الأربعاء، أكتوبر 21، 2009

سرطان الثدي أبتلاء ،،ومصيبه البحث عن أطباء 6




ومن 25 سبتمبر الى 5 أكتوبر يوم أجراء عملية أستئصال الورم الخبيث عشت أياما حزينة بائسة،يغلب عليها البكاء والحزن على الذات والخوف من هذا المرض اللعين،،حمدت الله سبحانه وتعالى وتقربت أكثر منه ،فمن لنا سواه وقت الضيق والأزمات والمحن،،




كنت ابكي أماما زوجي الذي كان لديه أمل كبير في أن يكون الورم حميدا،،وكان يؤكد لي أنني صاحبة شخصية قلقة وأضخم الأمور كثيرا،،،وذكرته ببكائي الشديد في نهاية عطلتي الماضية وسفري الى أبوظبي في بداية أغسطس الماضي، وقلت له بالحرف الواحد لم أعد أرغب في السفر والغربة ثانية،،(أنا قلبي حاسس أني حا ارجع من هناك في صندوق)وطبعا وقتها أعتبرني زوجي أمرأة نكدية تضخم الأمور،،،وأقول لكم الحقيقه لا اعرف سبب الإكتئاب الشديد الذي كان يسيطر على هذا العام تحديدا،،فالحاسة السادسة عندي ربما تكون قوية وتوقع السيناريوهات والأحداث مرتفع لدي،،وكنت أشعر دائما ورغم قراري الحاسم بالعودة للعيش في مصر والذي عرفه ايضا كل المقربين الي من اصدقاء وأهل،،وأعتبر البعض ما أفعله نوعا من البطر بالنعمه في ظل وضع أقتصادي عالمي سييء،والبعض الآخر أكد ان لدي الملايين مكدسه في البنوك ولى الحق في العوده(((((((والحقيقة التي اود قولها وانا الآن في محنه وبين يدي الله ولا أستطيع الكذب،،،هي أنني والحمد لله عشت الغربه مع زوجي وأولادي ،،لكنني انفقت مالى على السكن (السكن مرتفع هناك،،،في العيش والحياه بشكل إنساني لائق،،،،تعليم الأولاد،،،،وغيرها من الإلتزامات،،،وأستطعت عمل بيتي الذي منيت نفسي بالإستمتاع فيه)))والحمد لله لا أحد يأخذ سوى نصيبه




وكنت قد قررت مع زوجي بيع اشياء نملكها ليكون معنا بعض السيوله الماليه لنضعها في البنك ونعيش منها،،،أقسم بالله العظيم إن كلامي هذا صحيحا وأنا متأكده أن لا أحد من معارفي وأصدقائي او اي حد حايقرا البوست ده حايصدق كلامي


وجاءت الأزمه الإقتصاديه لتهز العالم ويخاف كل صاحب مال على ما معه وليتوقف كل شيء ولا أستطيع بيع أي شيء




المهم أنني كنت أنظر الى بيتي وحقائبي المغلقة منذ سنوات طوال وبها أغراضي الشخصية ومفارش وبطاطين وستائر وغيرها،،وأتخيل انني لن اتمكن من الأستمتاع بأي شيء أشتريته من هناك بعناية لأفرشه في بيتي فيما بعد،،،وأبكي بحركه ثم اتحول للضحك الهيستيري وانا أتخيل العته وقد أكلت معظم مافي تلك الحقائب






بدأنا في أستشاره الأهل والأصدقاء عن أشهر وأمهر أطباء الأورام ،وكلما أثني أحد على دكتور لعن ابوه واحد آخر،،،ورشح لي طبيب صديق لأخي جراج للأورام وقال أنه عالم وأفضل واحد في مصر،،ذهبت مع زوجي وابنتي له وقصصت له ما حدث وقام بعمل فحص ذاتي وقال لي من خبرتي أؤكد لك 90% ان هذا الورم حميد،،أنشرح صدري وقلت يارب،،،وطلب مننا الا ننتظر نتائج تحليل الورم الآتيه من أبوظبي ونقوم بأجراء العمليه بعد غدا،،،فشعرنا جميعا بصدمه وقال له زوجي أمهلنا بعض الأيام لأنها أتت امس فقط من ابوظبي،،،ثم ذهبنا الى طبيب آخر،والحقيقة أن الدكتور الكبير لم يكن موجودا وكان مساعده هو الموجود وبعد الفحص قال لي 50%هي تسبة التساوي بين الحميد والخبيث،وشرح لنا كيفية أجراء العملية وأذا كان الورم حميد السعر حايكون أقل ،،(ايد الجراح يعني))وأذا كان خبيث سيرتفع الآجر الى الضعف،،،وسنعرف ذلك أثناء العمليه بتحليل الورم






شعرت بإنقباض كاد يقضي علي ،وبدأنا نذهب لكل جراح اورام يخبرنا به الناس وكل واحد برأي،،،وأحب هنا أن اؤكد على كلام المدونهshasha
بشأن الطبيب الذي عالج والدتها،،فقد أجمع الكثيرين على ما قالته في تعليقها على البوست الفائت




تحدثت مع صديق وقصصت له ما يحدث لي مع الأطباء في مصر،،وكان رأيه أنني سألقي حتفي على يدهم وأن الطب في مصر في أنهيار،،وأنه من الأفضل أن أسافر فرنسا للعلاج((((طبعا أشتغلت جميع هرمونات الخوف في جسدي،،وبدأت الدموع تنهمر من عيوني،،،وفي تفس القوت تحولت أيضا كالمجنونه الى حاله الضحك كالمعتوهه؟؟؟وسألت نفسي،،ياتري كيف يفكر بي هذا الصديق ؟؟؟هل هو ايضا من ضمن الناس الذين يعتقدون أنني أمتلك الملايين؟؟؟،،والحقيقة أن هذا المدون الذي لم أراه يوما في حياتي إلا أنني أعتبره من أهم أصدقائي،،لا أعرف لماذا يعتقد إنني من هؤلاء الذين يقيمون الناس بالمال لأنها اللغة التى ربما لا أعرف غيرها،،ولا أدري مالذي منحه هذا الإنطباع عني؟،،،فأنا لا أ‘يش في قصر،،ولا يقف أمام بيتي سيارات الإنفينتي والهامر،والرولزرويس،،




وكثيرا أقول له أنا من هؤلاء التاس الذي وزعت على اهاليهم الثورة 5 فدادين ،،،حتى أفهمه أنني أنسانه عصاميه بنيت نفسي بنفسي وكافحت كثيرا في الحياه((ولكن على مايبدو ان هذا هو الإنطباع الذي يأخذه الناس عن من يعيش ويعمل في دول الخليج))ورغم ذلك اقول الحمد لله ،،فالله سبحانه وتعالي هو الذي ارسلني الى هناك لأن رزقي الذي قدره لي كان هناك








للموضوع بقية

هناك 13 تعليقًا:

فشكووول يقول...

السلام عليكم ايمان هانم

تحياتى

بس اشوف انتى عامله رقابه على التعليقات من عدمه

فشكووول يقول...

ما فيش رقابه على التعليقات ولازم بقى شوية فرفشه عشان تحاولى تخرجى من اللى انتى فيه ..

فشكووول يقول...

ايمان هانم

الحمد لله الذى لا يحمد على مكروه سواه

متهيأ لى ان فى نهاية السلسله ح نسمع اخبار مظمئنه .. بس الحمد لله انا شايفك بتكتبى وبتدونى وحوالى 6 بوستات عن سرطان الثدى ابتلاء من الله واول امبارح كنت اقرأ الحلقه التانيه والنت قطع وما قدرتش اقرأ ولا اعمل حاجه .

النهارده بقى ما صدقت النت عاد قمت قريت الست حلقات وعرفت الموضوع من الاول لحد ما احنا واقفين

الحمد لله انت عملتى العمليه يوم 4 اكتوبر واليوم 21 اكتوبر يعنى بقى لك 17 يوم اعتقد ان نتائج التحليل طلعت وخلاص وكان لازم تقولى لنا عليها.

لكن على اى حال من البوستات ومن بوستاتك القديمه انا عارف ان انت فى الاصل انسانه متفتحه للحياه وبشوشه .. ودا احسن حاجه فيك

مهما كان الامل فانت تستطيعين قهر هذا المرض اللعين بالايمان بالله ...

شوفى يا ايمان هانم

اعرف ناس كتير والله العظيم قهروا هذا المرض وخصوصا سرطان الثدى بالذات بالايمان بالله وبقوة النفس والعزيمه والاصرار.. صحيح هو نوع من الاصرار الصعب ولكن يمكن

تخيلى نفسك عسكرى وماسكه البندقيه وعماله تحاربى فى المرض اللعين وكل يوم اقعدى ركزى مع نفسك حوالى ساعه فى انك تحاربيه وتطرديه من جسدك وكلك ثقه فى الله وثقه فى نفسه .. وان شاء الله تكون العمليه ناجحه وان يكون الطبيب عند استئصاله لم يترك اى فتفوته او اى ذرايه فى الجسم.

طبعا انا اقول لك كلام التشجيع وان شاء الله بعد فتره يعنى بعد حوالى سنه حنقول ونتكلم عن حاجات كتير وحتحكى لنا عن حاجات كتير وتكونى اجتزتى هذه الصدمه .. والحمد لله يمكن تكونى فعلا اجتزتيها.

اعرف خالى كان الله يرحمه يعيش فى الطالبيه فى الهرم وكان عنده سرطان فى اللثه واستأصله ومات بعد 18 سنه بمرض آخر خالص ولم يعود اليه هذا الوباء مره ثانيه .. ربنا يشفيك ويخليكى دايما منوره التدوين ومنوره مدونتك

سلامى الى اولادك والى زوجك العزيز

زهور الامل يقول...

ازيك يا مدام ايمان
يارب تكوني في حال افضل واحسن انهارده
بصي انا عايزة اقولك على حاجة
اللي يفتكر انك معاكي ملاييين الدنيا وبيعتقد ده سيبيه براحته ومتخليش ده يضايقك

حتى انتي لو معاكي ملايين العالم ده برضو بمجهودك وتعبك وغربتك وشقاكي
ومش واخدة حاجة من حد
اهم حاجة انك تركزي ازاي تهزمي المرض ده وتكوني اقوى منه ومتحيريش نفسك كتير بين الدكاترة علشان كتر تغيير الدكاترة ده مش كويس
ركزي في دكتور واحد بس وتكوني واثقة فيه وفي مهارته الى حد ما وروحيله وتابعي معاه وان شاء الله تعدي الازمة دي على خير وتكوني افضل من الاول بكتير

بس والنبي بلاش تضايقي نفسك وتكتئبي وتعيطي علشان تقدري تقاومي المرض ده

وعايزين نعرف نتيجة التحليل علان نطمن عليكي

ربنا يكمل شفاكي على خير باذن الله

اللهم امين

Cute Kitty **sookra يقول...

ازيك يامدام ايمان
وحمدالله على السلامه
انا من الناس اللى زيك وبتعيش فى سيناريوهات
لكن صدقينى وعن تجربه من شخص قريب
فان سرطان الثدى ليس مميت
ولسوف يقدر لكى الله الشفاء
تفائلى خير بالله
"انا عند ظن عبدى بى"
فاستبشرى خيرا
ربنا يشفيكى يارب
تحياتى

عين فى الجنة يقول...

الف سلامة والله انزعجت لكن انا عارف انك مؤمنة بالله وقضاؤه
وتقبلى كل التحية والاحترام

أمل حمدي يقول...

ربنا معاكي يا ايمان

ادعو الله من قلبي ان يكمل شفاكي على خير

والله والله ان احد قريباتي مرت بنفس ظروفك والآن في اتم صحة

يارب يشفيكي وتتمتعي ببيتك مع زوجك واولادك ان شاء الله

في انتظار البقية

allfollowsome يقول...

العزيزة مكسوفة

طبعا ما تزعليش نفسك من كلام الناس اللى بيقولو لك سافرى بره وكده ولا حتى تزعلى منهم

هم ممكن يكونو فاهمين كده

بس هم بيقولو كده عشان عرفو انك عايشة عيشة نضيفة وانت عارفة المصرى بيعيش بره ازاى

يا ستى ده امى اللى هى امى وانا لسه مسافر بقالى 5 شهور مقتنعه انى اشتريت شقة قلتلها يا حاجة دى ب 100000 دولار اقل واجب

كل اللى عملته انى نزلت عيدت فى مصر ومفلس من ساعتها وما حوشتش ولا مليم بس عشان انا عايش كويس هنا

اما بالنسبة لدكاترة مصر فحدث ولا حرج بس هو فعلا فيهم علما بس صعب تلاقيهم او تلاقى عندهم معاد بصراحة

بس اهم حاجة ما تزعليش نفسك تانى وبصفتى كان بيقولولى يا دكتور لحد اما فشلت فى ثانوية هاقوللك العلاج

R
بعد الفطار ساعتين موجة كوميدى

بين الفطار والغدا مسرحية مدرسة المشاغبين

بعد الغدا للعشا نايل كوميدى

بعد العشا مسرحية العيال كبرت

الممنوعات ابعدى عن كل قنوات الدراما والاكشن

العلاج ده يتكرر لمدة 69 سنة من دلوقتى وبعد ال 69 سنة تجيلى اعادة كشف


:D

ايام العمر يقول...

حمد لله على سلامتك

ومتتصوريش انا سعيد اد ايه بانى بقرالك دلوقتى

وربنا يتمم شفاكى على خير

momken يقول...

شوفى يا غرام
بالنسبه لامراض الاورام وامراض الانسجه مافيش حد يقدر يتنبأ بطريقه او اسلوب تطور المرض
( الورم) مهما كان الدكتور عالم واستاذ ورئيس قسم واستشارى

اغلب الجراحين بيكون الخيار الاول عندهم الجراحه لان ده شغله ولو معملش عمليه يبقى مشتغلش

لكن اساتذه الاورام بيكون عندهم خيارات تانيه
زى العلاج الهيرمونى لو الورم حميد
والعلاج الكيماوى لو كان محتاج لدرجه او عمر الورم او حجمه كبير
المهم تكون عينه الورم بتستجيب لنوع معين من المركبات الكيماويه
وده بيبان فى تحليل الانسجه للورم

اما لو كان الورم خبيث فبيكون اللجؤ للعمليه لاستئصال جزىء من الثدى او الثدى بالكامل - جانب واحد - ثم استئصال غده من تحت الابط لنفس الجانب

وينتهى دور الجراح هنا ويحيل الحاله لاستاذ الاورام
لانها فى هذه الحاله لديها استعداد لتقبل الاورام
وطبعا فى حاله استصال غذه
بيصاحبها تجمع سائل نخامى فى نفس الذراع الى كانت فيه الغده...وبيزيد حجم الزراع شويه
الا فى حاجه المتابعه وعمل تمرينات مستمره
واخد بعض المستحضرات للتخلص من الماء الزئد بالجسم
وتقليل الاملاح

وهنا يقترح طبيب الاورام علاج هيرمونى او كيماوى للانتهاء من جميع بقايا المرض
وبيستمر العلاج الكيماوى حوالى خمس شهور
اما الهيرمونى ففمافيش منه مشاكل

الاطباء الكويسين كتير

انا بأيد الشخص الى اقترح فرنسا
لان انا ليا قرايب كتير فى فرنسا والموضوع ده هنا متقدم جدا اكتر من مصر

بس الحمد لله اطمنا عليكى
وبنسمعك وبنتكلم معاكى وندعو الله سبحانه وتعالى ان يتم عليكى نعمه ويكمل شفائك سريعاً ان شاء الله


دعواتى

خمسة فضفضة يقول...

السلام عليكم ورحمة الله وبركاته

ازيك يا مونمون

يارب تكوني احسن واحسن

ماتزعليش نفسك من الناس اللي فاكرينك مكدسه الملاييين اصلا دي فكره عامه عن كل الناس اللي في الخليج لان فعلا اغلبهم كده بيبقوا رابطين الحزام وواخدين معاهم جرة المش عشان يوفروا كل مليم ، فالناس مش متخيله ان ممكن يكون فيه حد مش كده ، حد عايش عشان ينزه نفسه ويتمتع بفلوسه ويعيش عيشه كويسه ومش مهم رصيده في البنك زاد ولا قل المهم انه يكون مبسوط

وهي يعني الفلوس بنجيبهاعشان ايه مهو عشان نصرفها

اما الانطباع التاني بتاع تقييم الناس بحجم الفلوس اللي يمعاهم معلش ماتزعليش مني فعلا معظم اللي في الخليج كده واللي ظن فيكي كده اكيد شاف واتعامل مع ناس من العينه دي ومااكترهم ونادر اوي اللي تلاقيه زيك كده مش بيحكم علي الناس بماركة البدلة اللي لابسينها

معلش خدي كده في الواسع ودخلي من اليمين وطلعي من الشمال

وان شاء الله ربنا يكون معاكي ويتم الشفا علي خير وزي ما قلتلك قبل كده بكره تعدي الايام وتقعدي تفتكري وتضحكي علي كل اللي حصل


ربنا معاكي

RASHA يقول...

ايمان ازيك انا قريت البوست بتاعك طبعا اقتراح السفر لفرنسا اقتراح جميل ومش مكلف زى ما انتى متخيلة بالنسبة للتمريض والكفاءة طبعا فى فرق شاسع فترة مرض امى استمرت ثلاث شهور اتكلفت هنا حوالى مائة وخمسين الف جنيه طبعا فى المستشفيات الكبيرة اللى هى ولا كبيرة ولا حاجة اسم بس والله العظيم يوميا كانت مشكلة بينى وبين احد الممرضات تخيلى مع الحالة النفسية السيئة كمان التمريض والجهل ابسط شئ ان فى ممرضات مش بتعرف تقرأ اسم الدواء انا عارفة ان الاعمار بتاعة ربنا لكن جهل الاطباء والتشخيص الخاطئ كان السبب الرئيسى فى وفاة امى رحمها الله ,يارب متتشاءميش من كلامى بس انا والله بقول كلمة حق , ابتعدى تماما عن دار الفؤاد, السلام الدولى ,ودار الحكمة وديه مستشفى جديدة بمدينة نصر على اعلى مستوى فندقى انما طبى تقريبا صفر احسن الوحشين المركز الطبى العالمى التمريض هناك مختلف شوية وربنا معاكى ويطمنا عليكى ويطلع نتيجة الورم حميدة

أحــوال الهـوي يقول...

تتحدثين عني
و قصة حياتي
اراها في سطورك
ايمان هانم و علي الرغم من ادعائك بالضعف كنتي في منتهي القوة و الشجاعه
انت ايمان اسما و فعلا

سيدتي تمتعي بعمرك الباقي وسط من تحبين و ساقضي عمري الباقي ابحث عن من يحبني

سلمتي من كل شر

تحياتي