خيبة الزمالك ماوردتش على حد

اتولدت لقيت نفسي زملكاويه، لماذا لأن والدي رحمه الله كان زملكاويا ومن الأعضاء المؤسسين لنادي الزمالك فقد كان رقم عضويته 224،ونظرت حولي فوجدت الأعمام والعمات والأخوال والخالات جميعا زملكاويه، فكيف بالله عليكم أن أكون غير ذلك، وتوارث اولاد العائلة وأولادي أنا شخصيا حب نادي الزمالك برغم الخيبه التقيله التي يعاني منها

وكان والدي رحمه الله متعصبا للزمالك لدرجة تفوق الوصف،فكان يرفض تماما وجود اللون الأحمر في البيت رغم حب والدتي لهذا اللون، اتذكر إنني عندما كنت طفلة صغيرة تجرأت والدتي وأشترت لي فستانا من اللون الأحمر بناء على رغبتي الشخصية، وعندما عدنا الى البيت،ورأي الفستان كان يوم أسود زي كحل العين ويوم ما طلعش ليه نهار ،وقعد يقرفنا من الفستان وقال انه لون بلدي موش بتاع ناس ذوات وقعد يقول لنا شفتم حد شيك بيلبس اللون الأحمر ده؟،طبعا كان نفسي أنا وماما نقول له أه شفنا لكن هيهات أن نتجرأ ونفعل ذلك وما ارتحش الا لما رحنا تاني ورجعنا الفستان وجبناه ابيض

علشان كده طلعت اكره اللون الأبيض وأحب اللون الأحمر، معرفش بحب اللون الأحمر ربما لأنه لون الدفء والجرأة والشجاعه برضه موش عارفه، أو يمكن بيكون حلو على لون بشرتي برضه موش عارفه؟، والا يمكن لأني باحس أنه ملفت وبأكون مميزه فيه برضه موش عارفه

لما كنا نروح النادي واحنا صغيرين كان حماده أمام يقول لبابا ايه ده لابسه فستان أحمر؟ وكان والله موش احمر دا كان ابيض ومتنيل بستين نيله بس فيه وردتين خايبين لونهم حمر، ففهمت ليه بابا ماكنش بيحب يلبس اي حد فينا اي حاجه فيها حته سنتوفه حمرا

وكان بابا متعصب لدرجة تشجيع الفرق الأجنبيه ضد الأهلي ويفرح قوي لما يتغلب الأهلي رغم انه بيمثل مصر، وكانت ماما لما تكون متخانقه مع بابا والزمالك بيلعب تدعى على الزمالك يخسر مع انها زملكاويه

اخواي الذكور لعبا في فرق الأشبال لكرة القدم في الزمالك، ولأن بابا كان عامل عليهم كوتش لوحده ، فيلقنهم دروسا في تكنيك كرة القدم، فأخويا الكبير خدها من قصيرها وقال له الفلات فوت بيوجعني معدتش لاعب، أما اخويا الصغير فقدر يعتق من توجيهات بابا واتجه لرياضة الكارتيه الذي اصبح فيها لاعبا شهيرا فيما بعد

أما انا فما كنش فيه فريق كرة قدم نسائيه والا كان ابويا دخلني العب فيها فرحت لعبت هاند بول والحمد لله ، مكنش بابا بيهتم يشوفي وانا بأتمرن أو العب والا كنت حولت أنا كمان ولعبت كاراتيه

وانا في الجامعه حبيت لاعب سله كان أيه موزه طول بعرض وعيون ملونه وكان مجنن بنات نادي الزمالك ،ولما حب يتقدم يخطبني سألني بابا بقرف من أي نادي ده؟ قلت له من نادي الزمالك فوافق طبعا بس طلع عيني شويه لأنه مكنش عاجبه وانا اعييييييييييييييييييييط وأقول له بحبه يابابا ،ولما جه يتقدم لنا في البيت بابا عمل لعيلته بحث حاله وماوفقش على الجوازه إلا لما اطمن أن العيله كلها والحمد لله زمالكاويه وده طبعا لأنه خايف أن يجي له احفاد أهلاويه لاسمح الله ويهددوا كياننا الأسرى ،المهم اني أتجوزته وعشت معاه لحد دلوقتي ولسه الحمد لله ما اتطلقناش، ومافيش حد فينا أتشل وأتنقط ومات بسبب هزايم الزمالك، وكان طبيعي يطلع ابني وبنتي زملكاويه برضه ورغم أن جوزي زملكاوي الا انه كان بيحب اللون الأحمر وتركني أرتدي كل الأحمرات اللي في الدنيا

ومساكين برضه اخواتي ولادهم زملكاويه،كل العيله عن بكرة ابيها زمالكاويه

بصراحه الزمالك باي بالنسبه لي دين اباءي وأجدادي وبيتهيألي أني حا اكقر لو غيرته،ولادي قرفانين من الزمالك بس موش عارفين يغيروا، فقلت لهم أحسن حاجه لازم نطعم العيله دي بناس أهلاويه(نعمل لها ريسيكل إعادة تدوير يعني) علشان الجيل الجاي يطلع أهلاوي، مره ابن خالتي الطفل الصغير (ايامها) تمرد على كونه زملكاوي من كتر الهزايم اللي بيفرحنا بيها نادي الزمالك ورمى علينا قنبله وقال انا أهلاوي، اجتمع مجلس إدارة العيله للمصيبه اللي الواد قالها، وكانه خرج عن دينه وكفر واجتمعوا بيه وفهموه (أه والله) ان تشجيع الزمالك ده زي الدين بالظبط محدش يغيره والا يبقى كافر، والواد يعيني صدق ورجع تاني زمالكاوي ، دلوقتي هو أتجوز أهلاويه، وبنتي سارت على الدرب وأتخطبت لأهلاوي ، لسه ابني واللي أكد لي أنه لايمكن يتجوز زملكاويه كفايه هو

امبارح قال بتفرج على الماتش وانا متأكده طبعا انه حايتغلب من عدونا اللدود الأهلي، والله الزمالك ده بيفكرني بمصر المنحوسه المتعوسه،والأهلي ده عامل زي إسرائيل الدنيا مزهزه معاه جتنا نيله في حظنا الهباب

طيب قولوا لي انتم الحل الناس خيبتها السبت والحد وخيبة الزمالك ماوردتش على حد، قودوني الى النور، إزاي وبعد العمر الطويل ده وحب نادي الزمالك اللي ورثته من بابا اقدر اغير اللي أتولدت فيه ونشأت عليه

علقوا بس والنبي راعو مشاعري كزمالكاويه مجروحه ومنقوطه وموجوعه ومفقوعه ومتغاظه وموش عارفه أنام الليل

===========================

تحديث

الله يرحمك يابابا أنت السبب

تعرفوا ان أخويا الكبير لما بيروح يزور بابا في قبره ، يقعد يحكى له عن اخبارنا وأيه اللي بيحصل ويطمنه إننا بخير، وبعدين يقول له بس يابابا موش عايز اخبي عليك أخبار الزمالك موش بخير، تصدقوا دي آه والله أخويا بيحكي لبابا اخبار الزمالك أول بأول

وكانت ماما الله يرحمها تقول لأخويا بلاش بأي تقول لأبوك الكلام ده، بلاش تنكد عليه