الخميس، فبراير 12، 2009

كلنا معك يا أسوور



اللى حصل انى انتقلت للسكن فى مكان جديد فى المقطم المكان راق جدا وتتوسطه وتلفه الحدائق تشكوا البنت اللى بتساعدنى فى البيت انها بتتعرض كل ما تنزل تجيب طلب لمعاكسات سخيفة تصل لحد اللمس ،تشكو ابنة اختى التى تقيم معى من محاولات جذبها من ذراعها والتعدى عليها بأقذع الألفاظ وهى جاية من الدرس ،اتضايق واطلب منهما ان تلتزما قواعد الطريق والإحتشام فى الملبس والإلتزام بمواعيد الخروج من البيت ،فى يوم مشئوم .. تعطلت سيارة زوجى واضطر لاستعارة سيارتى ..كان هناك عزاء لفرد من الأسرة يجب ان احضره،اتفقت مع زوجى ان استقل تاكسى وان اقابله فى العزاء بالمهندسين ونعود سوياوبعد أن ارتديت السواد أنا وابنة اختى ذات ال 15 ربيعا .. طلبت صغيراتى بعض الحلوى قبل ان اذهب للعزاء اتجهت لأقرب كشك سيرا على الأقدام وهو على بعد 200 متر من المبنى الذى اقطن قيه .. اشتريت ما اردت وسرت عائدة الى البيت لأعطى الحلوى للصغيرات واتجه للعزاءاثناء سيرى لاحظت عدد كبير من الشباب يقفون فى الشارع على الناصية ،بعضهم يقف بجوار سيارته فارهة كانت ام لا وبعضهم يجلس على الرصيف ،وتستطيع ان تشتم رائحة الحشيش واضحة فجأة بدأت سيارة بيضاء فى اللف حولى انا والفتاة فى استفزاز مع الأمركة واستخدام الفرامل بطريقة مستفزةوفى محاولة للنجاة قلت للولد اللى سايق العربية .. عيب .. عيب انا عندى ابناء فى سنك ،ولم يهمه ما قلت طبعا .. بل انه زاد من وقاحته وبدأ يوجه لى كلمات وشتائم غاية فى البذائة كنت على بعد 100 متر تقريبا من بيتى ولم استطع التحرك بسبب التفاف بقية اصحاب الولد اللى فى العربية حولنا وابتدوا يوجهوا لنا الفاظ خارجة وتخدش الحياءحاولت ان اردعهم ببعض الصياح ولكن لرقى المنطقة الشديد لم يهتم احد رغم ان البعض القى نظرة من شرفة منزله واكتفوا بالفرجةوفجأة وبطريقة مسرحية خلع احد هؤلاء الشباب حزامه فى محاولة لتخويفى وتهديدى بالضرب عندما بدأت فى الصياح حقيقى خفت .. بل اترعبت .. وحسيت انى محشورة فى الحتة دىمش عارفة اوصل بيتى ومش عارفة ارجع للشارع الرئيسى ولا حتى فى حد ينجدنى من المارة او السكان ،اتصلت بالنجدة من الموبايل وانا اقف فى مكانى .. حضر ملازم اول اسمه مهاب الشبوكشى من نقطة شرطة المقطم .. وبدأت بعض السيارات تفر طارد الضابط الشجاع احداها فى محاولة يائسة لإيقافها فلم يفلح وكاد قائدها ان يصدمه بالسيارة اثناء فرارهوكان مازال الفتى ذو السيارة البيضاء موجودا فى المكان بس ركن العربية على جنب و خلاص اشرت الى السيارة البيضاء التى بدأت الموضوع بأكمله وكنت قد سجلت رقمها على الموبايل والى الفتى الذى تحدى كل الأعراف فقام الضابط باصطحابه للنقطة ،وهناك حررت محضر متهمة اياه واخرين بجنحة خدش حياء انثى فى الطريق العام ،والولد بالطبع بينكر وبيقول مش انا دة انا كنت واقف بأتفرج ..حضر ابوه ليفاجئنا انه مع ابنه قلبا وقالبا وقال لى بالحرف الواحد بمنتهى الكبر والعنجهيةانتى بتدعى عليه .. هو مش من سنك عشان يعاكسك اصلا فاجبته ان الولد بالفعل مش من سنى يعنى ما اعرفهوش قبل كدة ومفيش ضغينة ضده،وقصصت عليه ما حدث .. ولكن لا حياة لمن تنادىفى الحقيقة انا انتظرت ان يحضر الأب قبل ان اوقع على المحضر على امل ان يوبخه ابوه ويعرفه غلطه ،لكننى فوجئت انه يدافع بشراسة عن الولد الذى بدا لى انه قد افسده الدلال، الولد ذو ال 19 عاما وهو طالب طبعا ..اتحول للنيابة التى حددت جلسة للحكم فى القضية وتهمته خدش حياء انثى واخدت رقم 3038لعام 2009 جنح الخليفةا نا الآن فى ازمة بسبب ان اهل الولد يقولون انى مفترية وانه مجرد عيل وطالب وانه مستقبله هيضيعوا فى نفس الوقت يتصل بى كل شوية ناس من طرفهم ..من أول معاون مباحث للواء مش عارفة ايه على مساعد وزير داخلية للضغط على للتنازل والتصالح وانا لا اريد ان اتصالح واريد فقط ان العدل ياخد مجراه وان الولد دة يبقى عبرة للى زيه ولأهله واهالى الولاد اللى بيستهينوا بالآخرين ،زوجى يؤيدنى تماما رغم تعرضه للضغط برضه بمكالمات من ناس كبار .. لكن اجابته كانت واضحة فى ان انا اللى اتأذيت وان انا الوحيدة اللى اقدر اقرر ايه اللى يتعمل بحثت فى القانون وعرفت ان المادة 306 من قانون العقوبات رقم 95 لسنة 96 بتنص على انه " يعاقب بالحبس مدة لا تتجاوز سنة وبغرامة لا تقل عن مائتى جنيه ولا تزيد عن ألف جنيه أو بإحدى هاتين العقوبتين لكل من تعرض لأنثى على وجه يخدش حياؤها بالقول او بالفعل فى طريق عام او مكان مطروق ،فما هو موقفكم من الموضوع .. هل انا صح ام لا؟؟؟






=================



هذا البوست منقول من مدونة آسوور، وأنشره تضامنا معها وليكن لنا جميعا موقفا موحدا ضد تعرض أي مدون للأيذاء والتهديد من الآخرين






===============


تحديث




هناك 32 تعليقًا:

أسوور يقول...

طبعا اذا مكانتش غرام يبقى هيكون مين؟؟؟
تعرفى انا كنت واثقة ان دة هيكون موقفك

غرام .. انتى عملتينى ازاى اكون جريئة وانا بأدون ومعملش حساب حد وانا بقول رأيى

دلوقتى بتعلمينى ازاى اكون قوية فى الحياة زى قوتك فى التدوين

ربنا يخليكى لية وللتدوين

رئيس جمهوريه نفسى يقول...

انا متضامن مع آسر ولازم تستحمل كل الضغوط لحد ما ترمى الحيوان اللى اتحرش بيها فى السجن مع قناعتى انى دة مش حل جذرى للمشكلة التحرش بس على الاقل تأدب الحيوان دة لانه اكيد لية سوابق ولو تنازلت اكيد حيقول انا محدش يقدر يعمل ليه حاجه وحيكرر عملته تانى
فبكررها تانى يا آسر اوعي تنازلى

EmY يقول...

هي عندها مليون حق ولازم تصمم علي موقفها
في الحاله بتاعتها مش كفايه حبس لولد لازم ابوه يتحبس قبله لانه هو شخصيا مش متربي و محتاج يعرف يعني ايه عيب و اخلاق
اتمني انها تاخد حقها و الظاهره د تختفي بقي

nouna يقول...

مع اسور الى النهاية واوعى تتنازلى عن حقك زمان الناس كان عندها نخوة ودم مش عارفة راحو فين

mahasen saber يقول...

غرام الجميله حبيبتى حضرتك وحشانى جدا جدا

وطبعا طبعا كلنا مع اسر

ودايما رائعه يا غرام
وقوية الروح ومفعمه بالقضيه النسائيه يعنى

حدوتة الفارس يقول...

محمد مكنش ليه زوجه
ربنا هيرزقه بيها ف الجنه

كان مفروض تكون الزوجه دى هى انا بس هو مش وافق
مش وافق لانه كان بيحبنى بجد
ولانى كنت بحبه طلبت منه اكون هى وهو مارضيش علشان تعبه وفضل انى اختار حياه مستقره مع حد تانى

بس انا كنت بحبه ولسه بحبه وبموت من غيره

ادعيله دايما بالرحمه
وادعيلى معاه لانى ميته من غيره

قيس بن الملووووح يقول...

اولا انا شاكر زيارتكم الكريمة لمدونتي .
ثانيا:-كنت اتمني ان اعيش ما بقي من عمري وهو بلا شك اقل كثيرا جدا مما مضي في هدوء ودفء عائلي...لكن ليس كل ما يتمناه المرء يدركه.
رجاء دوام التواصل

حسن ارابيسك يقول...

العزيزة غرام
أعتذر عن تأخري في التدوينة السابقة وسببه أنني قليل ما أدلف للبريد الأليكتروني

أما مايتعلق بموضوع آسوور
بلا شك ومن الطبيعي أننا نتعاطف ونتكاتف معها جميعاً ليس لأنها مننا من أهل المدونات حتى لانحصر الموضوع في زاوية معينة فالقيم الجميلة والعلاقات السوية نؤيدها ونتكاتف معها سواء في عالم المدونات أو غيره

والحقيقة أنا أخبرها كأخ أن السماح من شيم الكرام، وأنا اقول لها أن تكتفي بهذا ليس لخوف أو لضغط يمارس عليها ولكن على أساس أن الولد وأهله في تلك الحالة بالتأكيد في حالة هلع وقلق لما صدر من إبنهم وخلينا نقول أن نكتفي بذلك كما يقولون أولاد البلد قرصة ودن حتى لاينسى تلك التجربة التي رأى فيها بأم عينه هو وأهله أن مستقبله على المحك فلعل وعسى تكون خطوة أسوور الأولى درس لن ينساه ونقطه تحول وخير له في حياته لن ينسى فيها هو وأهله كرم من عفت عنه لكن من الضروري طبعاً إفهام الجميع من أهل الولد ان تلك الخطوة من أجل مستقبله وأنها لاترضى هذا الضر البالغ له وان خطوتها تلك ليست عن ضعف أو خوف أو ضغط وعفا الله عما سلف
تحياتي
حسن أرابيسك

الازهرى يقول...

موقف الاب يتكرر كثيرا هذه الايام لانه فى الحقيقة يدافع عن نفسه ويحاول الا يبدوا مقصرا فى تربيته وتنشئته

وإذا كنت مؤمنة أنك تقومين بالأمر الصحيح (وهو فى رأيي كذلك )فلا تتنازلى عن موقفك مهما كانت الضغوط
والكل بالطبع سيتضامن معك ما دمت تطالبين بحقك

تحياتى دوما

مثلية تبحث عن ذاتها يقول...

غرام

دايما بوستاتك هادفه انا معرفش اسور لكن اكيد متضامنه معاها ولازم تفضل على موقفها


كل عيد حب و انت بألف خير

fashkool يقول...

السلام عليكم غرام هانم .. تحياتى
الموضوع ده مش عارف الواحد يعمل فيه ايه .. الولد قليل الادب .. والاب انانى وحقير .. والمجنى عليها لها الحق وكل الحق .. انتى منتظره ايه من واحد يعطى ابنه عربيه بالشيئ الفانى .. وهيعمل بيها ايه .. طبعا اكيد هيعاكس بنات الناس ..
نصيحتى .. تسيبهم يترعبوا كدا شويه عشان يعرفوا ان ربنا حق .. ورعبهم فى حد ذاته عقاب ورادع .. وربنا يهدى العاصى
تحياتى يا غرام هانم

إيمان يقول...

أولا : سعيده إنى إتعرفت على مدونتك عزيزتى غرام
ثانيا : ماحدث لاسوور شيئ فظيع
كل مره امشى فى الشارع ببقى خايفه يحصلى
وكان هيحصل معايا مره وانا فى المعادى وبعيده عن البت حوالى ثلاث دقائق علشان كده حسيت بيها جدا وهى بتحكى الموقف .. معرفش أيه الموقف الصح اللى مفروض تاخده
بجد مش عارفه .. وبتخيل لو أنا مكانها كنت هبقه محتاره جدا
ربنا يلهمها الصواب ان شاء الله
لأن ربنا دايما مهما حصل مع المظلوم
ربنا يقويها .. ويحفظنا

عاشقة حبيبتى يقول...

غرام
انا متضامنة قلبا وقالبا مع موقف سوارر بس عايزة اسأل سؤال لو الولد اتحبس فكرة ان هيفوق صدقينى لا بالعكس دخولة سجن سنة يعنى ٩ شهور ممكن يدمرة اكتر ويخلية اكثر انحراف
أعتقد ان التجربة فى حد زتها ممكن تفوقة ودخولة السجن والبهدلة هتديلة درس
أعتبرية ابنك وسمحية والمسامح كريم ربنا يوفقك للصح

أحــوال الهـوي يقول...

حينما بات القراءة احسست ان اسلوبك القصصي قد فقد بريقه و ان من يكتب قد فقد البناء الفني و الايقاع المتناغم و في نهاية الموضوع ادركت ان الموضوع منقول فتنفست الصعداء
طبعا جميعنا نؤيد الاصرار علي الموقف و الثأر لكرمتنا من استهتار الناس بالاعراض و اهمال الابوين بتربية ابناءهم
ان مصر كانت مـأمونه علي النساء الا من حوادث فرديه متناثرة و اذا تحولت الان الي ظاهرة فلابد من وقفه
و احيي شجاعة اسوور التي و ضعت نفسها امام الناس لترثي مبدا و تقيم قدوة لعلها تكون رادعه لامثال هؤلاء

تحياتي

دنـيـا محيراني(ايناس لطفي يقول...

شكرا يا غرام علي المرور
وطبعا كلنا مع اسر ومع اي سيده تتعرض لانتهاك في الشارع ولازم نكون ايجايبين نتعلم نكون كده
ربنا معانا كلنا هاخد البوست بتاعك من ضمن اللينكات المتضمانه مع اسر
تحياتي

fashkool يقول...

غرام هانم
اشكرك على التعليق
دائما سباقه
ومنوره ومشرفانى
تحياتى

أنا... و هي يقول...

عزيزتي اسوور لا يوجد ما يمنعك من الاصرار عموقفك غير انك تكوني مهدده تهديد فعلي من ناس لا ترى غير مصالحها فقط
ان لم يكن هنالك ما يهدد حياتك واسرتك فاستمري برعايه الرحمان عالاقل تكوني راضيه عن نفسك
وبحيي زوجك على موقفه الجميل وده بحد ذاته دعم كبير وعظيم
ان لم يكن حتى القانون كاف لرد حقك اليك ولا تري فيه العقاب المناسب لهذه الفعله البشعه فعلا يكفيكي انك رددت الصفعه لمثل هؤلاء حتى وان كانت برايك اقل ما يمكن..
حماك الله ورعاكي وسدد خطاكي لما فيه الخير
عزيزتي غرام:-
مدونه رائعه تحياتي لقلمك المبدع

اللؤلؤة يقول...

غرام هانم ظاهرة التعرض لأنثى أو التحرش بأنثى أصبحت ظاهرة مجتمعية والملا حظ أنها تشمل الآن أغلب شباب الطبقة الالعليا والدنيا من المجتمع المصرى ولابد من الإعتراف من الدولة بأنها أصبحت ظاهرة ويجب دراسة أسبابهاوكيفية مواجهتها بكل حسم حيث أنه لابد من تشديد العقوبات أكثر من ذلك و أنا متضامن معك قلبا وقالبا.
تحياتى
ويسعدنى التواصل معك

maxbeta3zaman يقول...

طبعا تتمسك بحقها فى القصاص من هذه العصبة التى تحتاج للتربية ..ويضيع الطالب لأنه هو المسئول عن تصرفاته وأيذاء سيدة تمشى فى الطريق ..وأى حد يدافع عن الجانى يبقى مثله يحتاج للتربية ..وأين كان هؤلاء وربيبهم يفعل بالطريق مثل هذه الأفعال الحيوانية ...
أنا جئت اقرأ هنا لما قرأت تعريف للهوى عند أحوال الهوى ...فلقيت قضية
أقوى من التعريفات
تحياتى

فكرة من الزمن ده يقول...

طبعا كلنا معاهاا من غير نقاش
وموقفها هو ده الموقف الصحيح اللي لازم نايدها فيه بس لازم هي كمان تدرس عن قرب عشان مايكونش في خطر لا عليها ولا على حد من اللي يخصها
شكرا غرام على التضامن وبجد انا حسيت بالرعب من التفاصيل دي

المـــفـــــــقــــــــوعـــــة مــرارتـهــا يقول...

للاسف المقطم مجتمع راقي جدا لكن فيه مشكلة خطيرة وهي غياب الامن منها ربنا يحفظنا كلنا

أسوور يقول...

بعد ان مر على الواقعة اكثر من اسبوع .. النتائج كما يلى:

لم يتصل ابدا اى حد من اهل الولد للإعتذار حتى كتابة تلك السطور .. ولو اتصلوا هيبقى فات المعاد وبقينا بعاد بقى

توقفت مكالمات اللواءات بتوعه تماما

تلقيت بعض المكالمات الداعمة لموقفى من كل من :

جهاز الشرطة بذات نفسه .. مدونين اصدقاء .. محامين متطوعين .. جمعيات حقوقية مصرية ودولية .. اقارب .. اصدقاء علموا بالأمر من الفيس بوك .. وسائل اعلام مختلفة

المدونين قوة ضاربة يا غرام و يا ويله اللى يحاول يزعلهم
:)
لم يتحدد ميعاد الجلسة بعد .. وهأعلم بيه الجميع على المدونة انشاء الله

اللى بيحصل لم اتخيله ولم اتوقع كل هذا الدعم ولا انا ولا اسرتى .. الآن انا اكثر قوة .. بكم .. وبقيت مستبيعة ومش هاممنى حاجة

mohamed ghalia يقول...

مش عارف التحرش ده المفروض يتطلعلوا قانون جديد عشان الناس دى تحترم نفسها
دمتى بكل الود

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

momken يقول...

طبعاً كلنا مع اسوور او مع الحق

فرق كبير بين الروشنه والشقاوه
وبين المعاكسه
وبين التحرش
وبين الارهاب

الى بيحصل من شويه عيال تافهه يعتبر خليط بين التحرش والارهاب

الارهاب هو بث الخوف وعدم الطمئنينه فى قلوب المواطنين والمفروض يتحاكم هو والى خلفه ومعرفش يربيه قدام محكمه عسكريه

مستقبل ايه الى تحافظ عليه المجنى عليها للمجرم ده حرام وظلم يكون عيل زى ده شخص مسئول وفايده مصالح ناس
الى زى ده لازم يفرغ نفسه لصرف فلوس ابوة او صاحب مامته حتى لكن ميكونش شخص محترم ومسئول

انا متضامن معاها جداً شكلاً وموضوعاً
وهنتظر صدور حكم رادع على حد زى ده

والشرطه فى المقطم تشوف شغلها شويه لانه مش سر ان المقطم سواء عند كورنيش المقطم او فى ميدان النافوره او امتداد شارع تسعه اصبحوا شوارع ممارسه الدعاره على غرار (شقق دعاره) فى المقطم بقى مش شقق دى شوارع

والى بيحصل فى عربيان وعلى موتسيكلات وعلى الرصيف كمان منتهى السفاله

والى مش بيلاقى وحده يطلع بيها المقطم بيروح لوحده على امل انه يلاقى الى عاوزة هناك
كل ده وقسم الخليفه نايم فى العسل
وكل الى يهمه ترحيلات المساجين واخذ بقشيش من السياح الى ريحين القلعه

وبحيكى جداً يا غرام على مساندتك لصديقتك

تحياتى

قيس بن الملووووح يقول...

شاكر زيارتكم وتعاطفكم وارجوا دوام التواصل حتي تعم الفائدة

blue-wave يقول...

لازم طبعا ماتسكتش عن حقها
والا هانحول المجتمع لغابه

rovy يقول...

السلام عليكم

اختى الكريمه ..
اكيد انا معكى و مع العزيزه اسوور قلبا و قالبا ..
احنا وصلنا فعلا لدرجه من عدم الامان فى الشارع المصرى بسبب تخاذل الناس و ضياع الشهامه و قلة الرجوله و زيادة دلال الاباء و الامهات لأبنائهم التافهين
فكرتينى ببوست كتبته اتمنى ان تقرأيه بعنوان اين انتم يا رجال الوطن ؟؟

احييكى و احيى الاخت اسوور و اتمنى ان تصمد و ان لا تتنازل ليكون عبره لأصدقائه و لمن مثله ..
تحياتى

Don_Lochy يقول...

اسوور صح جدا وبلاش تتنازلي
اذا كان الولد ده ضحيه دلع فهو جاني في موقفك وتنازلك لن يغير منه شيئا
لكن تصميمك هيغير وهيخليه عبره
التحرش مابقاش حاجه فرديه لا
ده بقي ظاهره
وانا بحييكي جدا علي انك متكسفتيش وطالبتي بحقك
لان فيه صوت غلط جاهل جبان في عاداتنا بيقول ان البنت اللي لا قدر الله تتعرض لكده لو اشتكت بتجيب الفضيحه لنفسها

وبيتناسو ان سكوتها بيعرضها هي وغيرها للأذي في مره تانيه
لا يضيع حق وراءه مطالب 0000واحنا معاكي

hasona يقول...

التضامن مش كفاية
لابد من خطوات

اللؤلؤة يقول...

السلام عليكم
غرام هانم
قمت بعمل بحث عن ظاهرة التحرش وكانت النتيجة كالتالى
1- ضعف الوازع الديني لدى الشباب
2- تأخر سن الزواج 3-البطالة لدى الشباب
4- عدم وجود الرؤية
5-عدم وجود القدوة
6- تفكك الكثير من الأسر المصرية
7- ظهور الطبقات الطفيلية وخاصة فى المجتمع الراقى
تحياتى
وأشكرك على دوام التواصل

GHARAM يقول...

الأعزاء الذين علقوا على هذا البوست أشكرككم جميعا