
مرت اربعة شهور على أستئصال الورم الخبيث الذي أصاب أحد ثديي ،وقد بدأت جرعات الكيمو ثيربي بعد الجراحة بشهر تقريبا،وذلك بعد أن قمت باللف (كعب داير)على الأطباء المتخصصين في هذا المجال،والحقيقة أنني رأيت جشعا لم أراه في حياتي،فمنهم ماهو متخصص في العلاج بالأشعاع إلا أنه(داخل في العلاج بالكيمو فهلوه علشان لقيها سبوبه حلوة) ،فعلاج السرطان عفاكم الله منه مكلف جدا،ومع أنني أجتزت مرحلة منتصف العلاج الكيمائي إلا إنني وحتى يومنا هذا مازالت مذعورة مما حدث لي،فلم أكن أفكر يوما بأن هذا المرض اللعين قريب جدا مني بتلك الصورة، ولم أكن أتخيل أنه سيهاجمني في نفس الوقت الذي قررت فيه العودة من الإمارات نهائيا والأستقرار في مصر،ورغم الدعم والمسانده التي لقيتها من زوجي وأولادي وأصدقائي وصديقاتي حتى هؤلاء الذين لا أعرفهم شخصيا وهم من أصدقائي على الفيس بوك والذين أقترب عددهم الى الألف،إلا إنني ومع مرور كل تلك الشهور مازالت أحاسيس الفأر المذعور من وقوعه في المصيدة هي المسيطر الأول على كافة تصرفاتي
وكانت أصعب جلسات الكيمو ثيربي هي الأولي حيث أنني لم أستطع تناول أية أطعمة واكتفيت بالعصائر التي اجبروني عليها،وشعرت بوهن شديد وجفاف في الحلق وإسهال متواصل وألم شديد بالعظام وخاصة العمود الفقري ،وشعور بالغثيان،ثم قلت تلك الأعراض مع الجرعة الثانية،ثم أصبحت أواجه الأمر بشجاعة مع الجرعة الثالثة،وخلال تلك الجرعات أنصب أهتمامي على التغذية حتى تقوي جهاز المناعة كي أستطيع أخذ جرعات الكيماوي التالية في مواعيدها دون تأخير،ةالحقيقة رغم فقداني لأربعة كيلو جرامات في الجرعة الأولي إلا أنني أستعدتهم ثانيه فيما بعد،فلم أعد أهتم بقوامي كثيرا،ولم يعد يزعجني أن يزيد وزني ،مايهمني الآن هو أن يتم الله شفائي على خير والا يعود لي هذا المرض ثانية،ورغم أن الجرعات التي أخذها هي من الأدوية الحديثة التي لاتستقط الشعر بالكامل إلا أنني وحتى الآن فقدت تقريبا نصف شعري،وهذا أيضا لم يعد يهمني فقد أخفيته بالإيشاربات ،وأكدت لي الطبيبة أنه سيعود اجمل مما كان بعد الإنتهاء من العلاج
وقد قررت طبيبتي الدكتورة علا خورشيد ان أخذ جرعة الكيماوي على جلستين، فربما رأت إنني لا أستطيع تحملها مرة واحدة،والنصف الأول من الدواء يكون في اول الأسبوع والثاني في آخرة ،وتتركني 21 يوما ثم أعاود الكره من جديد،ولكن تمنحني الطبيبة تعليمات مشددة تمتد من اليوم الثامن من الجرعة وحتي اليوم السادس عشر،وهو أسبوع ضعف مناعة الجسم الذي يتسببه العلاج الكيماوي،فلا طعام من خارج المنزل ،،وعلي الا أتناول أي طعام دون تسخينه لمدة دقيقة على الأقل،ممنوع تماما تناول الخضار كسلاطة أوالفاكهة والزبادي،وعدم الجلوس او التواجد في اماكن مغلقة، وأذا إضطرتني الظروف علي بإرتداء الكمامة لوقايتي ،كذلك عدم مخالطة مرضي
وخلال الفترة الماضية سيطر على الأكتئاب وقررت الذهاب الى الدكتور أحمد شوقي العقباوي لمساعدتي في أجتياز ما أمر به والحقيقة أنه وصف لي بعض الأدوية الخاصة بالإكتئاب ومنوم كادت أن تقضي على مع جرعات الكيموثيربي فقد كنت أشعر بدوار وأحيانا أجد نفسي وقد أقتربت من الأغماء الكامل،وأثناء الكشف قرر الطبيب النفسي أن أتي اليه في جلسة فضفضة بعد اسبوعين( بس بثلاثمئة جنية)والحقيقة لقيتني علشان أنهي جميع آلامي وعقدي والصدمات التي تعرضت لها من أعز الناس لدي ،،وجدتني أحتاج للكثير من الجلسات التي سأدفع فيها دم قلبي وربما لن تفيدني بشيء،،والحقيقة ورغم حبي الشديد وأحترامي لأستاذ الطب النفسي الدكتور العقباوي إلا أنني تراجعت عن زيارته عندما قال لي(أنت ست مؤمنه ،وعليك أن ترددي دائما لن يصيبنا إلا ماكتب الله لنا)نعم أنا مؤمنة تماما بهذا ،بل أنني عندما دخلت للكشف قلت له أرجوك لاتستشهد بأية أيات قرآنية أو أحاديث دينية فانا والحمد لله أعرف جيدا مايقولة الله عز وجل ،وأحفظ الكثير من الأيات القرآنية واحاديث الرسول(ص) لأنني والحمد لله قربتني المحنة من الله أكثر من قبل ،ومؤمنة تماما أن أمرنا كله بيد الله وأن ما أمر به محنة في صورة منحه منه لأقترب أكثر من الله ليرض عني ويمحو جميع ذنوبي ،وأن لي مكانه ومنزلة في الجنه لم تكن أفعالي كافية ليضعني فيها الله سبحانه، فأختبرني بالبلاء وأنا والحمد لله راضية لكنني لا أريد الإستسلام وأرغب في مواصلة الحياة
===========
امتنعت عن دواء الإكتئاب لأنني فكرت كثيرا لإنني فكرت كثيرا في اذا كنت مريضة لي ديانة اخرى او والعياذ بالله كنت لادينية،ماذا كان سيقول لي الدكتور العقباوي
اتجهت لقراءة الكتب الدينية التي تفسر القرآن الكريم، وكتب الشخ الغزالي،واصلي الآن الفجر حاضرا واواظب على الأذكار والدعاء والتسابيح وقرآة القرآن
اشتريت بعض الكتب الخاصة بالأنتصار على مرض السرطان،وكتب مترجمه عن مكافحة الأكتئاب والقلق ونصيحة شخصية مني ،هي كتب لافائدة منها وزادت من قلقي وتوتري
والأهم الذي ارغب في توضيحه أنني وخلال جرعات الكيمو ثيربي تعرفت على نساء ورجال يتعايشن مع انواع عديدة من السرطانات في اجسادهن أدعو لهم ولي بالشفاء،والشيء المؤكد الذي أرغب في أن يعرفه مرضى السرطان أن كل حالة مرضية لا تشبه الأخرى بأي حال من الأحوال،ولاتتشابه في العلاج ولا الأعراض،لذلك علينا الا نأخذ بنصائح الآخرين
=============
أجمل مافي الموضوع أنني وجدت حبا وأهتماما من إناس ربما يعرفونني من مدونتي أو الفيس بوك ،ولم يتركوني حتى يومنا هذا ،فهم دائمي الأتصال بي،والأهتمام بمراسلتي ومعرفة أخباري
والأسوأ حقيقة أن هناك أصدقاء كانوا قريبين مني جدا ،تفاعلوا معي مرة واحدة في البداية إلا أنهم لم يكلفوا أنفسهم عناء الإتصال بي أو حتى مراسلتي ببلاش على أيميلي الخاص
صديق وصديقة أكدوا لي أنه كان ينبغي علي الا أعلن عن مرضي من خلال مدونتي ، وكان من الأفضل كتمان الأمر وجعله سرا حتى لايتعامل الناس معي بشفقة فتسوء حالتي النفسية،،،،أو يتعامل البعض الآخر معي بشماته ويفرح من كان في قلبه حاجة ضدي،فقلت لهم أنتم نسيتم أنني صحفية والكتابة هي المتنفس الوحيد لي،وربما كنتم على حق في نظرة البعض لمريض السرطان بشفقة تقهره نفسيا لأنه مريض حكم عليه المرض بالموت،،،،،أما من يشمت في المرض فأقول لهم هؤلاء لاتعرف قلوبهم خشية الله ولهم عنده حساب عسير،وعليهم أن يعلموا ان الدنيا لاتدوم لأحد
هناك 51 تعليقًا:
اللى انتى عملتيه ده هو الصح
الانسان و هو ضعيف بيبقى محتاج مسانده من اللى حواليه
لانه بيرفع المناعه و بكده يقدر يقاوم شراسه المرض
ابعدى عن اى زعل و اديه ضهرك عشان تقدرى تكملى معركتك
ربنا معاكى يا حبيبتى و كلنا جنبك ان شاء الله
بصى مش عارفه بس من ساعه ماقريت كل بوستاتك الاخيره عن رحله الغفران وانا بسميها كده لانك ان شاء الله هاترجعى منها نضيفه فعلا ولانها اكتر رحلات البنى ادم فى الارض صعوبه من وجه نظرى على الاقل وانا فى حاله زهول لانك قولتنى كل اللى بفكر فيه
وخايفه منه يحصل والغريب انى متاكده انه هايحصل ومستنياه كمان ياعلم ربنا علام الغيوب وخلاف الظنون
بالرغم من حبى للحياه ومحاوله استمتاعى الدائم بيها وتفاؤلى الدائم الا انى كنت خايفه
ماكدبش عليكى بعد كلامك حاسيت انه حتى لو جه مش مهم المهم ساعتها هاعمل ايه خالتينى بصراحه اواجه خوفى يمكن كمان رعبى
شفاكى الله وعفاكى واكمل عليكى الصحه بالخير
اختبار صعب اه بس انا شايفه انسانه قويه بتتالم بس مابتتكسرش
ربنا معاكى ويطمنا عليكى
تقبلى مرورى
ألف سلامة عليكي و انشاء الله ربنا يتم شفاكي
المرض عدو وستنتصرى عليه، لو هذه الصوره فى رأسك ،ستشفى وتعودى كما كنت ورده ..فلاتستسلمى مهما ظهرت قوة عدوك..وكونى متيقنه من هذا الانتصار لانك لو شككتى فى قدرتك علىالانتصار فستهزمى ..ولابد من الصمود
وتمنياتى بالعوده قويه ومنتصره..
ولاتضعفى
بتهيألى ان كتابة حضرتك دى فى حد ذاتها نوع من مواجة المرض وانا مستنية البوست اللى هيقول انك تخطيتى المرض خالص وبنجاح انا دايما بدخل البلوج اتطمن على حضرتك من بعيد لبعيد ربنا معاكى :)
غرام وحشتيني اوي
واعذريني على التقصير الفترة اللي فاتت
لكن لا يعلم ظروف الناس الا ربنا
واكيد انت عارفة غلاوتك في قلبي
وكفاية اقولك اني مفكرتش ادخل على الفايس بوك
الا لكي اعرف اخبارك واكلمك ايام مرضك الاولى
لكن للاسف جات ظروفي عكس
ومعرفتش اكلم اي حد
والوحيدة اللي عرفت اكلمها
طول الفترة اللي فاتت هي نفسي
انا مش جاية ازيد من احباطك
انا جاية اقولك اني بحبك جدا
وسعيدة كتير بتجاوزك لمراحل صعبة واكيد بعون الله الجاي اسهل وفيه خير ليكي
وحشتيني بجد ممممممواه
آآه
ناس كتير اكدت موضوع ان الشعر بعد الكيمو ثيرابي بيبقى اجمل
هنايالك ياعم ماشاء الله مقدما
تحياتي
تصدقى بالله انى عارف احساسك ده وحسيت بيه من حوالى48 ساعه بس
مش بمرض الحمد لله
لكن احساس ان جدان الامان عندك بقى شرخ وان حاجات كنتى تحسى انها بعيدك عنك خاااااااااااااالص بقت موجوده عنك
احساس صعب جدا
وطبعا اللجوء لله هو الحل الأول والأخير فى مثل تلك الحالات طبعا مع الأخذ بالأسباب
إلاأننى أوافقك على أمر لا أقوم به انا وهو ان تكتبى وتشركى اصدقاءك معك فالمواساة ووقوف اصدقاءك بجبك هو أكبر طريق وأسرعه كى يزيل عنك الإكتئاب وكل الأمراض النفسية
أدعوا الله لك ولكل الناس بالشفاء العاجل والكامل والقريب
ما تخافيش ابدا و ما تخليش الموضوع ده يهزك ...صدقينى بقالى اكتر من سبعتاشر سنه بشوف حالات سرطان ثدى بحكم تخصص والدى و اكتر من تسعين فى المائة بتشفى تماما بالذات لو مش فى المرحلة التالته
اصبرى و اهدى و اعتبريها فترة و ح تعدى و ثقى فى ربناو فى قدرتك
المرض ابتلاء من الله سبحانه وتعالي يختبر به صلابة عبده ويرفعه به درجات ويطهره.... وكذلك يميز به الانسان الطيب والخبيث في من حوله ..... لذا لا تحزني فانت الطريق الصحيح باذن الله ....واسال الله ان يمنحك الصبر والشفاء وحسن الجزاء .
تحياتي لك
اوعي اكون من الناس المقصرين معاكي
و الله كنت في محنه الايام اللي فاتت و كنت باتمني اتكلم معاكي
بس انت انسانه عظيمة و ممكن تقدري غيابي القهري عن الجميع
من اول مرة انا قلت لك انك انسانه مؤمنة و الحمد لله من الممكن المحن تقربنا لله اللي ليس لنا غيره في رحمته و حبه
كل لما احس ان الكلام عن اللي اتخلو عنك احس اني منهم
سامحيني لتقصيري و الله معرفتنا من المدونه اعتز بيها علي الرغم من عدم تشرفي بمقابلتك و لكن الله يعلم مدي تقديري لشخصك و دعائي لك في محنتك
انا رايح عمرة النهارده باذن الله و هتكون باسمك
سفاكي الله و عفاكي
تحياتي
طبعا احسن حاجه بتعمليها هي الكتابه
لأكتر من سبب
اولا الكتابه متنفس هايل للتوتر والزهق واحساس الوحده
ثانيا الكتابه هتخلي في مرجع تقري فيه اللي حصل ده بعد ما ربنا يتم شفائك ان شاء الله
هتلاقي نفسك بتشوفي حاجات مكنتيش شايفاها وقتها
وهتتعلمي من المحنه دي اكتر
الكتابه هتفيد غيرك من المرضى اللي هيحسوا انهم مش لوحدهم
وهتفيد غير المرضى انهم يعرفوا نعمة ربنا عليهم وان الأبتلاء ممكن يأتي في لحظه مهما كنت مستبعده
ربنا يتم شفاكي على خير يارب ويقويكي على الفتره اللي فاضلة في العلاج وينتهي بافضل النتائج يارب
وعموما سامحي اي حد يكون مقصر في السؤال عنك يا غرام انتي عارفه الدنيا واللي فيها
وسامحيني انا قبل الكل على اني مقصر جدا معاكي وسؤال عنك محدود
انا عارف اني استاهل قرصة ودان جامده بس انا عارفك سكره وهتسامحيني
خلي بالك من نفسك قوي
واكيد هنتقابل بأذن الله في يوم واعرفك على زوجتي واعزمك على الغدا عندنا كمان
علشان متقوليش مبنسالش بابو بلاش حتى ادينا هنغديكي كمان بس المهم اكلنا يعجبك بقى
سلاااااااااااااااام يا قمر
اخوكي ايهاب
غرام
ارجو ان تقرأى خالد منتصر فى المصرى اليوم عدد 24 يناير فى عموده اليومى
وتمنياتى بالشفاء....
ازيك يا غرام
اولا عايزة اقولك ما يهمكيش من حد و ركز فى نفسك و ان شاء الله كله ح يبقى كويس
ثانيا عايزة اقولك انى مش عارفه حصل ايه بس كل ما اجى انزل تعليقك اللى سبتيه عندى مش بيظهر باينه خطأ تقنى بس انا قريته و متفقه معاكى و ايميلى اهو
Tears010101@yahoo.com
سيدتي الفاضلة .. طبيعي جداً إن مرحلة العلاج هتحسي فيها بمتاعب كتير ، صحية وجسمية ونفسية، بالإضافة للقيود الكتير على الطعام والشراب ونظام الحياه كله ، لكن في سبيل الشفاء كل ده يهون
وصدقيني بجد وتأكدي إن كل ده مرحلة من ضمن مراحل العلاج إلى أن يكتب الله لكي الشفاء التام
الحقيقة أنا معاكي في إن حكاية سرد الآيات القرآنية دي مش هي اللي هتريح نفسية المريض النفسي خصوصاً لو كان هو أصلاً مؤمن بقضاء ربنا.
المريض النفسي محتاج إن الأخصائي النفسي يفتح آفاق جديدة قدامه تساعده إنه يتخلص من الأفكار والمشاعر السلبية اللي ممكن تسيطر عليه وتؤدي لتدهور حالتة النفسية وبالتالي تدهور الصحة العامة وعدم تقبل الجسم للعلاج
ومش هبالغ لو هقول ان الصحة النفسية لا تقل أهمية عن علاج الكيموثيرابي نفسه ، لأنها مرتبطة جداً بمناعة الجسم
آسف إني بطول عليكي ، بس صدقيني والله على قد إيمانك ويقينك بالأمل في الشفاء ربنا هيهون عليكي كل المصاعب دي ونفسيتك هتكون أحسن وبالك هيرتاح بإذن الله
شوفي انا هقلك علي حاجه
معتقدش ابدا حد في شخصيتك وانتي نفسك شوفتي كميه الناس الي متعرفكيش ماشاء الله وربنا يذيد من حبيبك يارب بتحبك اد ايه ومن غير قرب ولا في اي مصلحه شخصيه وده دليل علي حب ربنا للعبد لان من حبه ربه حبب فيه خلقه ودي نعمه كبيره اوي لازم نحافظ عليها لكن ان حد يفرح في مرضه او ابتلائه ده انسان مريض او مش سوي
لان مفيش حد في الدنيا مهما كان في اختلاف في وجهات النظر او اختلاف الفكر او كره الشخص نفسه لاي سبب دنياوي يفرح في مرض او شيئ سيئ يحدث لانسان مهما كانت المببرات غير انه مش انسان طبيعي فيه صفات البني ادمين اللي متعودين عليها من رحمه وعاطفه ووو اعتقد دي قله قليله وممكن متكونش موجوده اصلا
اما بالنسبه للشفقه فبردو معتقدش
كل الموضوع ان لما احب حد واحبه بجد ومن غير اي سبب ببقي زعلانه عشانه او بحس انه حد قريب مني بتألم لالمه وبزعل لزعله وبردو افرح لفرحه لان احنا بشر طبعا انا بكلم عمتا
اصلا اصلا لو الواحد سمع خبر وحش عن شخص ميعرفوش اصلا ولا سمع عنه مجرد شخص معرفش حصل ايه بيتأثر ولو دقايق
تخيلي انتي بقي حد اتكلمنا معاه وعشنا معاه وحكاويه وسبحان الله ربنا بيخلق حاجه غريبه تشد الناس لبعضها وتكون الفه وحب وموده بدون اي اسباب
وبتنشئ علاقه متتوصفش بس بتتحس واكيد اكيد الشخص بيحس بمدي صدق ده من الشخص الاخر او انه بينافق اوفعلا شعوره صادق او وراه سبب لاكده اكيد
زي ما حبتيني هحبك من غير اي سبب
لان دي صفات البشر
بالنسبه لاكتئاب ففعلا انا كمان راي سيبي اي دوي اكتئاب لانه بيجيب خمول ونوم وارق وهم غير كده احنا لازم نكون عندنا اراده وقوه نخرج نفسنا من اللي احنا فيه ولازم نثبت ونقاوم وده شعور من داخل الانسان نفسه لازم يخرج منك انتي وانتي اللي تبقي عاوزه كده وتتحملي
لازم يكون في عزيمه مفيش اي حاجه في الدنيا دي كلها تقدر تغلبني
انا اقوي من اي شئ وهكسبه وهوصل للي انا عاوزاه ان شاء الله بالايمان والثقه في الله واردتي وعزمتي
بالنسبه لاحلي حاجه في الموضوع كله
انه قربك من ربنا سبحانه وتعالي اكتر وده احلي خبر صلاه الفجر وقراه القران والموظبه عليهم يارب يجعله في ميزان حسناتك ويتقبل ان شاء الله يمكن كل ده عشان كده وده اكيد في كل شيئ في حياتنا حكمه لا يعلمها الا الخالق
بعد كل اللك والرغي واللت اللي دوشتك بيه ده وديما بطول
عاوزه اقلك
اهم من ده وده
ان احنا بنحبك بجد
انا عن نفسي بموت فيكي ومعرفش ليه
اه نسيت
لاغراض دنياويه
(.
ربنا يثبتك ويحفظك ويتم شفاكي علي خير ويخليكي لنا ولكل الناس اللي بتحبك
اولا: ازيك يا مدام ايمان
وحشاني جدا ووحشاني كتاباتك اوي اوي
ثانيا بقى مبسوطة اوي من كلامك وتمسكك بدينك وبرضاكي بما ابتلاكي الله به لان كل ده بيخفف من ذنوبك وان شاء الله يرضيكي الله ويشفيكي ويخفف عنكي
بس انتي التزمي باوامر الدكتورة علا خورشيد وتعليماتها علشان ربنا يتم شفاكي على خير باذن الله
ثالثا بقى مفيش حد ينفع يبصلك بشفقة ابدا ولا شماته لانه لا شماته في المرض ولا شفقة لاننا كلنا معرضون اننا نصاب باي مرض لانه بيكون ابتلاء من الله عز وجل واختبار منه لنا ليختبر قوة ايماننا وتمسكنا بدينا وعقيدتنا وهل عندنا امل في الله ام لا
والحمدلله انا شايفاكي راضية وصابرة وبرجوكي تكوني كدة دايما وان شاء الله هتكوني افضل من الاول واحسن
ونصيحة مني بلاش ادوية الاكتئاب والمهدئات والمنومات لان طريقها مش كويس وانا بعاني لسة منها ويمكن دي من سبب تعب نفسيتي
لاني لجات ليها في وقت من الاوقات وبعاني توابعها دلوقتي
قارجوكي ابعدي عنها تماما وقربي من ربنا وخلي عندك امل فيه وخليكي قوية علشان تقدري تجتازي المرض اللعين ده
ربنا يشفيكي يارب ويشفي كل مرضانا ومرضى المسلمين
اللهم امين
يعنى كلامك مؤثر جدا .. عارفة يا ايمان المشكلة الحقيقية اننا مش عارفين نبقى بنى آدمين
باحس اننا بتعامل بغشومية واحيانا بجليطة .. المسألة برضه تخلو من آداب وخصوصا فى الطب .. زى مانت قلتى .. كل حاجة سبوبة والسلام ..
رصيدنا الانسانى بالنسبة للى بنقول عليهم مش مؤمنين ضئيل جدا ..
ربنا يحفظك ويكتب لك الخير دايما .. ويعافيك
يا حبيبتى ربنا يكتب لك الخير كله ويكمل شفائك على خير
ربنا يتمم شفاكى على الخير والحمد لله على روحك المعنوية العالية و من نبرة صوتك الى حاساها وباينة فى كتابتك انك عديتى المرحلة الصعبة والى جاى يبقى احسن
ربنا يديكى الصحة والعافية وطوله العمر و يديم عليكى فلسفتك الى ريحتك حتى مرضك فلسفتيه بطريقة تساعدك على اجتياز محنتك
ادعو لك دائما من قلبى
بيعجبنى اوى موضوعيتك فى معالجه الاحداث خصوصا المفاجأه
وبعدين انتى حد جميل وتتسهلى ناس جميله حواليكى
ناس كتير كانت بتدعيلك فى اطهر الاماكن فى الكون
وناس كتير كانت تتمنى تزورك لولا ا طبيعه عملها خارج مصر حالا
لو تحبى ندعيلك فى باريس..ندعى
عاجبنى اوى مردك الجمل لله..لاننا فعلاً ملناش غيره
وبعدين خلاص ياستى انتى ينفعش تاخدى نصايح من اى حد مننا سواء شاهد حاله او اتحكاله عنها
لانك ببساطه اصبحتى اكثرنا خبره فى الموضوع
بس اعذرى الناس الى كانت بتديلك نصايح هى كانت تقصد تطمنك وتوصلك بطريقه بسيطه ان اغلب الناس عاش المواقف دى وانتى مش لوحدك
وكانت بتحاول تشجعك
تحياتى لسيده الكلمات الاولى فى جمهوريه بلوجر
واميره الموضوعات المميزة فى اماره الابداع
وملكه الاحساس الراقى فى مملكه الكلمات
تحياتى
اول مرة ازور البلوج
وبجد انتي سبتي جوايا شعور بالثبات والامل
فكرت لو حصلي اي ابتلاء ربنا يرزقني بالصبر والايمان زي مارزقك
الصبر دا اجمل نعمة من ربنا
مش كلنا بنصبر علي الابتلاء
ربنا يتم شفاكي علي خير وتستمتعي بالحياة والناس الجميلة اللي بتحبك
:)مبسوطة علشان جيت هنا
بجد
الف سلامة عليكي!!!
ان شاء الله في ميزان حسناتك
ربنا يعينك ان شاء الله
كوني بخير :)
Rasha Al Saadi
مشكلة الطب النفسي في الوطن العربي هي ان هناك لبس عند اطباء علم النفس بين دورهم النفسي ودور الشيوخ الديني وهذه مشكله يواجهها الكثير من المرضى النفسيين في الوطن العربي او المصابين بالاكتئاب.... يعني هما كانو بيدرسو في الجامعه الايات القرانيه والاحاديث امال فرويد مثلا درسو امتى؟
اعتقد ان دور الطب النفسي في الحاله دي ان يبدأ يعلم المريض طريقه جديده للتفكير يعني يخليه يشوف المشكله من منظور جديد تماما ماكانش شايفو قبل كده بدل مايقولو اصبر والصبر مفتاح الفرج
الله الشافي
·
بسم الله الرحمن الرحيم (وَنُنَزِّلُ مِنَ الْقُرْآنِ مَا هُوَ شِفَاء وَرَحْمَةٌ لِّلْمُؤْمِنِينَ وَلاَ يَزِيدُ الظَّالِمِينَ إَلاَّ خَسَارًا..). صدق الله العظيم
a
اللهم ارفع مقتك وغضبك عنا واشفى اختنا الاستاذة ايمان يارب
شفاكى الله وعافاكى
وجعل كل الم تالمتيه ف ميزان حسناتك اللهم امين
والله اذا احب عبد يصب منه
ربنا يتم شفاكى على خير اللهم امين
واحنا اطفال كنا لما بنعيا بنروح لماما نعيط ونشتكي ومجرد العياط والشكوه كانو بيريحو قبل حتى ماناخد الدوا..... البكاء والشكوى بتحمي اي حد من الاحساس بالاكتئاب ماتكبتيش مشاعر الضعف اللي جواكي مش المفروض تبقي قويه دلوقتي حالة المرض هي الحاله الوحيده اللي تسمحلك انك ترجعي طفله تاني وتعيطي من غير سبب تعيطي عشان انتي عايزه تعيطي عشان انتي خايفه وعشان انتي حاسه بالضعف دي كلها مشاعر انسانيه من حقنا ومن حقك مارسي حقوقك الطبيعيه عشان ده حق وكلنا كبشر لما حد بيحاول يمنعنا من ممارسة اي حق من حقوقنا بنتعب بننهار بنحس بالانهزام..... ماتوصليش نفسك للمرحله دي عيطي لما تحسي انك تعبانه عيطي لما تحسي انك مش قادره تقاومي صارخي بسبب او من غير سب فضي شحنت الغضب اللي جواكي لانك دلوقتي غضبانه ليه انا غضبانه من المرض من الدنيا من الادويه فرغي الشحنه اللي جواكي عيطي لحد ماتنامي من التعب من غير منوم هتنامي زي طفل صغير..... انتي جربتي كل حاجه دلوقتي عشان تقاومي الضعف والحزن جربي تستسلمي لنوبة حزن جامده مليانه انفعالات ومشاعر مارسي حقك في الحزن و الضعف والغضب......
بحبك وبدعيلك
You will beat it ...and we will all celebrate
شكرا زميلتي ايمان
لقد طالعت مدونتك
واعجبت بها كثيرا وبكتاباتك المميزة
اتمنى لك التوفيق
تحياتي لك
اياد العبادلة / صحفي من غزة
مقال رائع استاذه ايمان شعرت وانا اقراءه بمقدار المعاناه التي عانيتيها اثناء فترة العلاج شفاكي الله وعفاكي وجعل هذا في ميزانن حسناتك اتمني لكي من كل قلبي الشفاء العاجل والحياه السعيده صحيح انني لم يسعدني الحظ بمقابلتك او بالتعرف اليكي مباشرة ولكني اشعر تجاهك من داخلي بالقرب و بحب يزداد يوما بعد يوما
تقبلي حبي وتحياتي
تتبعت مدكراتك بكل شوق و كم أتمنى أن أراها قي صورة كتاب أو فيلم سنيمائي أو مسلسل .إلا أنني لا أوافق على العنوان "كلام نسوان " الحقيقة "آلام انسان " إنك تعيشين ملحمة كملحمة أوليس وهي ملحمة من أجل الحب والحياة فلو نتخيل سيناريو لمسلسل تكتشف البطلة أنها ليست لحظة النهاية بل لحظة التحول من حياة الدودة إلى حياة الفراشة لأننا عندما نجرج من تجربة الولادة الصعبة نكتشف الجمال الحقيقي ...فأنا مثلا عشت أجمل فجر عندما خرجت من المستشفى بعدنزيف في الدماغ لحسن الحظ كان قريبا من الأنف مما جعلني أتخلص من الدم بصيفة طبيعية .كان الفجررائعا مما دفعني أن أسير مسافة طويلة وأنا أكاد أطير وقد كنت قبل ساعات في غيبوبة بسبب ضغط الدم فرأيت في الحلم أنني أسير الحقيقة أطير وسط ممر احمر متعرج وكنت متشوقا لرؤية نهاية الممر ولكني سمعت الطبيب يقول للممرض "دع الدم يسيل من أنفه فقد تخلص من الضغط ..و بعد دلك أحسست بخفة مما جعلني أفلت من قسم الاستعجالي لأعود للبيت و أنا في نشوة عظيمة أحس بالحياة ترقص في لحمي ودمي .
...قلت إن حياتك أصبحت ملحمة تلفزيونية رائعة .لأن الحياة التي نستحقها هي الحياة التي نصارع من أجلها و الحب هو لحظة عطاءمن أجل كل المخلوقات .الحب حضن يحملنا أينمانتجه و يعاملنا كالأطفل الصغار يغفر لنا عبثنا .اعتني بنفسك جيدا .برابرة تونس في انتظارك
je te souhaite un bon rétablissement wi rabina ykawik
ياايمان الحب والامل ليه الاكتئاب والقلق ماياتى من عند الله0نقابله بالصبر ..... ربنا يشفيك ويكفى انك زى العسل
أنا مبسوط جدا بالبوست ده .. حسيت منه بإيجابية وتفاؤل بين السطور .. وإن الموضوع إن شاء الله هيكون سهل وهيعدي بخير
يمكن الكلام ده مش مكتوب بالتفصيل لكن هو ده الشعور اللي جالي .. وأتمنى إن كل بوست يعدي بإيجابية أكتر من اللي قبله
أما موضوع الكتابة ده من عدمه .. فأنا مؤيد جدا لأنك تكتبي وتنفسي عن نفسك من خلال المدونة أو غيره .. ومن حق الأصدقاء عليكي إنك ما تخبيش الحاجات الخطيرة دي عنهم وخصوصا إن فيه ناس بتحبك لله في لله دون أي أهواء أو مصالح .. حتى لو ما تعرفيهومش
ربنا معاكى ومع امى الغالية
شفنكم الله ووقف بجانبكما يارب
اللى انتى بتحكيه دة حاصل مع امى بالضبط ناس سألو مرة فى اول المرض وبعد كدة مافيش وحالة الغثيان والترجيع بجد ربنا يعافيكم ويعفى عنكم يارب وربنا يجعل كل الم انتم حاسين بيه فى ميزان حسناتكم يارب امين ربنا يخفف عنك انتى وامى يارب
ياريت كلنا ندعى لكل مريض
يارب
الف سلامة عليكى ... وشدي جيلك خلى املك فى ربنا كبير ... وربنا يتم شفاكى يا رب :)
سلامتك ألف سلامة
أنا فقط لدي سؤال أرجو أن تتقبليه بصدر رحب رغم أنه (مش وقته)
ما دمتِ تداومين قراءة القرآن الذي يقول قائله فيه أنه لم يفرط فيه من شيء
لماذا تقرأين كتب أخرى مترجمة كتبها كفار لا يعلمون شيئاً عن القرآن ..ومع ذلك تسمحين لهم بمنافسته؟
عذراً..أتمنى لكِ الشفاء العاجل ، فواضح أنكِ صاحبة إرادة ، وسوف تتجاوزين الأزمة قريباً
تحياتي لكِ
صيدلانيه طالعه نازله
الحمد لله على كل شيء ربنا لابخيب ظن عبده به
richardCatheart
يارب تكون رحلة الغفران واعود منها كما ولدتني امي
بنت مصرية
ربنا يخليكي ويديكي الصحة
سهيل ولى الدين علام
يارب انصرني على المرض يارب دعواتك لي
صفا ساره
يسمع منك ربنا
فكرة من الزمن ده
طمنيني عليكي لأني قلقانه بجد
الأزهري
اشكرك على مشاعرك الجميله
Tears
الحمد لله على كل حال اشكرك
بحر الالوان
الحمد لله على كل حال
أحــوال الهـوي
معقوله انت مقصر؟؟؟ظكل اللي بتعمله معايا ومقصر؟؟؟؟ياريت الناس كلها تكون زيك
الشنكوتي الكبير
اكيد انا بلاقي متنفس في الكتابه والا كنت اعتزلتها في تلك الفتره
سهيل ولي الدين علام
قرأت المقال وارسله لي العديد من الأصدقاء ،،وبجد نفسيتي ارتفعت شويه وربنا المعين
هشام نصار
انا انضممت فعلا لجلسات نفسية في المؤسسة المصرية لسرطان الثدي وبصراحه شعرت بإنني يمكن الأستمرار معهم
سمكة واحدة
فعلا كلامك مظبوط ياسمكتي
زهور الأمل
ربنا يستجيب يارب
Sherif
اشكرك يا شرين
Desert cat
ربنا يخليكي ياقطة
HopiZ
ربنا يسعدك ويكرمك ويديكي الصحة
momken
دايما كده رافع معنوياتي اشكرك
قلب ينبض لله
اهلا وسهلا ونتمني تواصلكم الدائم
Epitaph1987
بنوتي الحلوه وحشتيني فينك من ايام مكسوفة
Rasha Al Saadi
المشكله في انهم اوقفوا تفكيرهم وعقولهم
Osama Adly
كتر خيرك
Asmaa Kandil
ربنا يسعدك ويديكي الصحه وطول العمر
Mohamed Riad Eisa
يارب امين يارب
رفقة عمر
يارب تقبل دعائك
Rasha Al Saadi
ابنتي الحبيه تسعدني رسائلك لي
اياد العبادلة
اشكرك
Mohamed Jouini
الصديق التونسي الجميل تسعدني وتقويني برسلئلك
نبيل رفعت خوينس
الحمد لله على كل حال
Abeer Allam
يارب ياعبير يارب
... Manal Zahran
لاتنسيني بالدعاء واشكرك على مشاعرك الجميله
Magui Naji
يارب قويني
يا مراكبي
كتر خيرك ويارب يكون احساسك صح
رئيسة حزب الأحلام ربنا مع ماما ومعايا ويشفينا ويشفي كل مريض يارب
لاديني
انت فاهم غلط انا لا اكفر احدا
والعلم عند الله وحده واذا قرأت كتاب جدد حياتك للشيخ الغزالي ستجد ان هذا العالم المسلم بني كنابه على كتاب واحد مما تعتقد اننا نكفرهم
تحياتي
islamz
الحمد لله على كل حال وربنا يغفر لنا ويتقبل منا امين
شفاك الله وعافاكى
مش عارفة اعلق عليكى غير انك اكيد ماشاء الله انسانة قوية
تحاولى الحياة بشرف وفخر لا الحياة على الهامش
رربنا معاكى
نهر الحب
اشكرك حماك الله من شر الأمراض وجعلك دائما نهرا يفيض بالحب
ربنا يشفيك و يعافيك و يجعله في ميزان حسناتك
إرسال تعليق