الأربعاء، أبريل 01، 2009

بورصة عرسان زوزو



زوزو هي صديقتي الأنتيخ،والتي اعتبرها أختي التي لم تلدها لي أمي،وهي انسانة طيبه جدا ومسالمة جدا جدا،وقد وهبها الله خفة دم غير عادية ،إلا أنها وطوال سنوات عمرها لم تهنأ بزواج سعيد،فقد جربت حظها مرتين وفشلت،ورغم أنها لم تعد صغيرة في السن(وطبعا حاتضربني لما تقرا البوست)إلا أن الخطاب مازالوا ينهالون عليها من كل حدب وصوب، ولأنني أحب الصديقات اليها فدائما تطلعني على أحدث المستجدات في حياتها،وعلى النت دارت بيننا تلك الحوارات على مدار شهر مضى

1

زوزو : عايز أخد رأيك في حاجة ؟

انا: خير

زوزو: جاي لي عريس مكعبر وقصير ولابس نضاره كعب كوبايه بس غني وبيشتغل مقاول وهو من المنصوره.

أنا:طيب يعني بعد المقدمه دي بتاخدي رأيي في أيه؟وبعدين أنت لسه عايزه تتجوزي؟

زوزو: أعمل أيه يا أختي بقيت فزززززززيعه فززززززيعه كل ما أكبر أحلو، والعرسان صفوف صفوف،وبعدين أيه أنت لسه عايزه تتجوزي دي؟
هو أنا حا اتجوز علشان أجيب عيال،أنا عايزه راجل ينغنغني.

أنا : طيب على البركه ماهو عريس غني أهو أديها، اتكلي أشارتك خضرا، بس أنا عايزه اعرف بتجيبي العرسان دي منين كل يوم والتاني؟


زوزو: ابدا وحياتك هما بيجوا كده لوحدهم،جالي وطبعا لابس لبس عجيب لابس شيرز هاي كول موش بلوفر سعادتك، والهاي كول خانقه رقبته ومقصراه أكتر ماهو قصير،ولابس جزمه بكعب كوبايه


أنا :هو لسه فيه جزم بكعب كوبايه؟

زوزو : بصراحه أنا شاكه أنها تفصيل، والمشكله أن مقاس رجله تقريبا 35 وانا مقاس رجلي بتاع 42 كده

أنا: الراجل مايعبوش الاجيبه ؟

زوزو:ماهو على حد كلامه غني، عنده أملاك في المنصوره وشاليهات في راس البر وأرض في حدائق الأهرام،وفيلا في العبور،وشقتين في المعادي،وشقق في المقطم.

أنا:طيب هو متجوز؟

زوز: ايوه وعنده بنت وولد، بس هو مطلق مراته؟

أنا : مطلقها ليه؟

زوزو: بيقول أنه كان كاتب لها حاجات ونصبت عليه وباعتها، وعلى طول عايش دور انه غني وكل الناس طمعانه فيه وكده.

أنا: ممكن يكون كداب،المهم ماتتسرعيش وشوفى الأول إذا كان كويس والا نصاب؟

زوزو:ماهو اصر يعزمني على أكلة سمك في المكتب عنده وهو اللي طبخه بنفسه.

أنا: فعلا شكله غني سمك أيه اللي في المكتب وحايطبخه بنفسه؟

زوزو: رحت ياحبيبتي لقيت مكتبه في حته بيئه وتقرف،وكان مفهمني ان المكتب تمليك،عرفت من واحده عنده المفروض انها السكرتيره أنه بالأيجار،وجوعني يجي 4 ساعات لحد ماطبخ السمك،فكرني بنور الدمرداش في فيلم صغيره على الحب،وطبعا يعني قلت أن أول اكله سمك من عريس عامل نفسه غني أكيد حاتبقى جمبري وأستكاوزا وحاجات كده، لقيته عامل سمك بلطي وبربوني.

ومره تانيه عزمني على بط برضه في المكتب،وقال لي شوفي ده بط بالبرتقان محدش بيعرف يطبخه غيري،وبعد ما غسلت ايدي أداني كولونيا احط منها وكانت مريعه،قلت له أيه دي؟دي كلونيا وحشه قوي؟
فأستنكر كلامي وقال لي دي من فرنسا

أنا: فرنسا، تلاقيها من الحرم الزينبي ، والا شكله كده بيستعمل أسنس شاديه


زوزو: ومره جه خدني من البيت علشان أروح أقعد معاه في المكتب

أنا: هو مابيعرفش يروح حتت تانيه غير المكتب / بيخاف يتوه في القاهره والا أيه؟

زوزو: المهم جه وراكب عربيه ماتريكس،فقلت له أيه العربيه الحقيره دي؟

فقال لي الماتركيس حقيره؟قلت له مع الثراء الفاحش اللي انت واهمني بيه تبقى حقيره،فرد عليه بكل حسم لعلمك دي عربيه هارد ورك وانا كل سنه باغيرها وأجيب الموديل الأحدث،المهم رحت المكتب وبرضه قلت له أيه المكتب الحقير ده ما تجيب حد ينضفه، والغريبه انه أخد الكلام بصدر رحب، وسألني تحبي أجيب لك ايه من المنصوره وأنا جاي؟

قلت له متشكره موش عايزه حاجه وقعد يحلف ايمانات العظيم وانا مصره اني موش عايزه حاجه راح في الآخر قال لي خلاص حا أخلي اختي تجيب لك سمان، وحا اجيب لك بسبوسه، طبعا أنا بعد كده رفضت ارد علي تليفوناته من أصله

2
زوزو: جالي عريس رجل أعمال كويس ومحترم ومثقف

انا: وطبعا عايز يتجوزك على مراته؟

زوزو: ايون

أنا : مالها مراته مكسحه ولا عاميه؟

زوزو:هو وعيلته معاه جنسيه كنديه،ومراته جالها حالة تدين على طول قاعده في الجامع وبتلبس نقاب وبتعتبره كافر،ورافضه أنه يقرب منها ابدا

أنا: اعوذ بالله كافر ليه؟

زوزو: معرفش مع أنه راجل شكله طيب ومهذب ومثقف جدا، قعد يفهمني اسباب الأزمه المالية بالتفصيل الممل

ماطولش عليكي هو صلته بمراته شبه منعدمه بس خايف يطلقها تاخد نص ثروته زي القانون مابيقول عندهم هناك،وبصراحه انا قلت له أنت رجل أعمال وغني وممكن تصاحب ايه اللي يجبرك تجوز، فرد انه مابيحبش يغضب ربنا، وقال لي أنا حا اتجوزك بس جوازنا يبقى سر مراتي ماتعرفوش،وحا أخد لك شقه وأجي لك يومين في الأسبوع وأديكي 5000 جنيه

انا: عرض كويس اهو كانك شقه مفروشه

زوزو:طبعا أنا قلت له طيب والشبكه والمهر

انا: يخرب عقلك هو انت لسه عايزه شبكه ومهر

زوزو: طيب على الأقل ابيع عربيتي ويكمل لي عليها واجيب عربيه جديده




3

زوزو:جالي عريس مصري معاه جنسيه أمريكيه

أنا : تاني

زوزو: لأ وعنده شقق في دبي بيأجرها

أنا:ووقعتي عليه منين ده؟

زوزو: من النت ياحياتي،وخلاص أتفقنا حايجيب لي شقه في حدائق الأهرام وخاتم هدية الجواز

4



أنا: اخبار العريس بتاع امريكا أيه؟

زوزو: لا جاب شقه ولا حاجه دا عايز يرمي جتته عليه ويقعد معايا في شقتي، وجاب لي خاتم دهب حقير، فنفضت له فورا بلا علل

5


زوزو: جالي عريس بس أصغر مني بحوالى 10 سنين

أنا : موش مشكله عادي موش هو اللي عايزك؟

زوزو:مسكين مراته عيانه ومابيقدرش ينام معاها،وهي نفسها قالت له روح أتجوز

أنا:طيب وأيه المشكله؟

زوزو:قال لي حا اعمل وأجيب وأسوي وفي الآخر برضه طلع بيرسم أقعده معايا في الشقه،وبعدين ابن الكلب جاي يزورني اول مره جايب في ايده نص كيلو لقمة القاضي، طيب يخليهم كيلو والا اتنين،فعلا حقير

أنا: ياشيخه أعقلي بأي جواز ايه اللي لسه عايزه تتجوزيه؟

زوزو: ملعون ابوهم أوساخ، أنا لاعايزه اتجوز ولا زفت، انا خلاص بند الرجاله مسحته من حياتي من زمان وطلعتهم من راسي أصلا،أنا لسه فيه نفس أجيب راجل يقرفني بلا وجع قلب

أنا: امال ايه العرسان دي كلها اللي انتي شغلانا بيهم

زوزو: يابنتي انا بحب أشوف سعري في السوق ولسه فيه طلب عليه والا لأ، وبحبهم كده رايحين جايين، أهو بأتسلى على غباءهم


انا: طيب يابورصه هانم أياك وحذاري تدخلي على النت وتقول لي جالك عريس تاني، حا اعمل لك بلوك من أصله


زوزو : كده يا أختشي هو انا لي حد غيرك أحكي له



=============
تحديث

بأقول لكم أيه خلوا بالكم من زوزو دي صاحبتي وأختى وهي أمرأة بمائة رجل،عاشت حياتها تكافح في الحياة من اجل لقمة العيش وواجهت الحياة وحيدة دون سند، لكن الله أكرمها لطيبة قلبها وحسن نواياها

===========

والوحيده في الدنيا اللي بتقدر تستحملني
فعلا هي الصديق الصدوق بالنسبه لي
ومن حقها تعيش حياتها وتتزوج على سنة الله ورسوله طالما أنها عانت الأمرين في زيجتين فاشلتين لم توفق فيهما


هناك 82 تعليقًا:

اسامه عبدالعال يقول...

oops

اسامه عبدالعال يقول...

بصراحه مكنتش عارف اكتب ايه بس كده كتير هيا ليه مبهدله نفسها المفروض انها اكتسبت خبره يعنى مش صغيره

وبعدين واضح انها بس عايزه فلوس مش عايزه راجل وده سبب ..... للجواز


بقلك ياغرام مينفعهاش واحد عنده 28 سنه

وسيم وسمارت وشبه الان ديلون

allfollowsome يقول...

هههههههههههههههه

لازم الرجالة هم اللى يكونو وحشين برضه

وبالمناسبة ردك على فى البوست اللى فات موتنى من الضحك بجد لانه مستفزنيش زى مانتى قلتى انا كنت بقول وجهة نظرى اللى شايف فيها ان الموضوع تحامل على الرجالة اكتر منه حيادية

يعنى انت عاوزة تقنعينى ان كل الرجالة ولاد كلب انجاس مفيش منهم رجا ايه مبقاش فيه رجالة كويسين ابدا

انا مستنى منك بوست عن رايك فى الراجل المثالى وايه المتطلبات اللى المفروض تكون موجودة فى رجالة اليومين دول وانتى شايفاها مش موجودة نورينا وقوليلنا احنا الصنف الغريب ده ناقصنا ايه

عاشقة حبيبتى يقول...

عزيزتى غرام

هى صديقتك كل العرسان جيباهم من النت وكل الا على النت من عرسان عايزين جواز مسيار يعنى حد يدفع ويشيل على اساس راجل ولا ظل حيطة

قوللها دورى على راجل مش عريس او تقفل وتكتفى مدوباهم اتنين


تحياتى دمتى بخير

انا حره يقول...

هههههههههههههههه

عاوزه اقول تعليق سخيف قاله هنيدى مره فى فيلم بس بما انها صحبتك هحتفظ بيه لنفسى بقى وامرى لله

fashkool يقول...

يا سلام يا غرام
عارفه .. انا باندم انى طلعت راجل لو الواحد كان طلع ست كان زمانه اغنى اغنياء الارض واعمل زى زوزوا وكل يوم اتجوز واحد واشطب عليه وغيره وهلم جرا والآخر الواحد ينفض للرجاله بعد ما ياخد فلوسهم

عارفه النهارده 1 ابريل

هو البوست كدا برضه ولا ايه

micheal يقول...

مش بقتنع بصراحة بطريقة الجواز دي
انصحيها تستني ومسيرها حتقابل نصيبها اللي يعوضها خير بإذن الله
تحياتي لكي ولصديقتك زوزو

يا مراكبي يقول...

أنا فاكر إنك كتبتي بوست قديم عن صديقتك دي مرة زماااااان .. مش كده؟ لو لم تخني الذاكرة كانت قعدت مرة في كوفي شوب مع زميل بيشتكي من مراته برضه وكانوا بيشربوا شيشية .. مش فاكر بالظبط

أحلى جملة خلتني أبتسم أكتر هي التحديث اللي في الآخر .. حسيت وكأنك بتحذري بالويل والثبور إن أي حد يلبخ بالكلام عنها وألا حاجة ... هههه

بس بجد فكرة إن الواحد يعرف سعرة في السوق من زمن لآخر .. فكرة جديدة

soaad fakoory يقول...

صاحبتك لسه مطلوبه وسعرها معقول
العرسان اللى بيتقدمولى حالتهم الماديه
اقل كثيرااومحتاج خمسين قرش علشان الميكروباس من مصر الجديده للعمرانيه
انا بحسدها!!!!!

سمكه واحده يقول...

شوفي زوزو دي عسل عسل عسل طلما هي صحبتك
طب اه وربنا وشكلها دمها زي العسل هو انتي هتعرفي حد اي كلام يعني؟


انا فهمتها وعارفه انها مش في دماغها الجواز ولا حاجه بس هي زي مابتقول اي ست في الدنيا ديما بتحب تعرف اد ايه هي مرغوب فيها دي طبيعه الستات انها تحس بالاهتمام وانها مازالت مرغوب فيها
بس معرفش تفكير الرجاله غبي كده ليه
طبعا الا من رحم ربي
بس كله كوم والراجل العفش اابو نص كيلوا لقمه القاضي ده والله اللي يعيش ياما يشوف هو مش معني كده انها ماديه او بتبص للفلوس اوالماديات بس
في حاجات تفقع بجد واشكال فظيعه
دي مجرد ذوقيات من اللي متهبب علي عين اهله وجي وده بيبقي مأمه جتتهم الهم ابو لقمه القاضي ال
مره واحد جاب لصحبتي كيسين لب وهو جي
عشان كانت بتحب اللب بس جابوا ابو ربع جنيه وللعلم كان مقتدر
اوحش حاجه البخل والغباء والجليطه
ربنا يكفينا شرهم

mostafa rayan يقول...

معلش بس واضح ان صاحبتك دي طماعة
قوي
هي مش عايزة زوج وبيت وحياة واسرة دي عايزة بنك متنقل في صورة رجل
واضح ان نيتها وحشة علشان كدة ربنا دايما بيبعتلها الاشكال دي
وقديما قالو
( طمعنجي بناله بيت فلسنجي سكنله فيه )
ارجو تقبل رايي
وتحياتي لك

حياة يقول...

خلى بالك من زوزو ها كدبة ابريل

تحياتى

قيس بن الملووووح يقول...

انا حاسس كاني قريت جزء من سيناريو فيلم كوميدي.

غير معرف يقول...

ازيك يا ست غرام


بشري للست زوزو
الفشل ليس من الازواج و لكنه في نافوخها هي
اشكال مختلفة من البشر يتوددون اليها لا يربط بينهم اي شئ حتي نظن انها تملك مقياس معين لمن تريد الاقتران به
مرة غني و معفن و مكعبر و مره متزوج و خواف و مرة عيل محتاج لمامته الخ
تعرفي اذا لقيت اى شئ مشترك يمكن ؟ بس اللي في نافوخها و احد مريش تنتف ريشه
و صدقيني بكرة تحكيلك علي عرسان جدد
اللي فيه داء
و ايه معني سعرها في السوق ايه هو ممكن الستات تفكر بالشكل ده
اسف انا حاسس اني ساذج و الا دي كذبة ابريل

الله يعينك علي صحبيتك

تحياتي

momken يقول...

هو من الواضح ان زوزو هى سبب عنوسه البنات فى مصر

ماهى كل العرسان متحولين عليها

والبنات البكر بقيت بايره ومحدش معبرهم

وبعدين يعنى زوزو فى سن النضج زى ما فهمت مفروض انها بقت غنيه بعد العمر ده كله

عاوزة فلوس تانى ليه

هى تدور على واد ابن بنوت.. يرجع ليها شببها ويعيشها يومين

وتسيبها بقى من الرجاله الكسر دول وتغير السايت الى بتدخل عليه فى النت

وبعدين انا اول مره اعرف ان السمك بيتعمل فى البيت...هو العريس المكعبر ده ساكن فى العشوائيات ولا ايه...وهو لسه فى حد بياكل سمك بلطى؟؟؟؟ امال الهامور بيعملوا بيه ايه بيناموا معاه؟؟؟؟؟!!!!!

شوفى انا هعمل لزوزو ديسكونت وهاخد منها تلتميت الف دولار بس واتجوزها سنتين بدل من اسافر اوربا


بهزر
مع خالص احترامى لصديقاتك الجميلات فقط


تحياتى

أسوور يقول...

ضحكت ضحك يا غرام .. وقعت من على الكرسى من الضحك.
اهى دى ناس فاهمة فى الرجالة واصنافهم.
اى راجل من دول اول ما يقابلك يقولك انا غنى .. انا جامد .. انا جدع .. انا مراتى وحشة معايا .. انا مراتى عيانة .. انا مراتى عندها استبحث وبرى برى وبتاكل المشابك

الكلام دة سمعناه كتيييييييييييير .. والهبلة هى اللى تصدقه

راجى يقول...

غلبانة والله حظها وحش الست دى
الغريب ان اهم حاجة عند الست العازبة انها تتجوز واهم حاجة عند الست المتجوزة انها تقرف جوزها ، ليه كده ؟:)

Mohamed Hamdy يقول...

انتى جبتى المفيد من اخر كام سطر يا غرام

هى مش عاوزه جواز بقدر ماهى عاوزه تعرف الطلب عليها . ده كويس فى حد ذاته بس مش عارف ليه انا احتقرت كل العرسان اللى اتقدمولها

تحياتى ليكى .. وبعد كده هركز لو جت واحده اسمها زوزو تقولى عندك عربيه موديل كام :)

سلام

Hesham يقول...

قصة لطيفه واسلوب بسيط جميل بس بقولك ايه انا متهيألى ان الموضوع بقى معكوس دلوقتى يعنى الطلب على الرجاله هو اللى زاد وسعرهم ارتفع بس عارفه ليه ؟ لان الرجاله شحه من السوق وانا اقصد الرجاله الحقيقين مش رجاله البطاقة وبس اظنك فهمتى قصدى

محمد عتلم يقول...

خليها تتجوز .. ايه المشكله
مدام لسه عايزه تتجوز خلاص تتجوز بس جواز بجد مش كده وكده
وبعدين انتو منفسكيش تكتبى ربع كلمه حلوه على الرجاله بأه ولا ايه؟ كلهم منيلين اوى كده ؟؟ والله احنا فينا الغلابه والحنينين والطيبين والجدعان وفينا برضه ولاد.....؟؟

Desert cat يقول...

يانهار اسود هى زوزو دى منتشرة اوى كدا
اصلى وقعت من فترة كدا فى زوزو شبه دى بالظبط وكانت كل يوم تقول اتقدم لى عريس ومتريش وغنى وابن ذوات بس فيه عيب واحد انه اصغر منها بحوالى عشرتاشر سنة كدا بس مش مشكلة فرق السن ده مش مهم خالص هما هيتغلبوا عليه
وكل يوم عريس مختلف وخطيب اكثر اختلافا بس كانت عبيطة حبتين تلاته وبتصدق وكان كل واحد فيهم يديلها الخذوق التمام ويجرى ومش بتحرم برضه علشان تعرف ان الطلب عليها لازال موجود لذلك عليها استحمال الخواذيق
فى الاخر يااوختشى الواحد ليه مرارة واحده ومش استحملت زيك كدا وقولت يا فكيييييييييك بلوك وديلت من الحياة كلها مش من الماسنجر بس
ربنا يعينك على زوزو ويشيفهم قادر يا كريم اصل فى نوع كدا كل لما بتكبر كل لما بتجنن وبتتخيل نفسها انها لسه نوغة
محبتى يا احلى غرام

soly88 يقول...

زوزو دى دماغ زى الفل
هى بتحب الحياه وعايزه تعيشها
وبتعرف تكنسل الرجاله اللى مش قد كده
يعنى ما يتخفش عليها
وربنا يوفقها لواحد يفهمها كويس

*SosSoOo* l'o'l يقول...

بصي يا غرام ... انا هاقولك نصيحة تقوليها لصاحبتك م الآخر...

هي لو عاوزة تتجوز .. يبقى هي اللي جابته لنفسها ... بس الاحسن تدوس ف الموضوع ده على طول ... والاختلافات بين كل راجل والتاني بسيطة ... المهم تتأكد انه شغال في السرير .. والباقي كله يهون .


لو هي عاوزة تشوف سعرها في السوق ... قولي لها كفاية لحد كده استبيان ... لانها دلوقتي ليها سعر

لكن الاحباط هيبدأ لما ميبقاش ليها ليها سعر ... هتعمل ايه ساعتها ؟؟؟؟

يبقى الاحسن تبطل تسعيروتشوف واحد مسعور في السكس وتتكل على الله.

mohamed ghalia يقول...

ربنا يسعدها ويسعدك
دمتِ بكل الود

مثلية تبحث عن ذاتها يقول...

طبعا التعليق ده لزوزو يا غرام
اقولها العرسان اللي بيتحدفوا دول كلهم كسر و انتي اكيد مش اللي هيتمنك راجل دول كل اللي قولتي عنهم متخلفين ينفع واحد بيطبخ سمك فالمكتب يتمنك؟؟؟
كيد انتي اغلى من كده بكتير
انتي ممكن يكون عندك شويه نقص مشاعر و كلام حلو او احتياج لحد جنبك بس عمر ما ده هييجي عن طريق النت ولا من عريس شبه البطيخه من بره و من جوه مجوف
حبي زوزو اكتر من كده و اعرفي قيمتها
عرام بتقول انك صديقتها الصدوق عارفه ده معناه ايه
انك انسانه قيمه جدا لأن صعب الانسان يحط حد في بند صديق الصدوق ده الا لو هو انسان جميل بكل المعاني


تقبلي كلماتي ولك كل تحيه
غرام ربنا يخليكم لبعض و خلي بالك عليها

nouna يقول...

غرام
حقيقى زوزو دمها خفيف واهى بتسلى نفسها بس هى محتاجة راجل بجد (واخدة بالك من راجل بجد دى ) يؤنس وحدتها ويملا فراغ حياتها مدام لسة تتمتع بروح شابة ومظهر شاب ايضا ,مقدرش الومها وحدها على فشل زيجاتها بس اقولها بالعقل خصوصا انها دماغ

فكرة من الزمن ده يقول...

زوزو دي دماغ بجد
الدنيا مش بس انها تدور على عرسان اه صحيح الزواج شيء ضروري
لكن اكيد هي جربت
وعارفة بتحاول تاني ليه بقى
نصيحتي ليها لو بتدور عن الزواج لمجرد الزواج في مواقع كتير علىالنت
اما لو بتدور على الحب
فالحب الحقيقي لا نبحث عنه لكن هو اللي بيبحث عنا ويلاقينا
تحياتي وخلي بالك من زوزو

أسوور يقول...

يل بنتى فى واحد اسمه بسطاويسى داخل عمال يغلس ويشتم ومش عارفة اعمل معاه ايه؟

غير معرف يقول...

انا رايي ان القناعة كنز لا يفني , و العجز عن الادراك ادراك
وهنيالك يا فاعل الخير والصواب
وخدها مني نصيحة صريحة وسيبك من اللي موجود في الصفيحة
............... وعجبي
الامضاء :
عضو الجناح العسكري لمنظمة اديني في الهايف وانا احبك يا فننس

Barracuda يقول...

أهلاً وسهلاً يا ست الكل.. تأخرت عليكي فترة طويلة- إنشاغالات الحياة تأخذنا بعيداً أحياناً... ولكننا حتماً يجب أن نعود في وقت ما

عندما قرأت قصة صديقتك زوزو .. تذكرت عدة نماذج قابلتها لنساء - لا يعيبهن شيء في الظاهر - وحققن مراكز اجتماعية ومادية جيدة بالكفاح والعمل الجاد في رحلة الحياة ولكنهن تعيسات في حياتهم الشخصية : زيجات فاشلة - وحدة - بدون أطفال - تعاسة دائمة في الظروف العائلية - رغم المركز العلمي والاجتماعي الجيد

والمشكلة أنه بعد سن معين.. لا تتحصل هؤلاء النسوة على - فرصة جيدة - في عالم الرجال -- في الغالب يتقدم لها رجال أقل ما يوصفون به أنهم " كسر " ناهيك عن -النصابين - والمرضى النفسيين - الذين يظنون أن حاجتها للزواج والارتباط من أجل الونس ومكافحة آثار الوحدة - سوف تطغى على عقلها وفطنتها وبصيرتها
وفي النهاية تبقى وحيدة إذا كانت ذات فطنة أو ينتهي بها الحال بالارتباط برجل تتمنى معه لو ظلت كما هي - ولكن في النهاية قد يغلب عليها المثل الشعبي: ضل راجل ولا ضل حيطة

تحياتي المعطرة

الشنكوتي الكبير يقول...

يا لهوي
هو العرسان بقت تشل كده ليه حتى لى مستوى الأحتراف
صاحبتك دي محترفة عرسان يعني تنفع تشتغل خاطبه
وهتبقى ناجحه قوي لأنها بتجيب نفس عينة العرسان بتوع الخاطبه فقري ومعفن وكداب
بس اقولك حاجه دمها خفيف جدا
شخصيتها من الشخصيات اللي متقدريش تبعدي عنها
حتى لو عندك اعتراض على تصرف ليها او حاجه بتعملها بس تفضلي برده مرتبطه بيها
والسبب ان الناس دي بتبقى تعبت قوي في حياتها وانتي عارفه ده وعقلك بيحكم لها بأن حقها على الدنيا والناس انها تاخد حقها شويه بقى حتى لو حد معجبوش الحال مش مشكله

سلميلي عليها بقى
سلاااااااااااااااااااااااااااااام

afew good men يقول...

زوزو مش نفسها تكون ام

زوزو خلاص زهقت من اصنف اللي طمعان فيها وفي شقتها

حتفضل تحلو لحد امتي يعني 45 سنة

طاب بعد كدا ايه الحوار

هي زوزو فاهمة كويس هي عايزة ايه

ولا طلعت من تاربها ان الانسان ايه غير فلوس

والحب وهك طمبير

والجواز كلمتين في السرير

واضح ان خلفية مدام زوزو عايزة تعديل

لان بجد ممكن حد ينغنغها وفي نفس لوقت يضحك عليها من كلو

بس في نصيحة بلاش تدور في النت

ممكن تنزل شرم او الغردقة او اي كازينو بيستضيف خليجين وافتكر حتلاقي اللي ينغنغها وهو زي الحمار ومش فاهم حاجة

عموما دي سياحة موجودة

زوزو بيتنصب عليها وسعرها في السوق اكلة سمك


عموما شوفيها تقبل عزومتي علي ضاني او حتي داندي

انا شايف الموضوع كومدي فبصراحة مبتسم وكويس اني فكيت من البوست اللي فات

GHARAM يقول...

اسامه عبدالعال

اولا هي موش مبهدله نفسها كما اعتقدت بالعكس العرسان بيجوا لحد عندها لأنها تعمل في مكان يتيح لها التعرف بناس كثيره جدا

والعرسان اللي بتيجي غالبا هي بترفضهم لأنهم موش بالمواصفات المطلوبه



ثانيا

طلب ابو ثمانيه وعشرين سنه مرفوض بشدهحتى ولو كان شبه آلن ديلون ولو سألتها حاتقولك انا ماما يابابا ماينفهش

GHARAM يقول...

allfollowsome


مين اللي قال أن الرجاله وحشين

يا ابني دول النص الحلو وكل دي مناغشات بيني وبينهم


معاكسه ومشاكسه يعني


وأوعدك ببوست فيه صفات الرجل اللي لسه ما تخلقش

ههههههههه

GHARAM يقول...

عاشقة حبيبتى


على فكره هو واحد بس اللي من النت والباقي من خلال الأصدقاء والشغل


وصدقيني أنا حفظاها هي موش ناويه تتجوز ولا حاجه هي اتعقدت أصلا من الصنف

GHARAM يقول...

انا حره

قولي ولا يهمك

GHARAM يقول...

fashkool


ياعم فاشكول انت يعني شايفها اتجوزت حد ، ماهي قاعده أهي بتغني ظلموه



ربنا يخلي لها بنتها عروسه زي القمر حاطه كل أملها فيها

GHARAM يقول...

micheal

نصيب ايه يامايكل، نصيبها في الجنه إن شاء الله

GHARAM يقول...

يا مراكبي

ايوه هي صاحبتي اللي كتبت عنها بوست قبل كده


وبعدين التحديث جاء بعد مالقيت ان المعلقين بدأوا يلبخوا مع أن الموضوع فاني ليس أكثر

GHARAM يقول...

soaad fakoory

هي فعلا مطلوبه،وبجد بأحس بأن الدنيا لسه بخير لما الاقي كل العرسان دي جيه ليها

GHARAM يقول...

سمكه واحده

شفتي أنتي الوحيده اللي حللتي الشخصيه صح، حكاية الهدايا دي مهمه في بداية التعارف،لأنها بتدل إذا كان العريس بخيل رمه والا كريم وجدع، بس فيه رجاله كتير مابتفهمش الموضوع ده


وبمناسبة اللب فيه بنت في العيله عندنا لما فسخت خطوبتها وردت الهدايا أشترت كيسين لب وأدتهم ليه علشان ترجع كافة متعلقاته

GHARAM يقول...

mostafa rayan

تحليلك موش مظبوط، هي لاطماعه ولا حاجه، وكمان بيت وأسرة أيه، هي عندها بدل الشقه أتنين، وموش محتاجه فلوس، هي ترغب في رجل يستطيع أن يعوضها سنوات عاشتها بائسه في زيجات فاشله،لم تقيم ابدا أصحابها ماديا بل كانت هي التي تنفق عليهم


صاحبتي جدعه بس حظها وحش

GHARAM يقول...

حياة

زوزو الحقيقة الوحيدة في زمن الكذب

GHARAM يقول...

قيس بن الملووووح

كويس أنه وصلك كده ، لأنها بصراحه دمها خفيف جدا ولما بتحكي المواضيع دي بتحكيها بطريقه ساخره تهلك من الضحك

GHARAM يقول...

غير معرف

صدقني عمرها ما فكرت بطريقه ماديه،وتزوجت مرتين عن حب وكانت هي التي تنفق على نفسها في الزيجتين، ولكنها تحولت الى الرغبة في زوج ميسور تحس معه أنها أمرأة تعيش في كنف راجل قادر على الأنفاق ولا يقوم بإستغلالها

GHARAM يقول...

momken

أولا العرسان اللي بيجوا لزوزو ماينفهوش البنات لأنهم أوفر فورتي وكبار سنا


أما انك تاخد من زوزو فلوس، فأيه ياعم الثقه في النفس دي أنك ممكن تاخد فلوسها

GHARAM يقول...

أسوور


ماهيه حفظت خلاص كافة الحجج والأسباب التي يسوقها الرجل لتبرير رغبته في الزواج على زوجته



خبره بأي

GHARAM يقول...

راجى

نعمل ايه ياراجي



دنيااااااااااااا

GHARAM يقول...

Mohamed Hamdy


ياحبيبي انت قد أولادها ممكن تكون عريس لبنتها ماشي

GHARAM يقول...

Hesham

رجاله مين اللي زاد سعرها


موش لما يكونوا قادرين فعلا يفتحوا بيوت ياعم هشام

GHARAM يقول...

Desert cat

والله ممكن تلاقيها زوزو صاحبتي أصلها منتشره

GHARAM يقول...

soly88


ربنا يخليك والله انت نصفتها

GHARAM يقول...

*SosSoOo* l'o'l


ماهو أختبار أنه شغال في السرير دي صعبه برضه، ممكن يفهما كده وبعد الجواز تبقى الناس خبيتهم السبت والحد وخبية العريس ماوردتش على حد

GHARAM يقول...

mohamed ghalia

وربنا يسعدك انت كمان

GHARAM يقول...

مثلية تبحث عن ذاتها

والله انتي اطيب قلب

GHARAM يقول...

nouna

والله صاحبتي روحها شابه وزي العسل



وعلى فكره كل مانمشي سوا في عربيتها الناس تعاكسها ويقولوا لها انت شبه شويكار

GHARAM يقول...

محمد عتلم



يا فنان أنا بحب الرجل ولست عدوه له


أنا بس بأحب اعاكسه لأنه مهم في حياتي ، وماأقدرش اعيش من غيره

GHARAM يقول...

فكرة من الزمن ده

طول عمرها عاشت تبحث عن الحب


لكنها لم تجده


والحب بيخلي المرأة تتنازل عن حاجات كتير حتى ولو اساسية


لكن لما يجي عريس كده لاحب ولا يحزنون لازم الست تعمل الف حساب

GHARAM يقول...

أسوور

التجاهل افضل حل

GHARAM يقول...

غير معرف

طيب ياكيمي كيمي كا

GHARAM يقول...

Barracuda



انت فين غايب كل ده اشتقنا لك

GHARAM يقول...

الشنكوتي الكبير

صدقني ياشنكوتي دي اطيب من الطيبه، وياما اخدت مقالب وطعنات في حياتها وبرضه بتسامح

GHARAM يقول...

afew good men


أنا نشرت تعليقك رغم أن فيه تطاول على صديقتي علشان أرد عليك



من الواضح ان خبرتك في الحياه منعدمه ولسه بدري عليك لما تقدر توزن الأمور صح


صاحبتي موش بتاعه سياحه والكلام غير اللأئق اللي قلته


صاحبتي انسانه محترمه ومقتدره ماديا ولديها ابناء

GHARAM يقول...

afew good men


وبعدين روح انت كل الضاني والداندي


لأنها يمكن حاجات واو بالنسبه لك


لكن صاحبتي شبعانه منه لأنها من بيت كريم وشبعان

سـمــــــــــا يقول...

ايه الناس اللى كل يوم عريس دى ؟؟

ما احنا اهو 30 سنة وقاعدين لا عريس ولا عروسة :(

حظوووووظ :)))))

الحمد لله ادينى عيشت فى دور حورية فى مسرحية الهمجى :))

اسمحيلى برضه أكمل وصلة الحسد واقول لها : يا وااااصلة ... يا قااااادرة


يالا بالشفا واى خدمة يا ستى ابقى قابلينى اذا عدى من قدام النت عندها فار ميكى ماوس مش عريـــس :))


تحياتى يا جميل وبجد البوست دمه خفيف اوى

انت تسال والكمبيوتر يجيب يقول...

دعوه
الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

الازهرى يقول...

لالالالالا
ايه كل ده
والناس عماله تقول فى ازمة عنوسة فى البلد ؟
اتارى العرسان كلهم عند زوزو

لكن لو عايزة رأيي خليها تستنى 3 شهور
واكون فاضى وتبلغيها ان فى عريس رجل اعمال مصرى وحالته كويسه وشاب جدع
واهو توفقى راسين فى الحلال

ها ايه رأيك ؟

خمسة فضفضة يقول...

ربنا معاها ، ان شاء الله وتلاقي اللي يعرف يقدرها كويس ويريحها بقي من الرجاله الاندال وقرفهم

afew good men يقول...

أنا نشرت تعليقك رغم أن فيه تطاول على صديقتي علشان أرد عليك

============================

انا حرد لمجرد الرد مش للدفاع عن نفسي
===============================
لاني لااعرف صاحبتك ولا حاجة ولكن هو دا تحليلك ليها
============================
هو أنا حا اتجوز علشان أجيب عيال،أنا عايزه راجل ينغنغني.


زوزو: يابنتي انا بحب أشوف سعري في السوق ولسه فيه طلب عليه والا لأ، وبحبهم كده رايحين جايين، أهو بأتسلى على غباءهم


مابيحبش يغضب ربنا، وقال لي أنا حا اتجوزك بس جوازنا يبقى سر مراتي ماتعرفوش،وحا أخد لك شقه وأجي لك يومين في الأسبوع وأديكي 5000 جنيه

انا: عرض كويس اهو كانك شقه مفروشه

زوزو:طبعا أنا قلت له طيب والشبكه والمهر

انا: يخرب عقلك هو انت لسه عايزه شبكه ومهر

زوزو: طيب على الأقل ابيع عربيتي ويكمل لي عليها واجيب عربيه



ماقرتش جملة واحدة تدل ان صاحبتك بتدور علي راجل يحتويها

ثانيا محدش يعرف مين اللي شبعان من مين اللي جعان انا كتبتها لمجرد انهم جابو سيرة الاكل في الحوار

ثالثا ودا الاهم الام اللي عندها عيال كل يوم بتقابل راجل شكل ليه ؟؟؟؟

مش عندي تعليق ولارد لكن لو في غلط يكون في عرضك للموضوع عن صحبتك لانك بتشوه صورة الام المحترمة اللي انتي اتكلبمتي عليها

فوق كدا نعتذر مرة اخري للازعاج لحضرتك ولصاحبتك الانتيخ
وبأكد اعرضي الموضوع بطريقة تانية لانك طبعا كدا ممكن انا اتب تعليق مش يعجبك او غيري

اما في حاجة لو قريتي في تعليق شيء مش عاجبك ممكن مش تظهري التعليق وتردي عندي لاني اكيد كان ليا وجهة نظر وانا بكتب تعليقي وهي انني لا اهاجم احدا بقدر ما اضع تصور لشخصية اقرأ عنها

اتمني ان تفهمي كلماتي


================================

من الواضح ان خبرتك في الحياه منعدمه ولسه بدري عليك لما تقدر توزن الأمور صح

===============================

مشعارف ايه دليلك بس عموما شكرا علي الاتهام
============================
صاحبتي موش بتاعه سياحه والكلام غير اللأئق اللي قلته


صاحبتي انسانه محترمه ومقتدره ماديا ولديها ابناء

=======================
ربنا يزيدها ونعتذر مرة اخري للكلام غير اللائق

===================


وبعدين روح انت كل الضاني والداندي


لأنها يمكن حاجات واو بالنسبه لك


لكن صاحبتي شبعانه منه لأنها من بيت كريم وشبعان
========================

واو مش للدرجة دي ياست بلاش تزعللي انا في الحتة دي كنت بهرج بجد فانت لو زعلتي عندك حق لانك تخيل اني بقييس الناس بالاكل والشرب والمظهر

اعتذري لصاحبتك وقوليلها لو كانت قريت التعليق وزعلتي بجد بعتذر

اما حضرتك كمدونة ياريت تقبللي الرأي الاخر وخاصة اني فمتك ان البوست ضحكني

شكرا غرام علي ردك اللي بعتقد فيه نوع من الهجوم

GHARAM يقول...

afew good men



هو أنا حا اتجوز علشان أجيب عيال،أنا عايزه راجل ينغنغني.
=============

ربما كان عدم وضعي لعلامة الإستفهام جعلك تعتقد أنها حاتتجوز وتجيب عيال لكن في الحقيقه هي كانت بتتساءل وهي متعجبه من كلامي

==============================

زوزو: يابنتي انا بحب أشوف سعري في السوق ولسه فيه طلب عليه والا لأ، وبحبهم كده رايحين جايين، أهو بأتسلى على غباءهم
=================
وبعدين أيه يعني لما تقول بأشوف سعري في السوق، ياسيدي الجواز برضه فيع عرض وطلب ودي حاجه ماتقللش من قيمتها، زي الدكتور زي المهندس زي اي موظف يسعى للذهاب في عمل في مكان تاني علشان يقيم أجره

============================

مابيحبش يغضب ربنا، وقال لي أنا حا اتجوزك بس جوازنا يبقى سر مراتي ماتعرفوش،وحا أخد لك شقه وأجي لك يومين في الأسبوع وأديكي 5000 جنيه
================
بأهزر مع صاحبتي فيه أيه يعني وده موش معناه أني بأقلل من قيمتها
لأن مافيش جواز بالشكل ده ، ده راجل كأنه مأجر شقه مفروشه

============================
ماقرتش جملة واحدة تدل ان صاحبتك بتدور علي راجل يحتويها
=============
لازم تعرف أنها وكما ذكرت فشلت في زيجتين ، يبقي أكيد كان نفسها في راجل يحتويها ولكن لم يحدث إذن لما تحب تتجوز جواز عادي لازم تشوف مصلحتها وده حق مشروع

============================

ثالثا ودا الاهم الام اللي عندها عيال كل يوم بتقابل راجل شكل ليه ؟؟؟؟
==========
هي حره إن شالله تقابل كل يوم 100 راجل دي حريه شخصيه لاتلام عليها ، كلهم عرسان بيتقدموا لها للجواز، وحتى لو موش للجواز ليس من حقك أو حقي التدخل

=============================


مش عندي تعليق ولارد لكن لو في غلط يكون في عرضك للموضوع عن صحبتك لانك بتشوه صورة الام المحترمة اللي انتي اتكلبمتي عليها
==============
ايه اللي شوه صورة الأم ، هل انا قلت عنها كلام سيء، هل قلت أنها أمرأة منحرفه؟، هل قلت مايسيء لها؟ كل ماقيل هو كلام دار بينا بشكل ساخر على العرسان اللي متقدمين شرعي موش رجاله مصاحبهم أو ماشيه معاهم

===============================

بس في نصيحة بلاش تدور في النت

ممكن تنزل شرم او الغردقة او اي كازينو بيستضيف خليجين وافتكر حتلاقي اللي ينغنغها وهو زي الحمار ومش فاهم حاجة

عموما دي سياحة موجودة

زوزو بيتنصب عليها وسعرها في السوق اكلة سمك


عموما شوفيها تقبل عزومتي علي ضاني او حتي داندي

فيه ناس كتير أنتقدت، وعادي كل واحد حر يقول رايه
================

لكنك قلت نصيحه وهي انها تنزل شرم او الغردقه وتشوف خليجيين وكأنها ماشيه تصطاد رجاله أو أن حرفتها أصطياد الرجال واظن ده كلام لايليق لأن صديقتي ليست من تلك الأصناف وتلك كانت قمة الإهانة

==========================
زوزو بيتنصب عليها وسعرها في السوق أكلة سمك
===========
ده كلام موش محترم لأنها اولا محدش نصب عليها هي اللي بتنفض للعرسان، وممكن اي واحد في الدنيا يروح برضه يخطب بنت ناس طيبين وينخع للصبح ويبقي نصاب عادي
===========
أما سعرها في السوق أكله سمك

أظن عيب قوي الكلمه دي وموش حا اقدر افسر اكتر من كده
=====================
وشوفيها تقبل عزومتي على ضاني او داندي
==========

أولا وكلتني طرف في الموضوع وتلك إهانه شخصيه، ثانيا زوزو موش بأكلة سمك ولا دندي وضاني

برضه دا كلام موش مهذب
====================
وفي النهايه عادي انت قلت رأيك ونشرته

وبرضه انا بأقول رأيه

وبرضه لك كل الود والتقدير

GHARAM يقول...

خمسة فضفضة

صدقيني هي لو عايزه تتجوز كانت اتجوزت من زمان هي بتلعب في الوقت الضايع

GHARAM يقول...

الازهرى

يا ازهري مشكلتك 3 شهور بس يلا ربنا يعين

GHARAM يقول...

سـمــــــــــا

هي لاحاتتجوز ولا تنيل اهي بتتسلى والله ساعات تحول العرسان الكويسه على بنات او ستات لسه متجوزوش

fashkool يقول...

العزيزه غرام
سلمى لى على زوزوا
تحياتى

mahasen saber يقول...

من قلبى بجد يا حبيبتى يا زوزو والله بجد مش هزار

شكلها طيبه فعلا بس حظها شكله نحس وفعلا برضه

mahasen saber يقول...

بس بجد اعتقد كل ست فشلت فى حياتها هيبقى جواها جزء من زوزو لما تكبر
يعنى احساس انها لسه مرغوبه ومطلوبه وده طبيعى فى اى انثى ده حتى الرجاله فيها الحب والرغبه دى فى انهم يفضلوا مرغوبين



بس بجد يا غرام بحييكى على مواضيعك الجميله واليى فى الصميم دى لانها من حياتنا وخلاصة لمشاعرنا


واسفه قوى لتأخرى فى الزياره خطوة السلحفاه بئه

Tarkieb يقول...

هو اللي صاحبتك بتطلعو عليكي جاية تطلعيه عليناههههههههه... شوفي يا ستي طالما كانت شايفة المكتب معفن والريحة منيلة يبقى مش بتحبه ودي علامات انها مش طايقة العريس من أساسه... ونصيحتي لها تتجمز بالجميز لحد ما يجي التين... يعني لو حتتجوز على روحها مفيش الا الجميز وموت بقى يا غزال لما يجي التين

GHARAM يقول...

fashkool

ايه ياعم فاشكول رايح جاي كده على بوست زوزو شكلك ناوي تعمل عمله


تحياتي بعنف

GHARAM يقول...

mahasen saber

دايما كده حاسه بمشاعر المرأة وحنونه في نقدك لها

بجد بحب طيبة قلبك

GHARAM يقول...

Tarkieb

ماشي بس انا موش فاهمه حكاية الجميز دي

Tarkieb يقول...

شوفي يا ستي غرام المثل الشعبي بيقول اتجمز بالجميز لحد ما يجي التين.. يعني ارضي بقليله وكل جميز على اساس ان الجميز فاكهة رخيصة لحد ما يجي التين الغالي بقى.. عشان كدة كان راي انها ترضي بشخصية مش كاملة يعني بخيل او فقير ألخ لحد بقى ما يظهر السوبر المان التيناوي ده ..وابقى تعالى قابليني لو ظهر..الظاهر ان المثل ده عندنا في السيدة بس بقى .. وشكلك باين عليكي اقطاعي يا غرام ومتربي على الغالي ههههه

ঔღঔ نـــوارة ঔღঔ يقول...

هههههههههههههه

صحبتك غريبة فعلا

انا معها بانها من حقها تتجوز بدال الوحدة الي هي فيها

لكن هي طمعانة بالعريس الغني و هما طمعانين بالشقة بتاعتها

المعادلة صعبة

ربنا يوفقها وجميل اووي انه لسه بيجلها عرسان شكلها امورة هههههه

بالتوفيق يالغلاا