الخميس، أغسطس 13، 2009

مارينا لمت ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


أثناء متابعتي لبعض المواقع الإلكترونية ،جلست أبنتي تشاهد أحد برامج المنوعات،وفجأة وجدتني التفت بقوة اليها وأنا أسألها لتؤكد لى ماسمعت فربما أكون مخطئة،فوجدتها تضحك وهي ترد علي بالأيجاب وأن ماسمعته صحيحا، وأنني مازلت في بداية البرنامج وأنني سأطرب بالمزيد من التفاهات والسخافات

وقادني فضولي لترك ما أقراة وأتفرغ تماما لمشاهدة هذا البرنامج الكارثة والمسمى ب(مارينا رايح جاي)بعد أن تابعت بأذني فقط لقاء على الشاطيء مع فتاة يسألها المذيع عن أعمالها الفنيه،ولماذا رفضت بطولة فيلم بسبب مشاهد الأغراء التي ستؤديها ،ثم وبعد كلام لامعنى له كثير،سألها السؤال المعجزه (ايه رأيك مارينا لمت؟؟)فردت على الفور (فعلا مارينا لمت السنه دي)فسألت أبنتي عن تلك التي يستضيفها المذيع،فأخبرتني أنها جوليا،فسألتها ثانية ومن هي تلك (الجوليا)، فأجبت( عارفه ياماما البنت بتاعة إعلانات ميلودي تتحدى الملل،وطبعا وفورا عرفتها، فسألتها تاني، موش هي دي البت اللي أعضائها خارجه بره وبتتلعب شمال ويمين،فضحكت بنتي وقالت أه هي دي،طبعا تعجبت حقيقة من كذبة أنها رفضت بطولة فيلم لأنها ترفض مشاهد الإغراء

ماعلينا،جلست أتابع بأهتمام سخافة اربع مذيعيين منهم فتاه، والحقيقة لا أعرف لماذا أعتقدت أن هؤلاء ليسوا إلا من ذوي الأحتياجات الخاصة الذين تأخر نموهم الذهني والعقلي ،وان من اعد لهم البرنامج معاق ذهنيا


ذهب المذيع الى شباب وشبات مارينا وسألهم نفس السؤال المعجزه(ايه رأيكم مارينا لمت؟؟)وطبعا جاءت الأجابات كالتالي

واحد فرفور:طبعا لمت دي بقت وكأنك قاعد في المعموره(طبعا قلت لاحول ولا قوة الا بالله المعموره دلوقتي بقت بيئه،وكانت على ايامي شاطيء الأغنياء وصفوة المجتمع) ماعلينا

واحد فرفور تاني:هي لمت بس لسه ماسكه نفسها

واحد عامل فرمة الساحل:دي لمت طبعا والناس الكلاس معدوش بيجوا فيها،،،،و(طبعا المفروض ان الفرفور ده عامل نفسه كلاس)طيب ليه قاعد في مارينا لحد دلوقتي ؟؟

واحد فرفور كمان:طبعا لمت بدليل أني فيها السنه دي ---بصراحه دا كان دمه خفيف

واحد صاحب مكان ذا بيتش:والله احنا عايزين نرجع لمارينا هيبتها ،الناس اللي بتروح مراسي هما أصلا بتوع مارينا





ثم أنتقل البرنامج الى سؤال آخر(لوقصة حياتك حاتتعمل فيلم ترشح مين يمثله؟)طبعا تنوعت الإجابات بس اللي غاظني وفقع مرارتي أن بعض الفرافير أختاروا سعاد حسني واحمد زكي وعادل أدهم، طيب ماهي كل الناس دي ماتت حايمثلوا أزاي؟،والا يمكن لسه ماوصلش الخبر للفرافير ماعلينا



ثم انتقل البرنامج الى فقرة أكثر تفاهه وسخافة واتجهوا بسؤال الفرافير رواد الشاطيء

لو معاك مسدس وفيه طلقه واحده تقتل بيها مين؟

واحد فرفور سخيف وتلم :اضرب بيها الناس البيئه اللى مبوظه أسكندرية

واحد أهطل:اقتل ابو تريكه

واحده بنت أصابت في الإجابه:أحطك أنت واللي بيصور ورا بعض وأقتلكم الأتنين بطلقه واحده

والله أجمل جمله سمعتها في البرنامج كله


بصراحه مقدرتش اواصل متابعة البرنامج لسببين
أن كنت خايفه على المراره
والسبب التاني رغم أنه لم يثبت علميا أن العته معدي

هناك 58 تعليقًا:

Barracuda يقول...

عزيزتي

معذرة للغياب للانشغال بأعطال كتيرة.. لكن نهايته ..هنروح فين يعني ؟ لازم نرجع تاني نشوف حبايبنا عاملين ايه..

لو عايزة تشوفي من ده كتير --- شوفي ميلودي تريكس .. مش بس المرارة هتتفقع .. لأ حاجات تانية كتير

نحن في زمن التفاهة -- إن لم تكن تافهاً فحتماً أنت كائن فضائي سقطت من مجرة بعيدة عن هذا الكوكب

وسلملي على الفرق الحضاري اللي هو 100 سنة بينا وبين عالم الأذكياء

تحياتي العطرة وعذرًا للتأخير

يا مراكبي يقول...

يا سلام .. ده ايه الرامج الهادفة دي؟

بجد أنا شايف مستقبل باهر منتظر البلد اللي هيكون رجال الأعمال فيها هما الشباب اللي في مارينا دول

ايام العمر يقول...

الحمد لله ريحت دماغى ومش بتفرج ع التفاهات دى
ماهى مش ناقصه فقع مرارة
هى مفقوعه لوحدها
دومتى

ايام العمر يقول...

اه فى حاجه نسيت اقولها
انتى ظلمتى المعاقين والهى
المعاقين كتير منهم عندهم وعى مش بله زى دول

وبعدين هما محيرين نفسهم ليه
هى مارينا لمت
عشان يها الاشكال الضاله دى

شكرا
منتظر جدييدك

أحــوال الهـوي يقول...

يا ستنا و حشتينا

الحقبقة مارينا لمت

لان من يملك المال الان حثالة المجتمع و الصفوة هم من ينتظرون الفرج
مارينا لمت كل السخافة في مكان واحد
كنت في مارينا اول الشهر و انبهرت بالمكان و ليس بالناس و نظرات الدونيه التي يصبها البعض علي الاخر فقط ليبرئئ نفسه من شبهة البيئيه

عزيزتي اخيرا تكلمت معك

تحياتي

احساس لسه حى يقول...

عزيزتى

ما البرامج الهايفه دى اللى مبوظه دنيتنا بتجيب للواحد قرف من البلد وحكومتها واعلامها

ومش عارف يعنى ايه لمت يعنى طبقه اقل بقيت تيجى فيها ولا ايه بالضبط ما ممكن اللى لمتهم احسن من اللى فيها ميت مرة

وجوليا هانم دى ليها فليم على اليةتيوب بتباس فيه وقاعدة مزاج وبيرة يعنى هى مش محترمة فى الاساس


ما البلد ابتديت تنهار ولسه الايام مخبية كتير والمشاكل هتكبر مع الوقت

تحياتى

سلام

SaLLy يقول...

hahahah
da7akteny walahy
tab tesada2y ba2a ana 3omry aslan ma ro7t marina deh o mesh ba7eb el sa7el el shamaly kolo aslan,asl ana be2ah ba7eb aro7 alex o el 2al3a o ba7ary o akol mn ice cream azza o ya sedy ba2a 3ala koskosy el she7' waheb,2a7la kalam walahy
el moshkela eno elly tale3en feha dol homa lel asaf elly be2a o fahmen el 7ayah 3'alat
ta7eyaty

SaLLy يقول...

ana areet el post elly abl dah o 2aret el comments beto3 nadia o radek 3aleha
sara7a da7akteeeeenyyy mooot
b 10 geneh bas heya walahy ya balash
bas aslan 7ata el english beta3ha is soo lame ana la2et el gomal sa3at mesh rakba
ta7eyaty ya gamiela

إنـســـانـة يقول...

انا شوفت البرنامج ده قبل كدة بيجي على مزيكا باين وبصراحة بتفرج وافضل طول الحلقة مفنجلة عنيا وفاتحة بؤي ومش مصدقة ان الناس دى من مصر وشربوا من كاس المرار اللى داير على كل الناس او حتى عرفوا الميكروباص ده شكله ايه اصلا

بجد حاجقة تفقعععععععع

Dr Ibrahim يقول...

أحسن إجابة الاجابة الاخيرة تقتل المذيع والمصور...

برنامج تافه زى بقيت البرامج ...مش لاقيين يعملوا حاجة ولا ايه!!!

nouna يقول...

عود احمد
الحقيقة الواحد لما صدفة بيسمع او يشوف حاجة زى كدة بيقرف وبيحس انة من جيل انقرض وخلاص على مصر السلام مدام ده بقى حال شبابها اللى بتاع مارينا واللى بيتلزقوا فيهم
الله يستر

راجى يقول...

مرحبا بك من جديد
وانتى ايه رأيك ، هى مارينا لمت؟
السنة دى انا شفت نسوان هناك لامؤاخذة نازلين البحر بالجلاليب

فاروق عادل يقول...

ههههههههههه فعلا مارينا لمت بس بجد اجمد اجابه بتاعت الرجل اللى قاله طبعا لمت انت مش شايف انى فيها رجل عسل والله وبعدين المعمورة حتى الان شاطئ نضيف امال يعملوا ايه لو دخلوا ميامى المجانى

GHARAM يقول...

Barracuda



اجمل حاجه أني الاقي تعليقك عندي لأنك صديق قديم وانا باعتز بكل المدونين اللي عاصرونا من البدايه



تحياتي

GHARAM يقول...

يا مراكبي


أنا عايزه كاتشب

GHARAM يقول...

ايام العمر

عندك حق وأنا بجد باعتذر للمعاقين لأني قارنت بيهم الناس دي

GHARAM يقول...

أحــوال الهـوي


أنت اللي حمد الله على السلامه نورت مدونتك ومدونتي طبعا

GHARAM يقول...

احساس لسه حى

يا اهلا وسهلا ، ايه الرضا ده،،،انت شيلت أسمي من قائمه المدونات اللي بتدعو الناس لمقاطعتها والا لسه؟؟؟



تحياتي

GHARAM يقول...

SaLLy


والله ياسالي انا زيك والسنه دي رفضت اروح مارينا ومراسي مع بنتي،ولعلمك كنت معزومه يعني موش حا اتكلف أي مصاريف،لكن أنا بيني وبين اسكندريه حب من نوع خاص،أروح أكل رز بلبن بالأيس كريم والمكسرات من عند صابر،واشرب حلبسه في بحري،وأزور الكتعه،واروح برضه أزور عماره العفاريت،وابص من بعيد على زنقة الستات،واشيش في سلطانه،وأتأمل البحر من بلكونة الفندق من فوق،وأتابع الحبيبه اللي قاعدين يحبوا بعض في لهيب النيران على الصخور،،ولسه بحب المعموره لأنها بالنسبه لي الذكريات، وبحب أروح اشوف المنتزه وأقول في نفسي لو الملك فاروق شاف الناس دي اللي قاعده في الجنايين فرشين أكل وبياكلوا كان اتفقع ومات

تعرفي أنا بحب أسكندريه كمان في الشتا أكتر من الصيف،بتكون أهدا وأروق


تعرفي كمان أنا بحب قوي اقعد بالليل على أي مقهي على الكورنيش ، تعرفي ليه بحب قوي مجانين أسكندريه؟؟؟ ليه؟ اولا هما موش مؤذيين زي المجانيين اللي في شوارع القاهره،تاني حاجه بتلاقيهم لابسين حاجات عجيبه واحد مثلا بيلبس بالطو صوف في عز الحر، وواحده تانيه برضه لقيتها السنه دي تلاقيها عامله شعرها شينيون وصبغاه بأوكسجين ، ولابسه تايير زي موضه الستينات وماشيه ومعاها كيس فيه عيش فينو ولبن ورايحه جايه ، رايحه جايه كده لحد مالانهايه


ورغم أن الأسكندرانيه بيغلسوا على أي عربيه ملاكي القاهره أو الجيزه في السواقه وينزنقوا عليها،،،إلا أنهم برضه أطيب مننا بتوع القاهره

GHARAM يقول...

إنـســـانـة

بيجي على ميلودي كل يوم جمعه كما عرفت

GHARAM يقول...

Dr Ibrahim

يعني بصراحه سطحيه وأسفاف وإستخفاف بعقول الناس بشكل موش طبيعي

GHARAM يقول...

nouna

والله يانونا انا اتفزعت وأنا بأسمع السؤال،،،وقلت أنا غلطانه وسمعى موش مظبوط ولولا بنتي أكدت لي أن اللي سمعته صح وان البرنامج الهايف ده من زمان قوي وكله سخافات كده مكنتش صدقت

GHARAM يقول...

راجى

ياراجي ياصديقي

الموضوع موش لمت والا بيئت؟؟ الموضوع إزاي تكون السخافات دي محور لبرنامج المفروض ان له رساله إعلاميه موش بس ترفيه،حتى والله الكلام ده موش ترفيه،دي قلة أدب

GHARAM يقول...

فاروق عادل

فعلا انا ضحكت على أجابه الشاب ده وكان واضح انه ظريف موش فرفور

الازهرى يقول...

والحقيقة لا أعرف لماذا أعتقدت أن هؤلاء ليسوا إلا من ذوي الأحتياجات الخاصة الذين تأخر نموهم الذهني والعقلي ،وان من اعد لهم البرنامج معاق ذهنيا

لالالالالالا
تزعلى منى لو قلت لك انك مان فى اخبار اتأخرت فى الوصول لكى كتير
دا خبر معروف من زمان ان من الشروط الأساسيه لاختيار المذيعين هى التخلف والعته المنغولى كمان

لكن هى فين مارينا دى ؟

تحياتى
وكل سنه وكل احبابك بخير وسلام

Sharm يقول...

يا عيني على عيالك يا مصر

زهور الامل يقول...

ههههههههههههههه هي المرارة لسة متفقعتش
ده انا مرارتي اتفقعت من زمان لما كنت في الكلية عندنا في المنصورة ونص دفعتنا من صفوة فرافير القاهرة
لما الدكتور بيسال الواد معملتش البحث ليه قاله اصل السيديهاية ضاعت مني
قاله نعم يا بابا سيديهاية؟ هو انتم دلعتوها هي كمان

والله دي حاجة تخلي الواحد يشد في شعره
ما بقاش في اي تناسب
نص الشعب مطحون والنص التاني بقوا فرافير
وربنا يسترها علينا بقى
هو احنا لسة شوفنا حاجة

كل عام وانتي بخير واللهم بلغك رمضان وانتي في احسن حال

تحياتي

صيدلانيه طالعه نازله يقول...

اولا حمد الله على سلامتك و رجوعك للتدوين من جديد
اللى انتى بتشوفيه فى المرامج ده صوره مجمعه مركزه للهيافه اللى بقينا فيها كمجتمع بقى اقصى اهتماماته مايكل جاكسون مات مسلم و لا لأ
و من قتل السندريلا يا ترى اتجوزت حليم و لا كانوا مقضينها ترمس على الكورنيش
فيه قنوات عجيبه فى الدش بيبقى فيها بنات اعجب مع الاعتذار للبنات
و شبا بشعر مقزز و مصطلحات قذره على لسانهم
يا صديقتى الدنيا بقت مشبعه بالمهاذل و المساخر
فتكتكيش فى نفسك لاحسن يجرالك حاجه

momken يقول...

انا مش عارف يا غرام ايه الى بيوديكى فى القنوات دى

امل الريموت لزمته ايه

وياريت المذيع الظريف كان سالنى انا

كنت قلت اكيد مارينا لمت بدليل دخولك انت لحد هنا وكمان جتلك الجرأه تتكلم معانا وتصور

وكنت قلته الله يرحم ولدك كان مقطع راس البر وجمصه

انا جيت اعلق بس علشان وحشتنى كتبتك

وعلشان اقولك كل سنه وانتى طيبه

ويوم ما هحب يا ستى هتكونى اول حد يعرف
لانى هعلنها بعلو صوتى واقول لكل الدنيا انى بحب (وطبعاً هفضح حبيبتى)


وحشنى حديثك اوى


تحياتى

GHARAM يقول...

الازهرى

عندك حق ، بس دول معاقين بمزاجهم

يعني ربنا خلقهم اسوياء وهم بأنفسهم أختاروا الأعاقه

GHARAM يقول...

Sharm

تقصد ياعيني على جمالك ياميلودي

GHARAM يقول...

زهور الامل


كده يابتوع المنصوره تعيبوا علينا بتوع القاهره معلش، ههههههههه

طبعا بأضحك معاكي على فكره انا أصلي من المنصوره

GHARAM يقول...

صيدلانيه طالعه نازله

بصراحه حاجه تجيب تخلف وتبول لا أردي كمان

GHARAM يقول...

momken

اهلا أهلا أهلا بصديقي الجميل ، أنت فين من زمان محدش بيشوفك ليه؟؟ نورت المطرح

SaLLy يقول...

masa2 el 7'eeer:
tab o nesety abo 2eer f alex o 2a7la samak mashwey,tab malahy el ma3mora,el nas beto3 el fosdo2 elly bey3ado 3aleky f share3 khaled ebn el waleed,tab el feter elly bel sokar mn miamy,o 3andek mohamed ahmed beta3 el foul o el ta3meya elly f ma7atet el raml o ya sedy 3ala balba3,o tesepas elly fel ma7atet el raml bardo o takly el gatoh keda wenty 2a3da 3al ba7r,tab kalty gandofly mn 3al ba7r ma3a 7ab el 3azeez allah 3ala aleeeeeeex
allah 3ala el razaz beta3 el moog o howa gay 3ala weshek f sa3et sob7eya]
allah 3ala el shesha ma3a re7et el ba7r kont 3ala toul bashrab shesha cherry
yaaaah wa7ashteny masr o alex awy
ta7eyaty

قيس بن الملووووح يقول...

زمان كانوا بيقولوا تعالي في الهادفه واتصدر...دلوقتي بيقولوا تعالي في الهايفه واتصدر.
تحياتي
لا تحرمونا من زيارتكم

أم بتول يقول...

مش ها علق على البوست ، لكن ها علق على المدونة كلها لأن دى اول زيارة لى ، و سعيدة بتعرفى عليها ، مدونة متميزة ، جميلة و اسلوبك هادئ و بسيط ، تحيتى و لى عودة مرة أخرى للتعليق على البوست .
مودتى و احترامى

طوبة ذهب وطوبة فضة يقول...

عارفه انا اللى مررتى اتفقعت المثل بيقول ايه الفرفور الفاضى يعمل ايه يروح مارينا طبعا كل سنه وانتى واسرتك الكريمه يارب بكل خير وسعاده وخافى على مرارتك وابقى اطفى التليفزيون احسن البنت عندها مراره هى كمان

mahasen saber يقول...

كويس انهم مقالوش لمت لان بيرو ابنى بيروحها كل خميس
احمدك يا رب ان محدش جاب سيرته

البرامج دى واليى بيقدموها هما اليى بيدخلوا شباب زى الورد يجرى يقطع تذكرة موت لمركب غرقان من قبل ما يركبه
فعلا افكار مستفزه وبشر يجيبوا الضغط

قيس بن الملووووح يقول...

الي غرام
القضية ليست بهذا التعصب رجل وامراءه ولكن هناك رجالا يملكون الكثير من رغد العيش وليس في حاجة الي ماتحصل عليه الزوجة من عملها والزوجة تتمسك بالعمل وهم يمرون بنفس الاحداث القضية ان المرأه استعذبت دور لم يرسمه لها الخالق ومن هنا كان الخلل مع الاقرر بكل ما تقولين عن تحمل الزوج تبعه كبيرة في هذا الامر..
لكن دعيني اسألك سؤال لو انت سيده عامله وطلب منك زوجك ترك العمل مع الاخذ في الاعتبار انه اصبح ميسورا ماديا ماذا سيكون القرار؟ ارجو التمهل قبل الاجابة

Desert cat يقول...

هو اينعم اللى شوفته السنة دى ان فعلا مارينا لمت ده ناقص يفرشوا الملايات الكاروهات وحلل المحشى بس ياريت اللى مش عجباه مش ينزلها تانى بدل ما يعملوا لها برنامج ويقعدوا يستظرفوا بالشكل ده

harmless يقول...

ممكن يكون المذيع والمعد والبرنامج كله هيافه فى هيافه

بس ممكن العكس
ممكن يكون قاصد يظهر هذه الشريحه التافهه ويفضح طريقه تفكيرها ويظهر سذاجة اهتماماتها

كمان السؤال ممكن ان يكون خبيثا جدا
تخيلى حد بيسألك عن المكان الذى تعيشين فيه هل هو "لم" ولا لأ

مجرد السؤال سيعطيكى انطباع ان هناك رأى ان المكان "لم"
وسيضعك فورا فى موضع الاتهام او الشبهة انك من الذين جعلوا المكان "لم"

السؤال على سذاجته غير لائق والاجابه عليه تحتاج لذكاء او وقاحه (كما فعل من قال المكان "لم" بيكم)

ياترى لو وجه لك هذاالسؤال فى منطقة سكنك ماذا سيكون ردك؟

قيس بن الملووووح يقول...

اختي الفاضله/ غرام لقد شخصنتي المسألة ( وربما انا السبب بسؤالي لك ) واخذت في ضرب المثل بك وبابنتك حفظها الله وتمم لها بخير ولي بعض الملا حظات التي اوجزها في الاتي.
1-انا لست ضد عمل المرأة طالما طالما طالما لم يؤثر علي الحياة الاسرية او يحدث خللا بها ما مسألة صقل الشخصية فهذه مسألة نسبية .
2-الاسلام(المنزل من عند الله) لم يمنع المرأة من العمل وقد حاربت ومرضت ونقلت العلم حتي ان الرسول يقول عن السيدة عائشة "خذوا نصف دينكم عن هذه الحميراء".
3- الرجل العاقل لا يريد من المرأة ان تكون لعبة في يده ولكن ان تكون سكن ورحمه فإذا ما فقد السكن والرحمة في بيته فأين يجدهما .
3- لا حظي انك عندما تقرائين مقالاتي لا تنظرين الي ما اوجه من نقد لدور الرجل ومن اخطأء يترتب عليها اخطاء من الزوجة.
5- تقولين(المرأة العاملة امرأة يمكنها أن تكون ثابته وقويه في مواجهة رياح التغير العائلي مثل موت الزوج او الطلاق، أو الزواج من رجل بخيل لاينفق عليها، أو الزواج من رجل لايعرف حقوقها أولا قبل واجباتها)الثبات من الله والرزق من الله وانا اعرف الكثيرات من الذين وجدوا يسارا بعد رحيل الزوج او الطلاق وعاشوا حياة تعيسه او فاشله فليس بالخبز وحده يحيي الانسان كل شئ نسبي وليس هناك مطلقا .

6-تقولين (
وكأن الرجل لا هم له في الحياه إلا أن تتزين له المرأة وتضع المساحيق على وجهها)
وهل هم المرأة ان تتزين لغيره؟وهل حب الرجل لزوجة تتزين له يصادم الفطرة؟
**عودي الي مقالتي السابقة وسترين كيف انتقدة الرجل الذي لا يتزين لزوجته.
7- تقولين(
وأعذرني ياصديقي لم تعجبني ابدا جملتك (حتى الكلمات اللينة التي تصل أحيانا الى حد الخضوع بالقول من نصيب الزملاء في العمل)معذرة أي كلمات لينة التي تصل الى حد الخضوع وأية أمرأة تفعل ذلك،من تفعل ذلك ياسيدي أمرأة لاتحترم نفسها وكيانها، ولا تعرف الكرامة والكبرياء، وليس معنى ذلك أن تتشاجر المرأة مع زملاء العمل أو تتحدث معهم بنبرة تخلو من الإحترام، ولكن ما المسه في تلك الجملهانها عباره تسيء الى المرأة العاملة التي تخضع لزملاءها ( عباره تهين المرأه)


عمل المرأة ليس الشماعة المناسبة لتعليق أخطاءنا عليها)
عندما اتحدث عن العلاقة بين الزملاء والزميلات في العمل لا يعني ذلك اني اعمم الظاهرة ...ولكنك تضربين المثل بعملك كصحفية وهذا ليس مقياس لا ن الصحفية دائما ما تجري وراء الاخبار وتتتابع التحليلات فليس لديها من الوقت ما يمكن ان يضيع في الرغي لكن انظري الي دور الحكومة الموظف لا يعمل اكثر من 27 دقيقة والباقي فطار وحكاوي تصل الي الخصوصيات ومن هنا يبدأ الخضوع في القول وياريت تسألي حد من الذين يعملون في دور الحكومة علي مثل هذا وعلي فكرة هذا لا يمنع ان بعضهن يعملن هذا بحسن نية وبحكم العادة التي تقتل الاشياء كما ان هناك منهن من يرفض الحديث بمثل هذه الطريقة حتي مع زميلاتها لانها تعرف للبيت حقه وصون سرة...حتي في ظل الاحترام في التعامل يجب ان تكون هناك حدود تميز علاقة الرجل بالمرأة عن علاقة والمراة بالمرأة.
**سيدتي انا لا اكره المرأة ولا عملها طالما طالما طالما...الخ ولا استطيع ان اعيش لحظة واحدة بدونها طالما في يدي الي ذلك سبيل لكن عندما فكرت في ان تكون مدونتي منبرا يرسم علامات علي الطريق للتحذير والهداية كان يجب ان اكون صريحا غير مجاملا لجنس علي حساب الأخر
وعندما تقرئين البوست السابق عن الحب الاول تعرف كما صنعت مني المرأة علينا ان نناقش بعقلانية وبدون تحيز نعم لا حظي ان الرجل يخطئ عندما يقبل هو هذا الخضوع بالقول او يدفعها اليه.
انا سعيد جدا بهذا النقاش ومن المؤكد ان اختلاف الري لا يفسد للود قضية
تحياتي

سمكه واحده يقول...

ههههههههه
فكرتني زمان ببرنامج انا واختي كنا بنقعد نتفرج عليه بليل علي القناه الخامسه علي البحر والهوي وكده والمذيعه بتتكلم عن الحب والعبط ده
جه واحد قالها اه انا بحب الحب في البحر
انا سمعت الكلمه من هنا ومت من الضحك كنت لسه طفله بس قلت ايه العبيط ده وطبعا اتريقت يعني بيحب انهي حب في البحر بظبط حب المايوهات ولا حب ايه اللي بيبقي في البحر مهي بتبقي هيصه بقي بعيد عنك ربنا ما يوريكي
من يومها علقت معايا الجمله دي
اصل انا هحب الحب فين صحيح مهو الجو عندنا بيبقي حر!!

بس تصدقي عجبني اللي علق وقال اكيد لمت عشان انا موجود اصلي كنت هرد نفس الرد بردو
والله ما تعرفي احلي حاجه فينا كمصريين ان احنا بنقول علي نفسنا او كل واحد بيتهم الاخر انه هو اللي لم ومتعرفيش البلد دي مين فيها اللي بقي يلم ومين اللي ملموم
كله علي كله لما تشوفه قوله
خلينا كده جمب الحيط وربنا يرحمنا بقي ويطلعنا منها علي خير ونتلم كلنا بقي

بقلك ايه
كل سنه وانتي طيبه
ووحشتيني اوي
تحياتي

GHARAM يقول...

قيس بن الملووووح


فعلا كلامك مظبوط ن أما بخصوص الرد على البوست عندك فقد كتبت تعليقا في مدونتك


تحياتي وأحترامي

GHARAM يقول...

أم بتول

شرفتي ياعزيزتي

GHARAM يقول...

طوبة ذهب وطوبة فضة

على رايك الواحد حايتفقع من أيه والا أيه؟؟؟

GHARAM يقول...

mahasen saber

وحشتيني ياقمر 14

GHARAM يقول...

Desert cat

ياقطه فيه بلاجات بفلوس في مارينا لسه مالمتش


قبلاتي

GHARAM يقول...

harmless


ومن لايفلسف الأمور غير هارملس، بالطبع لايفت ومالك في المدينة


اما لو حد وجه لي السؤال على المكان الذي أعيش فيه


حا اقول ل طبعا المكان شيك وكلاس وكل اللي فيه ناس محترمه، وحتى اللي كان بيئه وجه سكن هنا ،،،المكان نضفه وبقى يحاول يرتقي بنفسه ويكون على قدر مستوى الناس اللي موجوده


أيه رأيك في الأجابه حلوه؟؟؟

GHARAM يقول...

سمكه واحده

يا اخواتي على بنوتي الحلوه اللي لما كنت في أسكندريه حاولت اتصل بيها يطلع لي واحد ياناس اعمل ايه بس في اللي مقرصنين على خط بنوتي

الشنكوتي الكبير يقول...

يا ستي فرافير بقى
ههههههههههههههههههههههههه

اولا المصريين بطبعهم يحبوا دايما يعيشوا في دور العارفين ببواطن الأمور الناقدين لكل شيء وانهم دايما المتكلم منهم هو اللي مبيغلطش
مثلا رأيك ايه في ظاهرة الزباله في الشوارع اصل الناس حضرتك بقت زباله وبيعملوا كذا وكذا وكذا طيب وانت مبتعملش كده يقولك ابدا ده انا ابن ناس جدا وهو اصلا ابن كلب معفن ولسه كان بيعمل زي الناس على الحيطه اللي جنبه
ومش هقولك طبعا على واحده زي فتاة ميلودي دي اللي المفروض يغتصبوها 5 مرات في ميدان عام علشان الشباب تبرد نارهم منها
دي واحده بتبيع جسمها في اعلان يعني ممكن تعمل اي حاجه مش بس مشهد في فيلم بس حد يعبرها وهي هتقول اوكي فورا انما طبعا لازم تترسم على ابونا في التلفزيون الأهبل اللي استضافها
حاجه غايظاني قوي بقى يعني ايه لمت هو اي حته في بلدنا ممكن تبقى مقتصره على ناس من طبقه معينه والباقي ثالة المجتمع محرمه عليهم
الناس بقت تحط نفسها في مستوى وتعتبر باقي الشعب احقر من انهم يتساوا بيهم
هقولك ايه الواطي هيفضل واطي

وانا عن نفسي عايز اروح مارينا بس اتفرج على الأنفتاح الملابسي اللي حاصل هناك


حسبي الله ونعم الوكيل

سلاااااااااااااااااااااااااام
وحشتني مواضيعك اخوكي ايهاب

غير معرف يقول...

نا اول مرة اقرا المدونه وبجد حلوة اقويييييييييييييييييييييي وبجد انا بحييكي عليها وربنا يوفقك بجد انا نفسي اتعرف عليكي انا اسمي هبه وعجباني اقوي الموضوعات لاحضرتك كتبها عن المرة وعن الرجل يارب تقري تعلييقي وتردي عليه


هبه

مثلية وجدت ذاتها يقول...

غرام ياسكرة

انا جيت اقول رمضان كريم واهنيكي بحلول الشهر الفضيل اعاده الله عليكم بالخير

GHARAM يقول...

الشنكوتي الكبير


صدقت ياشنكوتي

GHARAM يقول...

هبه

اشكرك وعلى تواصل إنشاء الله

GHARAM يقول...

مثلية وجدت ذاتها

كل سنه وانت بصحه وسلامه ياجميله

micheal يقول...

كنت سايب كومنت قبل كده ع البوست ده بس مفيش مانع نسيبه تاني
واضح كده أن مارينا حاليا دولة..أنا مش عاوز أفتي عشان عمري ما شفتها ولا أعرفها..فقط سمعت عنها بس لما قريت الردود الفرافيري بتاع مين يمثل قصة حياتك حسيت أنها فعلا لمت
:)
تحياتي