة هنا في الغربه

وهؤلاء ايضا لايروقون لي مطلقا وأحتقرهم وليس معنى إنني احب الرجل المصري

أن تكون النماذج المشوهه منهم لهم عندي أستثناء لأنهم فقط مصريين

بل على العكس هؤلاء يسقطون تماما من نظري واشعر أنهم عار على المصريين وأنهم أكثر نماذج تسيء لهذا الشعب العظيم



أرجو أن تكون وصلتك الفكره


وتحياتي لك بعنف

دائما انتظر تعليقاتك ونقاشك الجميل معي

إيمان قنديل يقول...

allfollowsome

واد ياطاهر ما تغظنيش وتقول لي ده العادي لحسن ارجع في كلامي وماتلحقش تتهنى بالبوست


ههههه

إيمان قنديل يقول...

حررروووف


يا اهلا وسهلا بالشاعره الجميله



اشكرك

شجره الدر يقول...

غرام
الاسم غريب على ولو انى اشك من اسلوبك انك مدونه عزيزه على قلبى اختفت فجأه بدون سابق انذار
على العموم هى كانت تعرف ام المريله يبقى انا مش اش انا متاكد
هههههههههه
على العموم لو انتى هى اللى بالى بالك تبقى وحشتينى اوى اوى
ملحوظه
يحيا ابن البلد ويحيا رشدى اباظه
تحياتى

إيمان قنديل يقول...

شجره الدر

حبيبة قلبي أيوه أنا اللي هو انا



مكزوووووفه منك خالص


وحشتيني قوي أنت وأجدع واحد في الشارع وسماح اللي معدتش اعرف عنها حاجه


بحبكم

raspoutine يقول...

طبعا انا عرفتك وعرفتك من اسلوبك ومن وصفك ليا بالابن الغالى
وحشتينى
ودورت عليكى كتير
وكنت مستنيكى
الف حمد على السلامة
وشكرا لزيارتك
وادعيلى

Heba Shehab يقول...

عزيزتي غرام
أعتقد ان الفكرة وصلتني كده وفاهمة كلامك ومقتنعة بجزء كبير منه..
بس بصي أنا زيك برضه عايشة برة مصر من سنوات وللأسف نماذج الرجال المصريين هنا في هذه البلاد مختلفة تماما عن ذلك الرجل المصري الخيالي اللي وصفتيه أو كما قلتي تمنيتي وجوده في عالمنا... للأسف هنا معظم الرجال المصريين بيعتبروا نموذج غير مشرف للغاية.. وأحيانا الواحد بيخجل من كونه مصري لما بيشوف مواقفهم هنا مع بعض... انا على فكرة متزوجة من رجل مصري برضه وكنت طول عمري لا أتخيل اني ممكن اتزوج من جنسية أخرى ..بس للأسف حال الرجل المصري اللي هو عليه دلوقتي غَير مفاهيم كتيرة جدا عندي..وفكرة تقبل الزواج من رجل أجنبي لم تعد مرفوضة عندي.. ويمكن لما بنتي تكبر مش هاعترض ابدا لو أحبت رجل غير مصري وارادت الارتباط به.. المهم انه يكون رجل فعلا زي اللي انتي كاتبه عنه ده... مصري بأه والا غيره مش فارقة.

تحياتي ليكي

Ahmed Shokeir يقول...

شاعرية لاتستقيم مع التعميم ولكنها يبدو انها تنبع من مقارنة الرجل المصري مع قرينه من جنسيات اخرى عربية

لا أستطيع أن أرى البوست عنصريا من الناحية الجنسية كأنه تمييز للرجل عن المرأة ، ولا عنصريا من الناحية العرقية لأن البوست متعادل من ذكر المميزات والعيوب للرجل المصري ، ولكن دائما يحوّل الحبيب عيوب وسلبيات حبيبه إلى مميزات ويراها نقاط جذب ، ويبدو أنك أيتها المصرية الجميلة وقعت حباً في غرام الرجل المصري ، فتحولت عيوبه وسلبياته إلى صورة محببة إذا صدرت منه فأصبح حبيبيا واقعيا بكل ملامحه فلا يلغي تهوره وجهله وطيشه جماله لدى الحبيبة بل يزيده رونقا وبهاءا

معك أعدت إكتشاف الرجل المصري بعيون المرأة المصرية ، فلم تصبح تعميمات بوستاتك السابقة من نوعية كلهم أندال .. بهذه العنصرية

إيمان قنديل يقول...

Heba Shehab


عزيزتي المصريه المغتربه مثلي


انا معك أسوا صوره للرجل المصري هم الغالبيه العظمي الموجوده في الدول العربيه


دول عليهم سئاله وخسه ونداله محصلتش


لكن فيه منهم نماذج كويسه


تعرفي النوذج الكويس منهم سواء رجل أو أمرأه يهدوه ويساهموا مع الآخرين في إسقاطه لو كان عنده منصب


شاهدت بعيني الكثير من هؤلاء اللي بيعملوا اراجوزات ويشتموا في بلدهم اللي غلطت لما انجبت اشكالهم وعلمتهم


أما بأي الحب من جنسيه أخرى

فللحب سلطان

بس صدقيني بكره لما بنتك تكبر زي بنتي المولوده بره حتلاقيها برضه حاتروح مصر وتحب واحد مصري


بنتي رفضت تماما فكره انها تقعد هنا وتتجوز واحد موش مصري غصب عنها الدم بيحن

إيمان قنديل يقول...

raspoutine

ابني الغالي مرحبا بك في مدونتي ،بحثت عنك كثيرا حتى عثرت على مدونتك ، فأنت تعلم كم كنت أسعد بتعليقاتك عندي


تحياتي

إيمان قنديل يقول...

Ahmed Shokeir


هلا والله وهلا بالفنان المبدع احمد شقير

منذ زمن أفتقد تعليقاتك التي تحلل المضمون بدقة ووعي


اشكرك على الكلام الحلو ده أخجلتم تواضعنا، وليت الرجل المصري يخد باله شويه أن صفاته الجميلة التي تغيرت تفتقدها المرأة المصرية التي تحبه

عاشقة حبيبتى يقول...

صباح الخير

ينهار ابيض على الوان حرام عليكى يا غرام خلتينى اعشق الراجل وانا ضدة على طول الخط هتفسدى اخلاقى

بس بجد كل كلامك صح انا بعشق فى الراجل المصرى خفة الدم الا ربنا ما يورهالك على اى نوع تانى من البشر وبعشق حنيتة

قريت بوستك كذا مرة وبجد استمتعت بكلامك جدا

تحياتى وبلاش تحببينى اوى فى الراجل كدة

إيمان قنديل يقول...

عاشقة حبيبتى

حبيبتي عاشقة حبيبتي


والله فرحتيني أن كلامي أثر فيك لدرجة أنك أحببت الرجل وأنت ضده على طول الخط فهذا يعني لي الكثير، وهو إنني أستطعت أيصال المعني بشكل مؤثر ومقنع



يارب تلاقي واحد راجل بجد يغير كل مفاهيمك


وبحبك والله فأنت حقا إنسانه جديره بالحب والإحترام

إيمان قنديل يقول...

عاشقة حبيبتي


تعرفي فعلا الراجل المصري دمه فعلا خفيف زي العسل وعنده سرعه بديهه

تعالي نقارنه براجل عربي من جنسيه تانيه في الموضوع ده حتلاقيك لما تقولي قفشه عايزه تترجمي للراجل العربي انت عايزه تقولي ايه فطعم القفشه وحلاوتها تروح
تعالي قوليها للمصري يقوم مديك واحده انقح من اللي قولتيها


طبعا هناك فرق

momken يقول...

الله عليكى وعلى كلامك الرائع

لولا انك متجوزة مكونتش اترددت لحظه

بس ياله نصيب بقى
ههههههههه

كلامك يستحق ان يكون هو الوثيقه التاثيثيه لاى بنت جديد
كلامك عن الرجل فعلا مؤثر جدا وفريد من نوعه

وياريت كل بنت تقدر ابن بلدها بالشكل ده

الحقيقه انا كمان اعشق الفتاه المصريه حتى النخاع
واهيم فى مرحها وخفه روحها ودعابتها
وتحملها للمسئوليه وجدعنتها وجرئتها
وعشقها لحبيبها

اعشق كيانها المتحضر وروحها المعتقه بالقيم الشريقه

اعشق دلال المصريه ودلع المصريه ورقه المصريه وانوثه المصريه
واستغفر الله العظيم... جسم المصريه وفتنتها..وجذبيتها

واعشق دينها وتقاها ...وشرفها...وعفتها...وطهارتها....ولهفتها

لو كانت المراء المصريه فخوره لخلقها من ضلع رجلا مصرى
فالمصرى فخور انه ولد من جوف اراءه مصريه

دائما كلماتك تزيدنى احتراما لك

تحياتى

فكرة من الزمن ده يقول...

بوست جميل ياغرام
واكدلي على شخصيتك اللي قريتها من بين كلامك في البوستات اللي قبل كده
هو انت زي ما شوفتك بالظبط
البنت الرومانسية والست الجدعة بس اللي لسانها متبري منها شوية
ودمها خفيف
وده اكد كلامي ليكي قبل كده انه صفة الندالةاو اي صفة تانية عممتيها على الرجالة مش في محلها
الرجل الاب والاخ والزوج والابن والحبيب والعم والخال وللجميع في قلوبنا مكانة

ولا يمكنع وجود عيوب تزعجنا


عجبني اوي تشبيهك ووصفك للرجل المصري
وطبيعي جدا ان يمتلك الاسود والابيض الخير والشر لانه خلق من عجينة مشكلة من كل اصناف تراب الارض ونحن كذلك
تحياتي ياغرام

إيمان قنديل يقول...

momken

كلامك حلو ياممكن

بس أيه حكايه الناس اللي بتتقدم للزواج مني دي كل ده من الكلام اللي كتبته في البوست والله كويس ان البوست مؤثر بالشكل ده


اما بقي حكاية أنك كمان بتعشق المصريه ياريت تكتب لنا بوست تقول فيه الكلام ده

بناء على طلب هبه شهاب واللي علقت وقالت عايزه راجل مصري يكتب عن حبه للمصريه كنوع من التندر أو عدم الثقة في حب الرجل المصري للمرأة المصرية بشكل مؤكد، أيه رأيك إنك تؤكد لها أن الرجل المصري ايضا عاشق لبنت بلده؟


وبصراحه انا عايزه أعرف حا تكتب تقول أيه عن المرأة المصريه


والله الست المصريه غلبانه وبتعيش بس لو جوزها أداها شوية حب وحنيه حاتنسى كل صعوبات الحياه


لكنها بتقلب الدنيا نكد لما تلاقيه مديها الطارشه

إيمان قنديل يقول...

فكرة من الزمن ده

كل وصفك لي في التعليق صحيح


بجد أنا لساني مفلوت شويه بس والله مكنتش كده زمان ، لكن الشغل والإختلاط بالناس خلاني أبقي كده كنوع من الحمايه الذاتية وأنذار للأخرين للوقوف عند حدودهم


تحياتي

يا مراكبي يقول...

وأنا من خبرتي أحب أصرح وأعلن وأقول إن البوست ده مجرد "َجَرِ رِجل" بس وتخدير مؤقت وتهدئة للعب وبعد كده هنلاقي بوست فيه ضرب مرة تانية

ههههه

خشي على بوست الضرب على طول

micheal يقول...

شوفي يا غرام...أنا لا متجوز ولا ناوي أتجوز ولا عمر كان في حياتي حب حقيقي بس مش عارف ليه كلامك شكله داخل دماغي
:)
حاسس فيه بالصدق وده أهم شيء عندي أي كان بقي العيوب أو المميزات اللي في الراجل المصري أو غيره
:)
الصور حلوة موت وعاملة جو للموضوع
تحياتي

إيمان قنديل يقول...

يا مراكبي


مشكله أنت يامراكبي، طيب أعمل أيه وأنت فاهمني كده

عموما البوست الضرب حاينزل حالا

إيمان قنديل يقول...

micheal

ليه يابني موش ناوي تتجوز دا الجواز نص الدين


بكره تغير رأيك لما تلاقي اللي حاتحبها