السبت، نوفمبر 14، 2009

الموضوع اكبر من ماتش كورة







بسبب شراء بعض البيجامات الشتوية التي وجدت أنني أحتاج اليها في تلك الأيام الباردة، أصطحبتني أبنتي الى بعض المحلات في المهندسين ،والحقيقية أنني ماوجدته في الشارع غير مودي تماما لأنتقل من الكآبة الى نسيان ما أمر به والتعب الجسماني الذي حل بي بسبب العلاج الكيماوي،،مظاهرات في الشوارع وأعلام مصر مرفوعه عاليا وطبل وأغاني وكلاكسات وزحام وتجمعات في شارع جامعة الدول العربية،،ورغم فرحتى بفوزمصر على الجزائر الا أنني أؤكد ان تلك التظاهرات الشعبية التي شاهدتها قبل الماتش في الشوارع ((((بصراحه بتؤكد أن الموضوع موش موضوع كره قدم وماتش مع الجزائر، ولا كأس عالم،،هيستريا فرحة المصريين في شوارع مصر والدول العربية والعالم بتثبت حاجه واحده بس ،،وهي الناس دي بتحب بلدها قوي قوي قوي،،رغم انهم بيلعنوا ويسبوا وكلهم عايزين يسبوها ويهاجروا لكن وقت الجد مافيش حد بيحب بلده زي المصريين ،الشعب الطيب صاحب المعدن الأصيل))))وعلشان اصحابي الجزائريين مايزعلوش أنا مصرية حتى النخاع ولازم افرح لبلدي رغم أن بيني وبينكم عندي عرق جزائري من ناحيه جدتي أم أبي ،،،لكن معلش برضه المصري يكسب

هناك 21 تعليقًا:

سمكه واحده يقول...

اجبرااااااااااااتك
وحشتيني يا غرومه
الف مبروك ليكي ولينا ولمصر
لا فعلا هو مش موضوع ماتش
الموضوع اكبر من كده بكتير اوي
واحنا كلنا بنحب البلد دي اوووي
برغم اللي فيها بس جد وقت الجد
بتلاقي المشاعر اللي بجد بتظهر
ربنا يحميها
انا مبسوطه
وكنت متوقعه انك هتكتبي حاجه عن الماتش
بقلك ايه
مجبتليش معاكي حاجه علي مقاسي اصلا انا كمان بدات ابرد والجو عندنا بقي برد وكده
مبروك لمصر

سمكه واحده يقول...

الف سلامه عليكي
وربنا يخفف عنك ان شاء الله
وتطلعي من المود ده بقي

sookra يقول...

وحشتينا ووحشنا كلامك
ربنا يتم شفاكى يارب
الف مبروك لمصر

هشام نصار يقول...

للأسف الشعب المصري مفتقد حتة انه يجتمع على شيئ واحد ويمكن كورة القدم هي الشيئ الوحيد اللي مجمع الشعب واصبح المتنفس الوطني الوحيد ليهم
دعواتي ليكي بالصحة والسلامة

زهور الامل يقول...

مدام ايمااااااااان

الف الف مبروك لمصر ولينا كلنا

وحشتيني جدا
اخبارك ايه

يارب تكوني بخير

انا عارفة ان العلاج الكيماوي هيتعبك شوية بس معلش استحملي ويارب يجعله بفايده
ووجع ساعة ولا كل ساعة

لو تعرفي البلد عندنا كانت عاملة ازاي


انا قلبي كان بيرقص من الفرحة بجد

كان هاين عليا اطير من البلكونة وامشي وسط الناس
يارب يجعل ايامنا كلها نصر وفرح وامل

تحياتي

karim يقول...

عزيزتى اولا سلامتك وربنا يعطيكى الصحة, ثانيا هى دى مصر و اولادها ياكلوا بعض بس محدش يجى من برا ويلمس شعرة مننا, اللة اكبر على بلدنا بجد طوول عمرها بخيير

الشنكوتي الكبير يقول...

يا بنتي الناس دي هتموت نفسها تحس بلحظة انتصار ولحظة فرح باي طريقه القرف طول الوقت والنكد والياس خنقوا الناس اول لما بيلاقوا فرصه يفرحوا بتبقى كريزة فرحه هيستريا زي ما قلتي
واحد ماشي في صحراء من 3 ايام لا اكل ولا ميه وقرب يموت وفجأه لقى قدامه بير ميه بيبقى مش مصدق وممكن يموت من الفرح وميلحقش يشرب هم عاملين كده العطش واللهفه على اي انتصار وفرحه جننت الناس حتى لو كان الأنتصار ده على بلد عربي زينا وفي ماتش كوره لا راح ولا جه ولا رجع حاجه من اللي ضاعت

ما علينا المهم ان الظيطه فرفشتك شويه
خدي بالك من نفسك قوي ومتنسيش ميعادنا في الفرح ان شاء الله

سلاااااااااااااااام
اخوكي ايهاب

يا مراكبي يقول...

عشان أحزاننا وهمومنا كتيرة قوي .. بتكون الفرحة غالية .. غالية قوي قوي قوي

ألف مبروك علينا كلنا ويارب يتمم فرحتنا على خير يوم الأربع إن شاء الله

حرروف يقول...

الف مبرووك ليكي ولمصر وربنا يسعد ايامك كلها ويتمم شفائك علي خير

romansy يقول...

الموضوع اتحاااااد وحب وقوه
كانت جوانا نفسنا نفرح قوى قوى
اد ايه الفرحه جميله وبلدنا جميله قوى
يارب تبقى احسن بلد فى الدنيا

Sherif يقول...

ليس هناك على وجه الارض شئ اجمل من حب حقيقى .. بين اتنين .. وواحد وبلده .. واحد وامه او ابيه ..

ساعتها .. نحن نرى بقلوبنا .. فلا نلاحظ اى عيب فيمن ننظر اليه .. لاننا نحبكم

ربما كان اهم شئ .. انك بحمدالله خرجت ولو لفترة من ذلك المود المرهق نفسيا وربما بدنيا .. حمدالله على سلامتك دائما .. وتذكرى ان محبينك يحبونك كما انت .. باى شكل .. وفى اى ظروف .. وحشتينا جدا جدا

أحــوال الهـوي يقول...

تعرفي انا لما بابقي متضايق باروح اي مبارة و اشجع جنب ناس ما اعرفهاش و اعيش و بعد ما الماتش يخلص باحس براااحه كاني انغسلت

هو ده خروج الحزن و التعب و دخول الفرحه

يارب يسعدك و يقويكي

تحياتي

ماما أمولة يقول...

ازيك ياغرام يارب تكوني في احسن حال

فعلا الشعب المصري شعب طيب وبيحب مصر قوي رغم كل حاجة

الحمد لله وعقبال الفرحة الكبيرة بالفوز ان شاء الله

ربنا معاك حبيبتي ويكمل شفاك على خير يارب

صيدلانيه طالعه نازله يقول...

تصدقى بايه
انا امبارح افتكرتك ساعه الماتش و افتكرت كأس القارات و خناقاتنا مع الناس اللى بتعلق و تشتم ساعه موضوع منتخب مصر
ايوه كده ارجعيلنا و انسى الهم و المرض حتلاقيه ينساكى
مبرووووووووووووووووك ليكى و لينا و لمصر كلها و عقبال الفرحه الكبيره يوم الاربع

لا تـــشـــتــــاق يقول...

الحمد لله اولا اننا اطمنّا عليكى انك بخير
ثانيا
مبروك الف مبروك لمصر
وربنا يكملها بالخير

allfollowsome يقول...

يا بختكم بجد كان نفسى اكون فى مصرى


البلد اللى انا فبها الجالية المصرية كا كملوش 200 واحد بما فيهم اعضاء الصفارة (بضم الصاد وتشديد الفاء) مصصصصصصصصصصصصصر

تقريبا شامم ريحة ضرب النار جاية فى الطريق


القعده فى مصر هنخليكى تستردى عافيتك بسرعة انشاء الله وماتركزيش كتير عشان الضغط

دمتى بصحة

أم بتول يقول...

حمدا لله على سلامتك ايمان ، و ربنا يقويك و أن شاء الله تخلصى كورس العلاج و تبقى زى الفل و بألف صحة ، أنا بقول فعلا دة حب لمصر بس تعصب أكثر منه ، و حب فى تفريغ شحنه داخلية مكبوتة ، مش معقول نهلل و نصرخ ونولع نيران و نجرى بالعربيات وكل دة ممكن يعمل كوارث غير تعطيل المرور للمسافر و التعبان و سيارات الأسعاف و المطافى ، عارفة يوم الماتش و انا مروحة 2 سيارة مطافى مش عارفة توصل لمكانها من زحمة السيارات و المهرجانات الى عاملاه فى الشوارع ... يبقى دة حب ... ليه مش بنخلى أحتفالنا إيجابى ... مش بقول ما نفرح لأ نفرح و نعبر عنه بطريقة حضارية ،
عموما أهم شيئ فى الموضوع كله ان مودك أتغير و فرحتى ودة المهم عندنا ، ربنا يتمم شفاؤك على خير يارب . وكل سنة و انت طيبة

طوبه فضه وطوبه دهب يقول...

هو دا طبع الشعب المصرى واصالته اللى بتبان وقت الشده اهم حاجه انك بخير ويارب ديما فى احسن حال وحشتيناااااااااااااااااااااااااااااااا موووووووووووووووووووووووووووت

Sonnet يقول...

عزيزتي
الناس كانت عايزة حاجة تفرحها و تجتمع عليها
يارب يوفق الجميع بدون أزمات بين البلدين و يتأهل الفريق الأفضل
مع تحياتي للمدونة الجميلة

همس يقول...

قصدك احنا كنا المصرين

دلوقتى احنا المتهانين

همس يقول...

الف سلامه عليك