بورصة عرسان زوزو

زوزو هي صديقتي الأنتيخ،والتي اعتبرها أختي التي لم تلدها لي أمي،وهي انسانة طيبه جدا ومسالمة جدا جدا،وقد وهبها الله خفة دم غير عادية ،إلا أنها وطوال سنوات عمرها لم تهنأ بزواج سعيد،فقد جربت حظها مرتين وفشلت،ورغم أنها لم تعد صغيرة في السن(وطبعا حاتضربني لما تقرا البوست)إلا أن الخطاب مازالوا ينهالون عليها من كل حدب وصوب، ولأنني أحب الصديقات اليها فدائما تطلعني على أحدث المستجدات في حياتها،وعلى النت دارت بيننا تلك الحوارات على مدار شهر مضى

1

زوزو : عايز أخد رأيك في حاجة ؟

انا: خير

زوزو: جاي لي عريس مكعبر وقصير ولابس نضاره كعب كوبايه بس غني وبيشتغل مقاول وهو من المنصوره.

أنا:طيب يعني بعد المقدمه دي بتاخدي رأيي في أيه؟وبعدين أنت لسه عايزه تتجوزي؟

زوزو: أعمل أيه يا أختي بقيت فزززززززيعه فززززززيعه كل ما أكبر أحلو، والعرسان صفوف صفوف،وبعدين أيه أنت لسه عايزه تتجوزي دي؟
هو أنا حا اتجوز علشان أجيب عيال،أنا عايزه راجل ينغنغني.

أنا : طيب على البركه ماهو عريس غني أهو أديها، اتكلي أشارتك خضرا، بس أنا عايزه اعرف بتجيبي العرسان دي منين كل يوم والتاني؟


زوزو: ابدا وحياتك هما بيجوا كده لوحدهم،جالي وطبعا لابس لبس عجيب لابس شيرز هاي كول موش بلوفر سعادتك، والهاي كول خانقه رقبته ومقصراه أكتر ماهو قصير،ولابس جزمه بكعب كوبايه


أنا :هو لسه فيه جزم بكعب كوبايه؟

زوزو : بصراحه أنا شاكه أنها تفصيل، والمشكله أن مقاس رجله تقريبا 35 وانا مقاس رجلي بتاع 42 كده

أنا: الراجل مايعبوش الاجيبه ؟

زوزو:ماهو على حد كلامه غني، عنده أملاك في المنصوره وشاليهات في راس البر وأرض في حدائق الأهرام،وفيلا في العبور،وشقتين في المعادي،وشقق في المقطم.

أنا:طيب هو متجوز؟

زوز: ايوه وعنده بنت وولد، بس هو مطلق مراته؟

أنا : مطلقها ليه؟

زوزو: بيقول أنه كان كاتب لها حاجات ونصبت عليه وباعتها، وعلى طول عايش دور انه غني وكل الناس طمعانه فيه وكده.

أنا: ممكن يكون كداب،المهم ماتتسرعيش وشوفى الأول إذا كان كويس والا نصاب؟

زوزو:ماهو اصر يعزمني على أكلة سمك في المكتب عنده وهو اللي طبخه بنفسه.

أنا: فعلا شكله غني سمك أيه اللي في المكتب وحايطبخه بنفسه؟

زوزو: رحت ياحبيبتي لقيت مكتبه في حته بيئه وتقرف،وكان مفهمني ان المكتب تمليك،عرفت من واحده عنده المفروض انها السكرتيره أنه بالأيجار،وجوعني يجي 4 ساعات لحد ماطبخ السمك،فكرني بنور الدمرداش في فيلم صغيره على الحب،وطبعا يعني قلت أن أول اكله سمك من عريس عامل نفسه غني أكيد حاتبقى جمبري وأستكاوزا وحاجات كده، لقيته عامل سمك بلطي وبربوني.

ومره تانيه عزمني على بط برضه في المكتب،وقال لي شوفي ده بط بالبرتقان محدش بيعرف يطبخه غيري،وبعد ما غسلت ايدي أداني كولونيا احط منها وكانت مريعه،قلت له أيه دي؟دي كلونيا وحشه قوي؟
فأستنكر كلامي وقال لي دي من فرنسا

أنا: فرنسا، تلاقيها من الحرم الزينبي ، والا شكله كده بيستعمل أسنس شاديه


زوزو: ومره جه خدني من البيت علشان أروح أقعد معاه في المكتب

أنا: هو مابيعرفش يروح حتت تانيه غير المكتب / بيخاف يتوه في القاهره والا أيه؟

زوزو: المهم جه وراكب عربيه ماتريكس،فقلت له أيه العربيه الحقيره دي؟

فقال لي الماتركيس حقيره؟قلت له مع الثراء الفاحش اللي انت واهمني بيه تبقى حقيره،فرد عليه بكل حسم لعلمك دي عربيه هارد ورك وانا كل سنه باغيرها وأجيب الموديل الأحدث،المهم رحت المكتب وبرضه قلت له أيه المكتب الحقير ده ما تجيب حد ينضفه، والغريبه انه أخد الكلام بصدر رحب، وسألني تحبي أجيب لك ايه من المنصوره وأنا جاي؟

قلت له متشكره موش عايزه حاجه وقعد يحلف ايمانات العظيم وانا مصره اني موش عايزه حاجه راح في الآخر قال لي خلاص حا أخلي اختي تجيب لك سمان، وحا اجيب لك بسبوسه، طبعا أنا بعد كده رفضت ارد علي تليفوناته من أصله

2
زوزو: جالي عريس رجل أعمال كويس ومحترم ومثقف

انا: وطبعا عايز يتجوزك على مراته؟

زوزو: ايون

أنا : مالها مراته مكسحه ولا عاميه؟

زوزو:هو وعيلته معاه جنسيه كنديه،ومراته جالها حالة تدين على طول قاعده في الجامع وبتلبس نقاب وبتعتبره كافر،ورافضه أنه يقرب منها ابدا

أنا: اعوذ بالله كافر ليه؟

زوزو: معرفش مع أنه راجل شكله طيب ومهذب ومثقف جدا، قعد يفهمني اسباب الأزمه المالية بالتفصيل الممل

ماطولش عليكي هو صلته بمراته شبه منعدمه بس خايف يطلقها تاخد نص ثروته زي القانون مابيقول عندهم هناك،وبصراحه انا قلت له أنت رجل أعمال وغني وممكن تصاحب ايه اللي يجبرك تجوز، فرد انه مابيحبش يغضب ربنا، وقال لي أنا حا اتجوزك بس جوازنا يبقى سر مراتي ماتعرفوش،وحا أخد لك شقه وأجي لك يومين في الأسبوع وأديكي 5000 جنيه

انا: عرض كويس اهو كانك شقه مفروشه

زوزو:طبعا أنا قلت له طيب والشبكه والمهر

انا: يخرب عقلك هو انت لسه عايزه شبكه ومهر

زوزو: طيب على الأقل ابيع عربيتي ويكمل لي عليها واجيب عربيه جديده




3

زوزو:جالي عريس مصري معاه جنسيه أمريكيه

أنا : تاني

زوزو: لأ وعنده شقق في دبي بيأجرها

أنا:ووقعتي عليه منين ده؟

زوزو: من النت ياحياتي،وخلاص أتفقنا حايجيب لي شقه في حدائق الأهرام وخاتم هدية الجواز

4



أنا: اخبار العريس بتاع امريكا أيه؟

زوزو: لا جاب شقه ولا حاجه دا عايز يرمي جتته عليه ويقعد معايا في شقتي، وجاب لي خاتم دهب حقير، فنفضت له فورا بلا علل

5


زوزو: جالي عريس بس أصغر مني بحوالى 10 سنين

أنا : موش مشكله عادي موش هو اللي عايزك؟

زوزو:مسكين مراته عيانه ومابيقدرش ينام معاها،وهي نفسها قالت له روح أتجوز

أنا:طيب وأيه المشكله؟

زوزو:قال لي حا اعمل وأجيب وأسوي وفي الآخر برضه طلع بيرسم أقعده معايا في الشقه،وبعدين ابن الكلب جاي يزورني اول مره جايب في ايده نص كيلو لقمة القاضي، طيب يخليهم كيلو والا اتنين،فعلا حقير

أنا: ياشيخه أعقلي بأي جواز ايه اللي لسه عايزه تتجوزيه؟

زوزو: ملعون ابوهم أوساخ، أنا لاعايزه اتجوز ولا زفت، انا خلاص بند الرجاله مسحته من حياتي من زمان وطلعتهم من راسي أصلا،أنا لسه فيه نفس أجيب راجل يقرفني بلا وجع قلب

أنا: امال ايه العرسان دي كلها اللي انتي شغلانا بيهم

زوزو: يابنتي انا بحب أشوف سعري في السوق ولسه فيه طلب عليه والا لأ، وبحبهم كده رايحين جايين، أهو بأتسلى على غباءهم


انا: طيب يابورصه هانم أياك وحذاري تدخلي على النت وتقول لي جالك عريس تاني، حا اعمل لك بلوك من أصله


زوزو : كده يا أختشي هو انا لي حد غيرك أحكي له



=============

تحديث

بأقول لكم أيه خلوا بالكم من زوزو دي صاحبتي وأختى وهي أمرأة بمائة رجل،عاشت حياتها تكافح في الحياة من اجل لقمة العيش وواجهت الحياة وحيدة دون سند، لكن الله أكرمها لطيبة قلبها وحسن نواياها

===========

والوحيده في الدنيا اللي بتقدر تستحملني

فعلا هي الصديق الصدوق بالنسبه لي

ومن حقها تعيش حياتها وتتزوج على سنة الله ورسوله طالما أنها عانت الأمرين في زيجتين فاشلتين لم توفق فيهما